¹ Mwe banabane nabalembela vyoo, pakuti mutakananganje. Ukweni ndi yumo abembuka, tukaba nu Yesu Kilisitu ukavwa witu, uweni we mulungamane. ² We akayitula pa membu zitu, kabili tevyakubipa vitu vyeka, lelo nivya bantu banji munsi yonsi. ³ Tungati tukamumanya, ngatu konka amasundo yache. ⁴ Yumo ndi akuti ''Inkamumanya u Leza'' lelo atakunko amasundo yache lyo wabufi, ni chisinka lyo chite mwa yuyo. ⁵ Ukweni we a kwivwila amazwi ya kwa Leza, mwa yuyo lyo ukutemwa kwa Leza kuli mu moyo wache ukufikapo. ⁶ Wensi we akulandanga ukuti akaba nu Leza, afwile ukuba ni myata ngati we Yesu. ⁷ Mweba temwika, Ntamilembile amasundo ayapya, ukweni yema sundo ayakali yo mukabanga nayo pakutalika. Amasundo ayakali yo ye mazwi yo mukivwa. ⁸ Nomba Nkumilembela isundo ilipya, yo ya chisinka mwa Yesu na mwimwe, umulandu wakuti imfinzi yikuya yikumala, nu luswepo ulwenencho lukuzimikila. ⁹ Wensi wakuti inkaba muluswepo ukweni akapata umunyina achili ali mumfinzi na nombanye. ¹⁰ We akatemwa umunyina akaba muluswepo mo mwa yuyo mutakaba nanti chimo cho chingalenga ukupotwa. ¹¹ Ukweni we akapata umunyina alimumfizi nu kwenda akwendanga mumfinzi; ata menyi nakwa kuya mo imfinzi yimwiyalile aminso yache. ¹² Nkumilembela imwe, mwebana bane, pakuti mukatetelwa kumembu zinu umulandu wizina lyache. ¹³ Nkumilembela imwe, mwe bakwasi, pa mulandu wakwati mumu menyi wakabako ukufuma pakutalika. Namilembela imwe, mwe bana abatini, umulandu wakuti mukachinvya ivya kwa chiwa. Namilembela imwe, mwebana, umulandu uwa kuti mukamumanya umukwasi. ¹⁴ Namilembela imwe, mweba kwasi umulandu wakuti mumu menyi wakabako ukufuma pa kutalika. Namilembela imwe, mwe bana, umulandu wakuti mujimbite, na mazwi yakwa Leza yali mwimwe, muchinvizye navya kwa chiwa. ¹⁵ Mutakatemwe ivy munsi olo ivintu ivya munsi. Ndi yumo atemwa insi, lyo ukutemwa kwa mukwasi kute mwa yuyo. ¹⁶ Mo vyonsi ivintu ivya munsi, pakuti ulunkumbwa lwaminso lolubipe ni chilumba icha vyuma, vitafuma kwa mu Kwasi lelo vya munsi. ¹⁷ Insi na vyo vili mwenemo vilenda. Ukweni wakuchita ukulonda kwa Leza alikala umuyaya. ¹⁸ Bana bane, yo ye mpindi iyakulekelezya. Ngati vyo mukivwila ukuti umulwani uwa kilisitu alimukwiza, na nombanye abalwani bizite. Pavyo mwa manya ukuti impindi yili mukufika. ¹⁹ Abo beba lwani bobakiza bafuma kwiswe, lelo batakalinji niswe. Nga cha kuti bakalinji niswe lyo bakasyala niswenye. Lelo bakiza babuka, cho chikalangizya ukuti batakafuma kwiswe. ²⁰ Ukweni imwe musubwizwe nu Muzimu, nu manya mukamanya mwensi. ²¹ Ntabalembele imwe umulandu wakuti mutamenyi ichisinka, ukweni mumenyi umulandu wakuti ichabufi chitafumanga ku chisinka. ²² Uwa bufi weweni we uyo wakukananga ukuti u Yesu te Kilisitu? Uyo umuntu wakukananga ukuti Umukwasi nu Mwana wemulwani wakwa Kilisitu. ²³ Wensi wakukananga umwana akaba nu wise. Wensi wakuzumila umwana lyo akaba nu Wise. ²⁴ Po imwe, lekani vyo mukivwa pa kutalika vikalile mwimwe. Nga chakuti vyo mukivwa pakutalika vikalile mwimwe, muliba ba kwikalila Mwana na Mwa mukwasi. ²⁵ Vyoo vyo vyevilayano akatupa iswe-nu bumi ubwamuyaya. ²⁶ Milembile vyo imwe po pakuti boba londa ukuti muye ichilumbizi. ²⁷ Po imwe, ukusubwa ko mukapokelela ukufuma kwa yuyo wikalile mwimwe, mutafwile mulonde na yumo ukuti amisambilizye imwe. Ukweni imwe mukasubwa nu kusambilizya kwache imwe vyonsi vya chisinka tevya bufi, ukulingana namo mukasambilila, ukuti mwikale mwa yuyo. ²⁸ Nomba, bana bane, mwikalile mwa yuyo ukuti po aliloleka mutakize musebane pa kwiza kwache. ²⁹ Nga cha kuti mumenyi ukuti we muswepe, mukamanya ukuti ali wensi waku chitanga vyo vili ichete lyo akapapwa kwa yuyo.