¹ U Pauli, umubonvi uwa kwa Leza kabili ukasambilizya wakwa Yesu Kilisitu abantu bobakasebwa ukulingana ni chetekelo cho nu Leza cho chikulingana nu kumuchindika, ² ni chichetekelo ichakukwata ubumi ubwa muyaya ukufuma kwa Leza, we atakubepanga, akalaya inkulo zyonsi lyo nimpindi yitani yibeko. ³ Pampindinye iyiyane, akalangizya amazwi yache ukwendela mu shimikila mu yo inkapwa ukulingana na masundo yakwa Leza ukavwa. ⁴ Kwiwe Taitasi, we muntu tuli ni chetekelo chili choka. Ubwila nu mutende ukufuma kwa Leza Umukwasi nu Kilisitu Yesu ukapususya wetu. ⁵ Mu nchito yonye yo cho Nkakulela mu ayilandi aya Cretan, ukuti ubike ivintu ichete vyo vitani vimale ukubombwa nu kusala abasongo muma tauni monsi ulingana namo nkakulanganizya. ⁶ Usongo atafwile ukuba uwa kuchita ivintu ivibipe, umuntu uwa mwanakazi weka, wakweti abana abakuyichefya boba takubabika ukuti batakwivwila nanti ukuyilekelezya. ⁷ Vilondwa ku muntu weyentunguluzi, ukubanga nga weka tungulula wa nyumba yakwa Leza, ukuba uwa kana uchita ivibipe. Atafwile ukuba uwa kulandikisya, nanti uwa kufulwa bwangu, we techakolwa, nanti uwa lombwa nanti uwakuyitemwa. ⁸ Afwile ukuba we kapokelela, uwakutemwa ni chimyamya, we alichete mumano, umololoke, uwa muzilo, uwakuyikania weka ukuchita ivibipe. ⁹ Afwile ukwikalila nkani mumazwi aya chichetekelo yo bakamusambilizya, pakuti akoselesyanjeko nabanyabo nu kusambilizya ukwachisinka nu kubwezya boba ku kana amazwi ya kwa Leza. ¹⁰ Pakuti kuli abantu abavule boba bakananga izwi lya kwa Leza, boba bobakunena ivintu ivya muselu nu kulwisya ukufumya abana bakwa Leza ku chinso cha che, nkani nkani bala bobakapotulwa. Chikayana ukubalesya. ¹¹ Bakuluvyana inkulo zyonsi mumisambilizizye amabipe vyo batafwile ukusambilizya. ¹² Yumo ukukasema wabo akati, '' Aba Cretani bakaba babufi, sona ivinyamana vya bwaka bwaka, abamilikisye. ¹³ '' Ukusimikila ko kwa chisinka. Cho, chikulondwa ukubakalipila, ukuti ichichetekelo chabo chi wome, ¹⁴ batakuposangako namano ku ba yuda abakakoma olo kumasundo yaku bantu boba kufumanga kuchisinka. ¹⁵ Kwabo bonsi bobeba pwililike, nivintu vyonsi vye vipwililike. Ukweni ku abo bobali mulu bembu nu kukana ukuzumila, pate ichipwililike pababo, ukweni bonsi amano yabo ni myelenganizizye yili yalubembu. ¹⁶ Bakuyipanganga ukuti bamenyi u Leza, ukweni bamukananga mu vichitwa vyabo. Abo bonsi aba lupato, ichilumba, nabo batangaba na chimo ichizima.