¹ Paulo, mubombi wa Chala sona mufundiwa wa Yesu Kilisitu mulwitiko lwa Chala umusaliwa wa wandu sona namahala ghabwanalolighagho ghakukolelana nu Chala, ² nulusubilo lwa bwumi ubwa bwila nabwilamwa Chala, yuyo atakupika, sho akulaghilana mwo akabalilo kakali. ³ Pakabalilo akisa akafumbula amashu ghake akwendela mukutangasha kuko ingasubila ukufwana nindaghilo sha Chala umupoki witu. ⁴ Kwa Tito, umwana wa naloli mulwitiko lwitu. Ichisa sona nulutengano ukufuma kwa Chala u Tata sona u Yesu Kilisitu umupoki witu. ⁵ Pa fundo iyi ngubaleka ku Kelete, ukuti uye uyanie ififndu fifyo fitamalishiwe sona uye ubapakashe abosongo mufikaya fyoshi isa mumwo ingakulinganikisha uwe. ⁶ Abosongo babaghile ukuti babe bakushita kuyughiwa akabibi kamu, umulisha bamukolo yumuyuwene, nabana balusubiliwa babo tukuyughiwa ubwumi bwa mwalepamu ukushita kupulikila. ⁷ Chibaghile ukuti yuyo akuketelesha isa wi songo wa munyumba ya Chala, ayughiwange kabibi. Atabaghile ukuba mutamye, atakakalalaghe mwalubilo, manye abe bakung,wa ubwalwa atakighane ubulwe atakabe bachinyenywa. ⁸ Mubuyo bwake, abe wakwambilila sona mumanyani wa fyo fyisa. Abe bamahala, mugholofu, mwikemo, sona wakwikola. ⁹ Abe wakukola amashu ubwanaloli isa mwo akamanyililagha, ukuti pamu angaye abakashe abanine nifimanyisho ifyisa sona ukugholosha boshi babo bakususania nawe. ¹⁰ Papo kuli abandu abingi abakusambukila, babo bakuyugha fifyo fita fyamahala sona nabayanja, nganingani babo bakatumiliwa. Chali chisa ukubakanila. ¹¹ Babo bakusutania inyegha nifimanyisho fyakukosha isoni nafyo fitabaghile ukumanyishiwa. ¹² Yuyo umukunguluka wabo akayugha akati, ''Aba Keletibakuba bamyashi utubalilo utwingi, finamanyanaifibibi, abakataabapafu.'' ¹³ Ubwo kamboni ubu bwanaloli. Popapo, mubagholoshe umwakubapwatila, ukuti babe bakugholongana mulwitiko, ¹⁴ mutakabe nafyo nimbombo ifyili fya bayuda pamu indaghilo sha bandu babo bakusanungana ukufuma kubwanaloli. ¹⁵ Kuboshi babo belupite, ifindu fyoshi fyelupite, lole kuboshi babo bayanja sona kubabo batakusubila, nachimo chicho chikwelupa, lole inyinong'ono shabo shoshi sona namabyebye ghabo ghamalite. ¹⁶ Bakuyugha ukuti bamumenye u Chala, lole bakumukana mumbombo shabo. Banyali, bashita kupulikila, sona bashita kubaghila ukubomba ifyisa.