¹ बा ठाउँके छोडके यर्दन नदीयाके पार यहुदियाके इलाकामें येशू गव और भीड़ बाके ठिन इकट्ठा भए, और बाको रीति अनुसार बिनके फिर शिक्षा दै। ² फरिसी बाके ठिन आए बाके परिक्षा करके पुँछी, “का कुई आदमी अपनी बैयरके सँग छुटपत्तर करन ठीक हए कि ना ? ³ बा उनके जबाफ दैके कहि, “मोशा तुमके का आज्ञा दै हए ?" ⁴ बे कहिं, “एक छुटपत्तर लिखके आदमी अपनी बैयर छोड्न मिलत् हए करके मोशा अनुमति दै हए ।” ⁵ तव येशू उनसे कहि, “तुमरो मनको कठोरता के करन बा तुमरे ताहिं जा आज्ञा लिख्दै। ⁶ तव सृष्टिके सुरुसे परमेश्‍वर उनके नर और नारी करके बनाई हए। ⁷ जहे कारन आदमी अपन दौवा-अईया छोडके अपनी बैयर सँग मिले रहत हयँ, ⁸ और बे दुई जनी एक शरीर हुईहएँ । बे फिर दुई नाए, पर एक शरीर होत् हएँ । ⁹ जहेमारे परमेश्‍वर जौनके एकसँग जोड़ी हए, आदमी बाके न छुटामएँ ।” ¹⁰ घरमें होत चेला फिर जाके बारेमें येशूसे पुछिं। ¹¹ बा उनसे कहि, “जौन अपनी बैयर सँग छुटपत्र करके दुसरे सँग बिहा करेहए, बा उनके बिरुध्दमें व्यभिचार करेहय। ¹² और अगर बैयर अपनो लोगासँग छुटपत्र करके दुसरे से बिहा करहए, बा व्यभिचार करेहए।” ¹³ "आदमी" "छोटे बाल बालिकन के येशू छुई देबए कहिके बाके ठिन ल्याइँ, तव चेला बिनके डाँटी।" ¹⁴ तव जा देखके येशु दिक्कइ गव, और उनसे कहि, “छोटे बाल बालिकनके मेरे ठिन आनदेव, बिनके मत रोकओ, काहेकि परमेश्‍वरको राज अईसिनको हए। ¹⁵ नेहत्य मए तुमसे कहत हौं, जौन परमेश्‍वरको राजके एक छोटो बालक जैसो ग्रहण न करेहए बा कतै भीतर घुसन न पयहय।" ¹⁶ और बा उनके गोदिमे लैके बिनके उपर अपन हात धरके आशीर्वाद दै। ¹⁷ येशू डगरमे जात रहए, एक आदमी दौड़के आएके बाके अग्गु घुप्टा पड्के, और बासे पुँछी, “हे अच्छो गुरु, अनन्त जीबन पानके ताहिं मोके का करन पडैगो ?" ¹⁸ येशू बासे कहि, “तए मोके काहे अच्छो कहत हए ? एकय परमेश्‍वर बाहेक और कोई अच्छो न हय। ¹⁹ तए आज्ञा त जानत् हए, तए हत्या मत् करए, व्यभिचार मत् करए, मत चूरैये, झुटो गबाही मत दिए, मत ठग्गिए, अपन दौवा और अईयाके आदर करिए।” ²⁰ और बा बासे कहि, “गुरुज्यू जा त सब मए मेरे जमानीय अबस्थासे पालन करो हौं ।" ²¹ येशु बाके देखि, और माया करके कहि, “तिरमे हबए एक बात और कमी हए। जा, और जो जीत्तो हए बेचके और गरीबनके दे, और तोके स्वर्गमे सम्पति मिलैगो। और आएके मिर पीच्छु लाग।" ²² तव जा बातसे बाको चेहेरा उदास हुईगव, और बा दुखित हुईके गईभव, काहेकि बाकेसँग बहुत धन-सम्पति रहए। ²³ और आसपास देखके येशु अपन चेलनसे कहि, “धनीके परमेश्‍वरके राजमे घुसन कित्तो अग्ठो हय।" ²⁴ बाकी कहि भई बातमें चेला अचम्मो मानी। तव येशू फिर उनसे कहि, बालक रेऔ, धन-सम्पति उपर भरोसा करन बारेनके परमेश्‍वरको राज भीतर घुसन कित्तो अग्ठो हय। ²⁵ धनी आदमीके परमेश्‍वरके राज भीतर घुसनसेत बलुक सुईंके भारसे ऊँटके छिरन सहज हए।” ²⁶ बे गजब अचम्मो मानी और बासे कहिं, “तव अईसे कौन बच्पय हय ?" ²⁷ येशू उनके देखके कहि, “आदमीके ताहिं जा असम्भब हए, और परमेश्‍वरके ताहिं न हय, काहेकि परमेश्‍वरके ताहिं सब बात सम्भब हय।" ²⁸ पत्रुस बासे कहि, “देख, हम त सब छोडेहएँ, और तुमर पीच्छु लागेहएँ ।” ²⁹ येशू कहि, “नेहत्य मए तुमसे कहत हौं, जौन मीर ताहिं और सुसमाचारके ताहीं घर और ददा-भैया, दीदि-बहिनिया, औ अईया दौवा, औ लौंड़ा-लौंड़िया और जगहा जमीन छोडैगो, ³⁰ बा सतावट के सँगैसँग सय गुणा जद्धा घर, ददाभैया, बहिनिया, अईया, लौंड़ा-लौंड़िया और जगहा जमीन जहे समयमे पाबैगो, और आनबारो समयमे अनन्त जीबन ³¹ तव बहुत अग्गु होनबारे पिच्छु, और पिच्छु होनबारे अग्गु हुईहएँ ।” ³² बा यरुशलेम घेन जात रहए, और येशू उनके अग्गु अग्गु नेग्त रहए । चेला अचम्मो मानी, और पिच्छु पिच्छु आनबारे घबराइ गय रहएँ, तव बा बाह्रओं चेलनके फिर एकघेन लैजाएके अपने उपर पड्नबारी बात सुनाई। ³³ बा कहि, “देखओ, हम यरुशलेम घेन जात हएँ । हुवाँ आदमीक पुत्रके मुखिया पुजारी और शास्त्रीके ठिन सौंप देहएँ, और बे बाके मृत्युदण्ड देहएँ, और अन्यजातिनके हातमें सौंप देहएँ । ³⁴ औ बे बाके मजाक उडाए हएँ और बाके थुकङ्गे और बाके कोर्रा लगाए हएँ और बाके मर हएँ और तीन दिन पिच्छु बा फिर जिन्दा हुई जयहए। ³⁵ जब्दियाके दुई लौंड़ा, याकूब और युहन्ना बाके ठिन आएके कहिं, “गुरुज्यू, हम तुमसे जो मागंगे तुम हमर ताहिं करदीओ कहिके हमर इच्छा हय।" ³⁶ बा उनसे पूँछी, “तुमरे ताहिं मए का करदेऔं तुमर का इच्छा हए ?" ³⁷ बे बासे कहिं, “तुमर महिमामे हम मैसे एक जनीके, तुमर दहिना घेन, और दुसरेक, तुमर दिबरा घेन, बैठन पामएँ करके मँजूरी हमके देबओ।” ³⁸ तव येशू उनसे कहि, “तुमका मागत हौ बा तुम ना जानत् हौ। का जौन कटोरा मए पिहौं, बा तुम पी पैहौ ?” और जौन बप्तिस्मा मए लओ हौं, बा बप्तिस्मा तुम लएपय हौ ?" ³⁹ बे उनसे कहिं, “हम सिक्डारंगे।” येशु उनसे कहि, “जौन कटोरा मए पीत हौं बा तुम पिबैगे, और जौन बप्तिस्मा मए लओ हौं। बा बप्तिस्मा तुम लेबैगे। ⁴⁰ पर मिर दहिना घेन और मिर दिब्रा घेन बईठन त मए ना देहौं, जा त जौन-जौनके ताहिं तयार हुइरहो हए बिन्ही के ताहिं हए।” ⁴¹ जा सुनके दशौं जनी चेला याकुब और युहन्ना से दिक्काए गय। ⁴² तव येशू बिनके अपने ठिन बुलाएके कहि, “तुम जानत् हौ कि अन्यजातिनके उपर शासन करन बारे उनके उपर अख्तियार चलात हएँ। और उनके बड़े बड़े बिनके उपर अधिकार चलात हएँ । ⁴³ तव तुमरमें अईसो ना हुईहए। तव तुमरमे जौन बड़े होन इच्छा करत हए बा उनको सेवक होन पडैगो। ⁴⁴ और तुमरमे जौन पहिलो होन इच्छा करत हए, बा सबको कमैया होन पडैगो। ⁴⁵ काहेकी आदमीको लौंड़ा सेवा पानके ना, पर सेवा करन और बहुतनको छुटकाराको मोलके ताहिं अपन प्राण देनके आव हए। ⁴⁶ तव पिच्छु बा यरीहोमें आव, और बा अपन चेलन और भारी भीडसहित यरीहोसे निकरतत पेति, तिमैक लौंडा बारतिमै, एक अन्धरा भिखारी रहए, डगर किनारे बैठो रहय। ⁴⁷ जब बा नासरतको येशू हए कहिके सुनी, तव चिल्लाएके बा कहन लागो, “हे येशू दाऊदको पुत्र, मिर उपर दया कर।" ⁴⁸ तव बहुत बाके चुप लाग कहिके डाँटी। तव बा और गजब जोडके चिल्लान लागो, “हे येशू दाऊदको पुत्र, मिर उपर दया कर।” ⁴⁹ तव येशु ठौंड रुकिगव और कही, “बाके बुलओ।” और बे बा अन्धराके अइसे कहिके बुलाईं, “हिम्मत कर, उठ्, बा तोके बुलात हय।" ⁵⁰ और अपनो चाद्दर फेंक्के बा तुरन्त उठीगव और येशूके ठिन गव। ⁵¹ येशू बासे कही, “तए का चाँहत हए, मए तीर ताहिं का करौं ?” बा अन्धरा आदमी बासे कही, “रब्बी, [गुरुज्यु] मए देख पामौ।" ⁵² और येशू बासे कही, “तए अपन डगर लाग। तिर विश्‍वास तोके अच्छो करीहए।” तव बा तुरन्त देखन लागो, और डगरमें येशूके पीच्छु पीच्छु हुइलैई।