¹ जा परमेश्‍वरको पुत्र येशू ख्रीष्टको सुसमाचारको सुरुवात हय। ² यशैया अगमबक्ताके किताबमे अइसो लिखो हए' ''देख, मए मेरो दूतके तिर अग्गु-अग्गु पठामङ्गो, जौन तेरो डगर तयार करैगो। ³ उजाडस्थानमे एक जनी चिल्लान बारोको आवाज, परमप्रभुको डगर तयार करओ, बाको डगर सुध बनाओ।“ ⁴ बप्तिस्मा देनबारो यूहन्ना पाप मिटानके ताहीं मन बदलनको बप्तिस्माको प्रचार करतय उजाडस्थानमे देखाइ दई। ⁵ सबय यहूदिया देश और यरुशलेमके सबए बासिन्दा बिनके ठिन निकरके आइगए और बे अपन अपन पाप स्वीकार करतय बिनसे यर्दन नदियामे बप्तिस्मा लैं। ⁶ यूहन्ना ऊँटको बारसे बिनो लत्ता पैंधत रहए, और करेहाँवमे खलरी को फेंटा बाँधत रहए, और टिंढा और बनको शहत खात रहए। ⁷ बा अइसे कहातय प्रचार करी, ''जौन मोसे पिच्छु आबैगो, बा मोसे शक्तिशाली हए, तव लोहोक्के बाको जूताको तनी खोलनको योग्यको मए न हऔं। ⁸ मए तुमके पानी से बप्तिस्मा दओ हौं। पर बा तुमके पबित्र आत्मासे बप्तिस्मा देबैगो। ⁹ अब बे दिनमे येशू गालिलके नासरतसे आओ , और यूहन्नासे यर्दन नदियामे बप्तिस्मा लै । ¹⁰ पानीसे निकरके आतए खिना बा स्वर्ग उघरो, और पबित्रआत्मा कबुतरके रुपमे अपन ऊपर उतरत देखी। ¹¹ तव स्वर्ग से अइसो एक आवाज आओ, ''तए मिर प्यारो लउँडा हए, तोसे मए गजब खुसी हौं। ¹² पबित्र आत्मा बाके तुरुन्त उजाडस्थानमे लैगौ। ¹³ भूतद्वारा सतावट पाएके बा चालिस दिन उजाडस्थानमे रहो । बा जँगली जनावर संग रहो और स्वर्गदूत बाकी सेवा सत्कार करीं। ¹⁴ अब यूहन्ना पक्रडाव पड्के पिच्छु परमेश्‍वरको सुसमाचार प्रचार करतय येशू गालीलमे आओ। ¹⁵ बा कही, ''समय पूरा हुइगओ हए, परमेश्‍वरको राज जौंडे आईपुगो हए। पश्‍चाताप करौ, और सुसमाचारमे विश्‍वास करऔ।'' ¹⁶ गालील समुन्दरके किनारे किनारे जातैपेती बा सिमोन और बाको भैया अन्द्रियास के समुन्द्र मे जार डारत् देखि काहेकि बे मछेरयहा रहयँ। ¹⁷ येशू उनसे कही मेरे पिच्छु लागओ, और मए तुमके आदमिनको मछेरयहा बनामङ्गो। ¹⁸ बे तुरन्त अपनी जार छोडीं और बाके पिच्छु लग्गै। ¹⁹ और थोरी दूर जाएके पिच्छु बा जब्दियाके दुई लउँडा याकूब और यूहन्नाके नैयाँमे बैठो जार थिगरत देखी। ²⁰ बा तुरन्त उनके बुलाइलै, और बे अपनो दौवा जब्दिया के नैंयाँ चलान बारेन संग नैयाँमे छोडके बाके पिच्छु लग्गै। ²¹ तव बे कफर्नहुममे गए, और तुरन्त विश्रामदिनमे सभाघरमे जाएके सिकान लागे। ²² और सब बाको शिक्षामे अचम्मो मानी काहेकि बा उनके शास्त्री जैसो नाय, पर अधिकार से सिखात रहए। ²³ बहे समय सभाघरमे अशुध्द