¹ Paulo, umupositoli wakwe Kilisitu Yesu ukupitila mukulonda kwakwe Leza, ukuyanthu yakwe Leza ayalungamane aya mu Efeso, yano ayasuwalikwa yakwe Kilisitu Yesu. ² Uwila kuli mwemwe nu mutende ukufuma kuli Leza Tata witu na mwene Yesu Kilisitu. ³ Achindikwe Leza na Tata wakwe Mwene witu Yesu Kilisitu, wino watupepela nipepo lyonsi ilya mupasi mumasyo aya mwiyulu muli Kilisitiu. ⁴ Leza wasozile sweswe muli weliwe ukufuma pa nthandiko yansi, ukuti tungaya sweyatele nukuya ayawula uwononyi pa manso yakwe mu lukundo. ⁵ Leza watupekanyizya sweswe ukuti tupochelelwe ngati sweyana ukupitila muli Yesu Kilisitu, ukulingana nukulonda kusuma kwaku londa kwakwe. ⁶ Uwufumo wakupekanya kwitu pakukwezya kwa wuchindikwe wa wila wuno watupile muwusapuke muli wenga wino wamukunda. ⁷ Muli Yesu Kilisitu tuli nu wupusuko ukupitila muwazi wakwe nukutetelwa kuwuyipe witu, ukulingana nuwu kankhala wawila wakwe. ⁸ Wavuzizye uwila wakwe kuli sweswe na mano wonsi nu kuvwichisya. ⁹ Leza walesile yamanyikwa kuli sweswe inkhama yakulonda kwakwe, ukulingana na vino vyamusechelisye na vino walanjizizye muli Kilisitu, ¹⁰ nukulola kuwupekanyo pa kukwanisya kukwanisya kwa nsita, ukuleta ivinthu vyonsi ponga, ivinthu vyonsi ivya mwiyulu nu munsi, pansi pa mutwe wonga, na Kilisitu kwene. ¹¹ Muli kilisitu twasozilwe ngati sweyapyani, Watwelenganyizizye ukulingana nukulonda kwakwe wino akawomba vyonsi ukuyana nukulonda kwakwe. ¹² Leza wasozile sweswe ngati swe yapyaniukuti sweswe, sweyano sweyakutalika mwisuwilo muli Kilisitu, chingaya ichakutayizya pakuchindikwa kwakwe. ¹³ Muli Kilisitu, namwekwene, lino muvwa izwi lya chumi, izwi lya kupusuka kwinu, mwasuwile muli weliwe nupya vyayazilwe numupasi uwutiswe uwusimichile, ¹⁴ aweni wino ipangano lya mpyani yitu mpaka ukusapulwa kuli vino viliko, pakutayizya kwa wuchindame wakwe. ¹⁵ Palandu wuu, ukufuma pano nuvwile ukuyana nisuwilo linu muli mwemwe Yesu nulukundo lwinu ku yanthu yinu wonsi ayatiswe, ¹⁶ nthalesilepo ukutayizya Leza kuli mwemwe ngati vino nawatambwile mwipepo lyane. ¹⁷ Nkupepa kuli Leza wakwe mwene witu Yesu Kilisitu, Tata wa wuchindame, aliwaapela mwemwe umupasi wa mano nu wawuwumbulo mumano yakwe. ¹⁸ Nkhupepa ukuti amanso ya myenzo yinu yawale, ukuti mungamanya isuwilo kuli chino awamile mwemwe ni chuma chapyani cha wuchindame wakwe pa yanthu wonsi ayatiswe yakwe Leza ¹⁹ Mumapeso yane yane nkhalenga ukuti mungamanya uwukulu wa maka yakwe ayakukolanya kuli sweswe sweyano tukasuwil, ukulingana nimiwombele ya yawukulu wakwe. ²⁰ Yano amaka ayaliyamwi na yano Leza wa womvile muli muli Kilisitu pano wamuzusizye ukufuma kuwufwe nukumuteka kukasa lyakwe ndilo mumasyo ya mwiyulu. ²¹ Wamutesile Kilisitu papela nkhani pa wuteko wonsi na maka nukuti aliteka ninsi yamunkholelo, ni zina lyonsi lino likwamwa. Kilisitu aliteka, asamunkhulo yikwene yitupu, kwene na munkhulo yino yikwiza. ²² Leza wayika ivinthu vyonsi pansi pa matamba yakwe Kilisitu nukumupa weliwe kung'anda yamapepo ukuya umukalamba pa vinthu vyonsi. ²³ Ing'anda yamapepo umwiliwakwe, ukuzula kwakwe wino akazuzya vyonsi muli vyonsi.