¹ Pe ahavavuzya, ''nalyoli nkuvavuzya imwe, valipo vamo palimwe ve vimiliye apa vevatalivonja imfwa lwe vatashivonyi ishinamwene isha Mulungu shikwinza namaha.'' ² Lwe gajenda amasiku 6, uYesu ahamusenda u Peteri nu Yakovo nu Yohani ahazuva navo kwi gamba, vavo veka. Pe Uwene ahanduha pilongolela lyavo. ³ Amenda gakwe gahanda ukunyeng'enyela, gahapitilizya uvuzelu, uvuzelu vwe nashimo ishakuzelufizya munshi she shingazelufya. ⁴ Pe u Eliya nu Mose vahavavoneshela, vahayanzyaniaga nu Yesu. ⁵ U Peteri ahamula nukuyanga kwa Yesu, ''Manyisi, shingava shinza kulisye ukjuva panapa, tuzenje amavanza 3, lyoka lyaho, lyoka lya Mose, lyoka lya Eliya.'' ⁶ ( she uwene atazimanyile zye akuyanga, she zyavapeleye ilyoga.) ⁷ Ivingo lihinza nukuvazijila avene. Pe izyi lihafuma mwivingo, ''Uno mwana wane unkundwa, mumutejelezyaje wuyo.'' ⁸ Umwakwivushizya, lwe avene vakwenyeleshezya, pe vatahamwenya nawumo we amile nawo, nkandi weka uYesu ⁹ Avene pe vahihaga igamba, ahavahomeshezya ukuti vatahamuvuzye nawumo zila zye vazivonyi ukufishila pe umwana wa muntu azyusile ukufuma kuvafwe. ¹⁰ Pe vahazisunjilila izyo vavo veka, nkandi abvene vahayanzaniaga vavo veka kwe kuti vuli lelo, ''Azyusile ukufuma kuvafwe.'' ¹¹ Pe vahamuvizilizya, ''Shoni she ava simbi vakuyanga ukuti u Eliya we alitalishila ukwinza?'' ¹² Uwene ahati, "U Eliya we kwe atalishe ukwinza we aliyinia zyonti zyonti, shoni she lisimvilwe ukuti umwana wa muntu ahondeye kuyimba nkani na kwe kumuhana? ¹³ Nkandi kjuvavuzya imwe ukuti u Eliya ayinzile, pe vahamuvomba zyonti zye vahanzaga, ukuyana zye zyasimbilwe izyakwe.'' ¹⁴ Lwe vinzile kuvasundikwa, vahenya impuga impiti yivazyunguliye, vope ava simbi vahadalinkanaga nawo. ¹⁵ Lwe vamwenya u Yesu, impuga yonti yihazunguha pe vahamushimbililaga vahamulamuha wuyo. ¹⁶ Pe ahavavuzilizya ava sundikwa vakwe, ''Shoni she mukudalinkana navo?'' ¹⁷ wumo mumpuga ahamwamula, ''Manyisi, mulesite umwana wane kukwavo . Ali nimpepo ye yikulehaga atakuyanga. ¹⁸ Yikumulemaga nu kumutaga pansi, pe amatatatafula pe gakufumaga mwilomo, akusyanga amino gakwe, nu nkumilila. Nkavalava ava sundikwa vaho ukuti vayefye, nkandi avene vahapotwa.'' ¹⁹ Ahamula, ''Mwe luho ulusita lwitiho, havalilo vuli ahatali he imbanje nimwe> nadi imbajimbilile ukufishila havalilo vuli? mulete kuline.'' ²⁰ Vahamuleta umulumendo kukwakwe. Lwe impepo ya mwenya uYesu, umwaluvilo yihamutaga uku yikumuyinzania. Umulumendo ahagwa pansi na matatafula gahafuma mwilomo. ²¹ Uyesu ahamuvuzilizya uyise, ''Pajenda havalilizyo vuli she ali inza vwevulo?'' Uyise ahati, ''Ukwanda vunsi vwakwe. ²² Mutuvalilo utwinzi yikumuyajilaga pa moto na muminzi pe yikulwisyaga ukumunangania. Nanti ungavomba zyonti zila, twenye uvwila utwavwe.'' ²³ Uyesu ahamwamula, ''Nanti ukwitiha? Vyonti vipepusu kwa wula we akwitishizya.'' ²⁴ Umwaluvilo uyise uwa mwana ahaholela nu kuti, ''Ine nkwitiha! Navwa nukusita kwitiha kwane!'' ²⁵ Lye uYesu ayivwenyi impuga yikuvashimbilila, ahayipilila imepo inkandamanu