¹ Wende kama me kan bang ti ta lishaarimu kama, nennaa kaman shar tira peddi mei kan bangum, longku kaman shau shinui ti ta kenni bangju. Birang mo kama wessho shuk nyimmo leu kui. ² Shero mo koo nong ti shakkimu kama, mo twaalo shaarino molli, longku sha toomni, birang kan kpirin ka lishaarinii. ³ Longku koo Kiriti maa a twaalo shaarinim, Kaa ye ballii ya, "Kuwak-kuwak me ti yuuko kuwak, shinui shiga ti kuuno." ⁴ Longku wee ballaa ding milam ti ta Balilan paarono Yamma balilai longku in shupponmun kama, longku kaman yoomu kan lishaari ti piree kan kurmani kan pee-shik me Balilan paarono Yamma minaamu kama. ⁵ Shero mo Yamma shi mo an min kurmani kan pee-shik, mo warin man ye ma ta kumani kan shaayi ti ta koddi ye ma ti ku yiu bi temono Kiriti Yeesho. ⁶ Yaani kaa te, ma ding ma ta yooma fok ma dok, kan nyimmoma dok birang, man ti min gba ti Yamma mo shii Fono Fo-minamu kama Yeesho kiriti. ⁷ Ma yiu shaayi kira palau-palau kaa ye Kiriti yikkan man kira palau-palau, longku man li in min gba ti Yamma. ⁸ Longku ne ti ku teuma na, wee liyaa Kiriti in yooni mo an shuran ti Yawudaawa, tenei longku in shuk kulli keman paarono Yamma, birang in peni ka deewanku ye yuwaa ti shik ma shiimu kama, ⁹ birang longku mei Yawudaawam in kum-pinno Yamma ka longku kunnguni. Kaa ye ballii ya, "Longkuuno te, ai Fo-mina, ne ta kum-pirko ti shakki memme mei Yawudaawam, kan nen ya vonak kum-piri ti shommoko." ¹⁰ Birang ballii ti ta paarono Yamma ya, "Gbaa ma mei Yawudaawam, ma yu beere kan memmeno Yamma." ¹¹ Birang in tokko shaari ya, "Ma kum-pinno Fo-mina, ma mei Yawudaawam ding, shero mo memme ding kum-pirnii." ¹² Birang Isheya in tewi ya, "Mondok ti ta po peenno Jesshe ta peru, ta illani in ya gub mei Yawudaawam; ti taanii mei Yawudaawam ta we lishaari." ¹³ Shero mo Yamma mo an waru ka lishaari mo min ma twaalan lishaari kping kan kuttan shaari ta koddi ye ma ti ku kumani kan shii. Yaani kaa te ma ta yooma kan keman li shaari ti piree kan shoomno Yamma ¹⁴ Ma molonno, ne po kuuno ne kunnga ti ku ye ya ma po kuuma, ma kemii ka kpang kan ma kemii ka penani kping, ye ma fooraa shuppon ma molon ma. ¹⁵ Pene ne ti ku baliloma babaj-babaj, ti ku wee ne yen dokkulang nen nyimmoma jiyeejui, Ne yuwaa tei longku kunngu te ye Yamma yuunano. ¹⁶ mo liyaano nen yoono mo an shuranno Kiriti Yeesho ti mei Yawudaawam. Ne ti ku ya shuran Ankpaa ti piree kan shuran kpaalo po shinnyi Yen Tomonno Yamma, longku mei Yawudaawam in yooju ding we kurani ye Yamma ta yiwani, Me shaanaa shinui ka shoomno Yamma. ¹⁷ Longkuuno te, ne ta dum ya tabang-tabang ti taano Kiriti Yeesho ka longku shuran ye ne ti ya ti Yamma. ¹⁸ Ne ta ya bang vurum nen ya manni weim, nang bara wee Kiriti yuwaa ti piree kan ne. We tene, tei ye wanna ka mei Yawudaawam kan min gba ti Yamma, ti piree kan pa-paaro kan shuran-shuran, ¹⁹ ti piree kan kumen temo kan we maam, shin dingii ti piree kan kumennno Yamma. Tenei ye we yinna ti Urshaliima ne kpomlaa buk we war Illirikum nen ti kpaalo po Shinnyi Yen Tomonno Kiriti, ye nen kem shuran te ding. ²⁰ Koo dimin, nyimmono nen ya kaawi Shinnyi Yen Tomon, ti piree ding a penon Kiritim, longku yo in yooro ya, ne ti ku ya diyei ti ku kel ye manni niyoi teraa. ²¹ Kan ye kaa teerei, nang bara kaa ye ballaan ya, "Mei yuun paaro ti shinui ka longkuunim, shinui ta we shiknii, birang mei yaarom, shinui ta jemlani." ²² Longkuuno te, tenei wee beelaano sho gbe nen waru shik ma. ²³ Pene wende, ne fuwaa po fu shuranno ti po tene. Kaa ye wei kaa te sheniraa gbe ye ne leka waru shik ma longku nen kaa ma, ²⁴ Ne nyimma waraa kaa ma wende. Ne ti ku bengo, koddi ye ne ta koono war buk Ashbaaniya, ne ta yirino shik ma, kulang nen yuuma kaa. Ne ti ku bengo birang, ka bi ye ne shuwaa tomon diyani kan ma po koddi la-wiiu, ne ta shuun toom ka mereno we war won gale kan deewo-gun ma. ²⁵ Wende ne ta war Urshaliima longku nen wanna ka shawo ti me an balla me ti po teere. ²⁶ Me an balla me ti Makidooniya kan me shinui ti Akaaya, shinui shuwaa tomon min kunngu longku shau me shinui kan kenni ti shakki me an balla me ti Urshaliima. ²⁷ Shinui shuwaa tomon yaani kaa te, kaa ye kulli, tenei yuwaaro shari ti kuujui. Kaa ye mei Yawudaawam shinui weyaa po aa kpang shoom ti piree kan me Yawudaawa, shigero kaa jan ti piree shinu ye shinui ta yuun shuran ka kpangju she ku-buk, longku shinui in anngo wee poshaari Yawudaawa leka. ²⁸ Longkuuno te, ne maa fuwaa shuran te, ne penaa birang ye ya ne minaan shawo te ye minnan ti shinui ka longkuujui, ne ta yiu koko Ashbaaniya, birang nen wanna ka kaa koddi ye ne ta koo won. ²⁹ Ne penaa ma nei wanna shik ma, ne ta warui ka keman kpangno Kiriti. ³⁰ Ma molonno, longkuuno Fo-mina mu kama Yeesho Kiriti kan birang ti bi lewan ye shoom ti mini, ne ta beng ma na, ma shauno ti ta dab-dabno ti piree kan fur-fok ti Yamma longkuuno. ³¹ Ma fur-fok, longku nen we shasshani ti kira mei an ballam, me ti ta kpakan po-buk Yawuudiya, birang longku shawoi ye ne ta minani ti Urshaliima in yooro we yiwani ti piree kan me an balla me ti po teere. ³² Yaani kaa te, maa lewannno Yamma, ne ta foottu shik ma ka beere-beere, birang nen we nesshani kan ma. ³³ Shero Yamma mo an waru ka kuttan shaari, mo yiu ma shik ma ding. Mo yooro kaa te.