¹ Nakuti ine ndimfuna palkuti imwe mudziwe nkhawa yomwe ndinayo kuna imwepo, na awo aku Laodikaya, na wense omwe akanati kundiwona nkhope yangu kuthupi. ² Chakulinga changu ni chakuti iwo alimbikisike mu mtima na kuphatizana pabodzi mchikondi telepo kuti akhale na chuma chense chachidziwiso nakuti pakutelepo adziwe, chinsinsi cha Mulungu chomwe chomwe chili mwa Khristu. ³ Mwa iyeyo chuma chense cha nzeru na chidziwiso chidabisiwa. ⁴ Ine ndikukuwuzani kuti aliyense nampodi akunamizeni na mafala yakukukopani. ⁵ Ngakhale kuti ndili lini namwe pabodzi kuthupi, ine ndinamwe pabodzi mumzimu. Apo ndikukomedwa kuwona kuti mukulongosola bzense bwino napo pomwe kuti chikhulupilo chanu mwa Khristu ni chakukhazikika. ⁶ Tsono ninga momwe mudatambilira Khrisu Yesu Mbuya, mupitilize kukhala mwa iyeyo. ⁷ Mukhale wakukhazikika, na wakumangililika kuna iye, na waku khazikka m'chikhulupiro ninga momwe muda mpfunzisiwila, na kuwandisa na kupeereka kutenda. ⁸ Nyang'anisisani pala winango nampodi akutengeni kudzela mnzeru za wanthu na chinyengo, bzomwe bzimbadalila miyambo ya wanthu, na malingiliro ya wanthu wa dziko lapansi neye kuna Khristu. ⁹ Nakuti mwa iye chilichense chikhale chakudzala na thupi la moyo wakuchokera kuna Mulungu. ¹⁰ Nakuti ndimwe wakudzaliwa mwa iyeyo, iye ndiye msolo wa ukulu bwense na utongili. ¹¹ Mwa iye imwepo pomwe mudagwatiwa pa kukhundula chikhalibwe chanu cha machimo neye kuti ni mgwatiwe wakuchitiwa na manja ya wanthu, soma ni mgwatiwe wakuchitiwa na Khristu. ¹² Imwe muda fuchiliwa naye iye mu ubatizo, na iye kulamuka naye pabodzi mwa chikhulupiro m'mphamvu ya Mulungu, omwe adamulamukisa iye kuna kufa. ¹³ Nthawe yomwe imwe mukukhala wakufa mdzakuphonyeka na kusaya kugwatiwa kwa thupi lanu, iye adakupasani moyo pabodzi na iye ndipo ife adatikhululukira bzakuphonyeka bzathu bzense. ¹⁴ Iye adafudza bzakunembewa pabodzi na mfundo zache zomwe zikhali zakutigaza ife ndipo bzidaima kugazana nafe. Iye adatichosela nkukabzikhomela pa mtanda. ¹⁵ Iye adakhundula maukulu na mautongili adawawonesera padecha, nakupambana thangwe la mtanda. ¹⁶ Thangwe lache, munthu aliyense nampodi akuyeluzeni imwe na chakudya pinango chakumwa, pinango kulewa bza nsiku ya phwando, pinango nsiku yakukhala mwezi, pinango bza nsiku Sabata. ¹⁷ Ibzi ni chibvulibvuli cha bzinthu bzomwe bzikhabwela, soma chachadidi chaichoicho chikuoneka mwa Khristu. ¹⁸ Nampodi kubvuma aliyense omwe ambakonda kubzichepesa mwa gunkha na nakupembedzera angelo akutaziseni mu kutambila mphatso. Munthu wakutelepo adalewalewa mwa chadidi bza bzinthu bzomwe ati adabziwona wakubzikuza m'malingiliro omwe mpsauzimu lini pa mfundo zache za pezi. ¹⁹ Waku telepoyo ambataza lini pomwe kuphatizana na mtsogoleri. Omwe ambatsogolela thupi lense lakuzungulira na kumangililiwa pabodzi mu uzingo bwache na m'nomfu; lomwe limbakula ninga momwe Mulungu waperekera. ²⁰ Penu imwe mudafa pabodzi na Khilistu kulekana nabzo bza mzimu wa dziko lapansi, thangwe lanyi imwe mukukhala wakugonjera kuna dziko lapansi: ²¹ ''Nampodi kuphata na manja, pinango kulawidza, pionango kulakhuya''? ²² Bzinthu bzensene bzidza dzongeka pakubzi phatisa basa, pakutengera malamulo nama pfunsiro ya wanthu. ²³ Malamulo yomweya yana mawonekedwe ya nzeru, na kutumikira kwa chifuniro chache na kubzichepesa na kusaya kubzi tengera ku thupi. Soma iwo alibe mphamvu yakugazana na bzakufuna bza thupi.