¹ Paulo, mtumiki wa Khilistu Yesu mwakufuna kwa Mulungu, na Timoteyo dzinza wathu, kuna mpimgo wa Mulungu omwe uli mu akolinto, na wanthu wense wakuchena wa Mulungu wamzinda wa Akaya. ² Chisomo ckhikhale kuna imwe namtendere wakuchokera kwa Mulungu Baba na Mbuya Yesu Khilistu. ³ Mulungu wathu na Baba wathu Mbuya Yesu Khilistu atamandiwe.Iyeni Baba wa chifundo na Mulungu wakunnyamaliza wense. ⁴ Mulungu watinyamaliza ife tense wakusautsika, kuti ife tikanyamalize wale omwe ali mkusautsika. Ife tinyamalize winango na chinyamalizo ndicho Mulungu adaphatisa basa kutinyamaliza ife. ⁵ Ninga mwakubonera kwa khiilstu kutiwandira ife, tenepo kunyamalizana kutiwandire kudzera kwa Khilistu. ⁶ Soma penu ife tini sautsiwa, ni thangwe lachinyamalizo na chipulumuso; penu ife tini nyamaliziwa, ni thangwe la chinyamalizo chanu. Chinyamalizo chanu nichimene chinichitisa kupirira pakubonera komwe ife tikubonera. ⁷ Chidikizo chathu nichakukhazikika pa imwe, nakuti ife tikudziwa kuti imwe mumbayanjana pakubonera, nakuti imwe mumbayanjana pomwe pa kunyamalizana kwathu. ⁸ Tsono ife tikufuna lini kuti imwe mukhale wakusaya kudziwa, adzinza, bza masautso yomwe tidagumana nayo ku Asiya. Ife tidazunzika kwenekwene kuposana na mphamvu zathu, tenepo ife tikhadapsipa moyo. ⁹ Chadidi, ife tikhanacho chisautso chakusala pangóno kufa. Soma bzidatichitisa ife kuti nampodi tikhale na chikulupilo chathu chokha, soma cha pa Mulungu, omwe ambamukisa wakufa. ¹⁰ Iye adatipulumusa ife kuimfa ikulu ninga imweyi, ndipo iye adatipulumusadi ife. Mwa iye ife tidatambira chidikizo chathu chakuti iye adzatipulumusa ife. ¹¹ Iye adzachita bzobzi malingana imwe mungatithandiza ife na mapemphero yanu. Kinangoka azinji adzapereka bzakutenda m'malo mwa ife kuti ife tikatambire kukondewa kudzera na kunamata kwa azinji. ¹² Ife kubzitamandira kwathu mkuku: Umboni bwathu na chikumbu mtima chomwe tinacho tidabzi phatanida tekha kudziko lapansi na nachisomo chakuchena, neye kuti nzeru yakuchokera kuthupi soma ni chisomo cha Mulungu. ¹³ Ife tilibe kunemba chinthu kuna imwe chomwe mulibe kulewenga nakudziwa, ndinacho chidikizo chakuti imwe muni dziwisisa ¹⁴ ninga imwe mumbadziwa kale bzobzi, kuti imwe muda bzitamandira kuna ife pa nsiku ya Mbuya wathu Yesu, naterepo ife tikudza bzitamandira thangwe la imwe. ¹⁵ Thangwe ine ndikhalimbika na bzobzi, chakutoma ine ndikhafuna ndi bwere kuna imwe, kuti imwe mudzatambire chisomo chachiwiri. ¹⁶ Ine ndikhakumbuka kuti ndikufambireni imwe paulendo bwangu bwakuyenda ku Makedoniya. Nakuti ine ndikhafuna kuti ndikufambireni pomwe paulendo bwangu bwaku chokera ku Makedoniya, thangwe la imwe mudandituma ine pa ulendo bwakuyenda ku Yudeya. ¹⁷ Pomwe ine ndidadza kumbuka terepayi, ine ndidadza bzigaza?Kodi ndikukumbuka ninga mwa thupi, ine ndidalewa ''Inde, inde'' na ''neye, neye'' pa nthawe yokha yokhayo? ¹⁸ Soma ninga mwa chikhulipiro cha Mulungu, mafala yathu kuna imwe nampodi yakhale ''Inde'' na ''Neye.'' ¹⁹ Nakuti Mwana wa Mulungu,Yesu Khilistu, omwe silivano, Timoteyo na ine ndidakhala namwe, ndilebe ''Inde'' na ''Neye.'' ²⁰ M'malo mwache, iye nthawe zense ni ''Inde'' Nakuti bzense bzomwe Mulungu adalonjeza bzimbakhala ''Inde'' ²¹ Tsopano ni Mulungu omwe akutitsimikizilara ife kuti na imwe mwa Khilistu, na iye adatidzoza ife, ²² iye adakhazika chizindikiro pa ife na iye adatipasaife Mzimu m'mitima mwathu ninga wakukhazikika kuna bzomwe bzikubwera. ²³ Soma ine ndidachenera Mulungu ninga mboni ya moyo wangu kuti ine ndisaye kubwera ku Akolinto thangwe ine ndikhada kusungira imwe. ²⁴ Ili nithagwe lini kuti ife tikufuna ufumu bwanu bwa chikhulupirilo.M'malo mwache, ife tini khala wakuthandizana namwe chisekerero chanu, ninga momwe imwe mumbaimira pa chikhulupiro chanu.