आत्मा भव एक आदमी रहय। ²⁴ बा अइसो कहत् चिल्लान लागो, ''हे नासरतको येशू हमसे तोसे का लेनदेन? का तए हमके सत्त्यानास करन आओ हए ? मए तोके चीन्तहौं, तए परमेश्‍वरको पवित्र जन हय।" ²⁵ तव येशू अइसो कहतय बाके डाँटी, ''चुप लाग, और बक मैसे निकरजा।" ²⁶ बा आदमीके फत्फत्बाएके बा अशुध्द आत्मा बडो जोडसे चिल्लायके बा आदमी मैसे निकरगओ। ²⁷ तव सब जनी अचम्मो मानी, और बे अइसे कहत अपनैमे सोधपुँछ करन् लागे, 'जा का हए ? जत् नयाँ शिक्षा हए। जत् अधिकारके संग अशुध्द आत्मनके आज्ञा करत हए, और बे उनको आज्ञा मानत हएँ।" ²⁸ और जलदीय येशू को चर्चा गालीलके इलाकाके आसपास चारौ घेन फैल्गओ। ²⁹ अब बा तुरन्त सभा घर से निकरके याकूब और युहन्ना के सँगमे सिमोन और अन्द्रियास के घरमे आइगओ। ³⁰ सिमोन की सास बुखारसे भरी रहय, और बे जल्दी बाके बारे में बाके बाताईं। ³¹ बा ढिंगै आएके बक् हात पकड़के बाके उठाई, और बुखार बाके छोड्दै। तव बा बिनकी सेवा करन लागी । ³² बहे संझाके दिन डुबनसे पच्छु, आदमी बाके जउणे बेमार और भुत लगेभए जम्मै के लिाआईं। ³³ पुरो शहरके घरके फाटक में जमा हुइगय रहयँ। ³⁴ अनेक किसिमके रोग से दुखीभय बहुत बिमारीन के बा अच्छो करी, और बहुत भुतनके निकारी, पर भुत बाके चिनन् के कारन से बा उनके बोलन नादै। ³⁵ सुबेरे उजियारो होनसे बहुत अग्गु उठ्के बा बाहिर एकान्त ठाहोंमे गओ, और हुआँ प्रार्थना करी। ³⁶ सिमोन और बाके सँग होनबारे बाके ढुणतै गय। ³⁷ बाके पाएके पिच्छु बे कहनलगे, “सब तुमए ढुण रहे हएँ ।” ³⁸ तव बा उनसे कही, “अव, हम जउडें के और सहरमे जामएँ ,और हुआँ फिर मए प्रचार करन पामओं, काहेकि जहेक ताहीं मए आओ हौं।" ³⁹ और पुरो गालील में उनके सभाघर में प्रचार करतय और भुतनके निकारत रहो । ⁴⁰ 40 और एक जनी कोढ रोग लगो आदमी बाके ठिन आएके घुँटो टेक्के अइसे बिन्ती करी, “तुम इच्छा करैगे तव मोके अच्छो कर सकत हौ।" ⁴¹ तव दयासे भरके बा अपनो हात बढाएके बाके छुई, और बासे कही, “मए इच्छा करत् हौं, तए अच्छो हुइजा।" ⁴² बहे समयमे बाको कोढ रोग बासे हटीगओ, और बा अच्छो हुइगओ। ⁴³ और बा बाके कडो आज्ञा दैके अइसे कहिके तुरन्त पठाई, ⁴⁴ "देख तए कोइसे मत कहिए, तए जाएके अपनए पुजारी ठिन दिखा, और तए अच्छो भव तहींमारे आदमीनके प्रमाणके ताहीं मोसा को आज्ञा अनुसार भेंट चढा।” ⁴⁵ तव बा निकरके गओ, और बाके बारेमे खुल्लम खुल्ला प्रचार करन लागो, और येशू फिर सहेर में खुलेआम न जान पाई, और एकान्त ठाहोंमे रहो। तव आदमी चारौं घेनसे बाके ठिन आए।