¹ Polelo tubaghile tuteghelezye nkhani ukuya munthanzi ku vyo twivwa, ukuti tutakafumeko ku ichi. ² Pakuti pala inthumi yo yikaneniwa ukwendela muba nthumi yikaba yisubaliwa, po bo baleka ukukonka indaghilo nukuleka ukwivwila bakapokela ulufundo, ³ Polelo tungafumamo bulibuli pala tukukana ubupoki? Ubupoki bubo bo bukaneniwa nu Mwene nu kukwanilisya kukwitu nabo bo ba kabwivwa. ⁴ umwakuyana bwaka U Chala akasimikizya ivi ukwendela mu vimanyikwilo, mu viswigho, sona namu vyamaka ivyakulekanalekana, na pakugaba ivya bupi vya Muzimu U muswepu ukuyana nu bwighane bwache, ⁵ Pakuti U Chala atakabapa aba nthumi ubulaghilo ubwa chisu cho chikwiza, cho tukuchinena. ⁶ Mumalo mwache, yumo imililepo ubukaboni kumo, ukuti, ''Munthu buli, yo ubikileko amahala? Pamo umwana wa munthu, yo ukumusungilila? ⁷ Ukapanga umunthu panandi ukulusya aba ndumi; ukamuvwika imphumphu ya ubuchindamu ni ntchindi. ⁸ Ukabika chonsi pansi pabulamulilo bwa vinama vyache,'' pakuti kukaba kokukwache ko U Chala akamulekela ivinthu vyonsi. Atakaleka nachimo cho atakamupa. Loli ulu tutakulinga nachimo cho bakamupa. ⁹ Loli tukamulinga pa kabalilo akanandi akisiwa ukulusya abanthumi, Yesu, akavwikiwa nu buchindamu sona ni ntchindi chifukwa cha kuyimba ninfwa yache, ukuti muchisa cha Chala ayezye infwa ya munthu wensi. ¹⁰ Pakuti chikaba chakwenelela nu Chala, pakuti chilichonsi chilipo chifukwa cha yuyo nukuti mumwache asendele abana abinji ku buchindamu Chikwamwenela umwene ukumubika ukuba mwenentcho wa bupokwa ukuba mugholosu ukwendela mukuyimba kwache. ¹¹ Pakuti bonsi we akuswefya sona nabo baswefyiwe kale bakufuma kulikoka. Po atakukoziwa insoni pakubitizya ukuti ba wamwitu. ¹² Akanena, ''Inthi ndumbilile izina lyako kuba wamwitu, Inthi nimbe izyako mukasi muchibukatila.'' ¹³ Po sona, ''Nkhwizukusubalila mumwache.'' posona, ''Linga, ndipano sona na bana bo U Chala amphile .'' ¹⁴ Polelo pakuti abana bagabana ku mubili nu daba, akagaba muvinthu ivyonyene, ukuti ukwendela munfwa akomanie yo ali namaka panfwa, yo, we satana. ¹⁵ Vikaba ngati ubunye ukuti asatule bonsi bo bakoghopa infwa bakikala imyoyo yabo yonsi mubuzya. ¹⁶ Nubwanaloli te ba nthumi bo akubavwa, loli ulunyungu lwa Abulahamu. ¹⁷ Pakuti vikabaghila umwene ukuba ngati ba wamwabo munzila zyonsi, ukuti abe muputi usongo wachisa sona wakusubaliliwa poka nivinthu vya Chala, nukuti abe chakwiyipa cha kuhokela imbibi zya banthu. ¹⁸ Chifukwa U Yesu umwenentcho akayimba nu kuyesiwa, akukwanisya pakwavya bo bakuyeziwa.