ahati, ''We bubu niwe mpepo yavwakutwi, nkuvalajila imwe, fuma, mutahinze mumwinjile havili.'' ²⁶ Iyene yihaholela nukumuyinzania nkani umulumendo pe yihepa. Umulumendo ahava inza wula we afuye, pe avinji vahati, ''Afuye.'' ²⁷ Nkandi uYesu ahamulema inyove ahamunyamusya, wope umulumendo ahimilila. ²⁸ Lwe uYesu ayinjiye munyumba, avasundikwa vakwe vahamuvuzilizya ku kwilu, ''shoni she iswe tutayefizye?'' ²⁹ Ahavavuzya ahati, ''Iya muhola uno yitangafuma loli mumputo.'' ³⁰ Pe vahepa pe vamile nukudumunsyania mu-Galileya. Atahanzaga nawumo ukuti amanye kwe vamile, ³¹ she uwene ahavamanyisyaga avasundikwa vakwe. Ahavavuzya, '' Umwana wa muntu avala kulemekwa munyove izya vantu. Pe vakwinza ukumugoga. Pe lwe vamugoga, nanti amasiku gafiha 3 akwinza kuzyuha.'' ³² Nkandi avene vapositwe ukuzimanya zye aziyanzile, pe vahanyila ukumuvuzilizya. ³³ Pe avene vahinza mu kaperinamu. Lwe ayinjiye munyumba ahavavuzilizyab , ''mwayanjizyaniaga mwidala?'' ³⁴ Nkandi vahapuma. She vahadalinkanaga vavo veka mwidala nizya we ali mupiti nkani. ³⁵ Ahatendama pansi, ahavita 12 poka ahavavuzyaahati, ''Uno wonti we akwanza ukuva wakutaliha, we avanje wavumalilo nukuva muvomvi wa vonti. ³⁶ Ahamusenda umwana ahamuviha pakasi pa vavo. Ahamunyatula munyove zyakwe ahayanga kuvavo, ''Wonti we akumuposhela umwana fwe we wumo mwizina lyane we akumposhela ine; ³⁷ Wonti we akuposhela ine we atakumposhela nene nkandi wjula wula we ahantuma ine.'' ³⁸ U Yohani ahamuvuzya, ''Manyisi, tumuvinyi wumo akupilila impepo inkandamanu nmwizina lyaho pe tumulesizye, pakuti atakutulandata iswe.'' ³⁹ Uyesu ahati, ''Mutahamulesyaje, she ataliko nawumo we angavomba imbombo impiti mwizina lyane nukutaliha ukunjanjila vimo ivivivi ine. ⁴⁰ Wonti we atakutuvushila iswe we wakuliswe. ⁴¹ Wonti we akupa ishikombe isya minzi aga kung'wela mwizina lwane she mwe vakwe va chilisiti, nalyoli nkuvavuzya imwe, we atalisovezya ishipambwi shakwe. ⁴² Wonti we angaleha woka mun vansi ava vevakwitiha ine ukupunula, shingava shinza kuli wuyo ukuti ulwala lupiti lupinyiwe munsingo yakwe nukumusumbila mwa sumbi. ⁴³ Nanti inyove yaho yikukupunuzya, uyidumule. Shingava shinza ku kwaho ukwinjila muvulanzi ulemaye ukushila ukuva ninyove zivili nukuvala mwipalazya, mu moto we atalizima nalumo. ⁴⁴ Kwe insivo zyavo zitalifwa , na we moto atalizima nalumo. ⁴⁵ Nanti ishinama shaho shikupunuzya, ushidumule, shingava shinza ku kwaho ukwinjila muvulanzi we mulemazu ukushila uuva ukuva nivina vilim usumbilwe mwipalazya. ⁴⁶ Kwe ninsisin zyavo zitalifwa, na we moto atalizima nalumo. ^{47 48} Nanti ilyinso lyaho likupunuzya, ulifolovole. shingava shinza ku kwaho ukwinjila mushinamwene sha Mulungu ni lyinso lyoka ukushila ukuva na minsoo gavili usumbilwe mwipalazya. Kwe insosi zyavo zitalifwa, nawe moto atalizima nalumlo. ⁴⁹ She wonti alilongwa nu moto. ⁵⁰ Iveya lyinza, nkandi lwe lyasovezya uvuveya, pe ungaligalusya vuli ukuva liveya? Pe muve niveya mulimwe mweka, muvanje nu mutende ku woka nuwamwavo.''