¹ जहेमारे, स्वर्गीय बोलावटमे सहभागी भए पवित्र भैयाओ, हम पक्को से स्वीकार करो प्रेरित औ प्रधान पुजारी येशूके बिचार करओ । ² जौन बाके नियुक्त करी, बा परमेश्‍वर घेन येशू बिश्‍वासयोग्य रहए, जैसी मोशा फिर परमेश्‍वरको घरानेमे बिश्‍वासयोग्य रहए । ³ परमेश्‍वर मोशा से जद्दा येशूके योग्य और महान महिमा दई रहए। काहेकि घर अपने से जाधा घर बनानबारोके जद्धा आदर होतहए । ⁴ काहेकी हरेक घर कोइ ना कोइ आदमीसे बनाओ होतहए, पर सब चीज बनान बारो त परमेश्‍वर हए। ⁵ जब भविष्यमे बोलन बारी बातकि गवाहीके ताहिं मोशा परमेश्‍वर सारा घरानामे दासके रुपमे बिश्‍वसिलो रहए । ⁶ पर परमेश्‍वरको घरानाको जिम्मा पुत्र ख्रीष्ट लईहय। यदि हम पक्कासे बाके थामके रखयँ हयँ तव हम गर्बसँग कहे सकत हयँ, कि हम बाके घरानेके हएँ। ⁷ जहेमारे पवित्र आत्मा कहत हए, “आज तुम बाको बोली सुनेहौ तव , ⁸ उजाड-स्थानमे परीक्षाके समयमे विद्रोहोके दिनमे करे जैसो अपन ह्रदयके कठोर मत करओ। ⁹ जहाँ तुमर पुर्खा मिर परीक्षा करीं और चालीस वर्षतक मिर काम देखिं । ¹⁰ जहेमारे बा पुस्तासंग मए क्रोधित भव, मय कहो, “बिनको ह्रदय जब फिर टेणो बनोरहत् हए, और बे मिर डगर न पहिचानी ।" ¹¹ जहेमारे मए अपन दिक्मे अइसे कसम खाओ, 'मिर विश्राममे बे कबहू घुसन न पायँ हयँ ।” ¹² भैयओ, होश करओ, तुम मैसे कोइमे भव दुष्ट और अविश्‍वासी ह्रदय तुमके जिन्दा परमेश्‍वरसे दुर न लैजाबए । ¹³ पर, जबतक "आजके दिन" कहानबारी बात हए, तब तक एक दुसरेनके उत्साह देओ। जहेमारे, तुमर मइसे कोइको फिर छलकपटको पापसे ह्रदय कठोर न होबए।" ¹⁴ अगर हम हमर सुरुको भरोसाके अन्ततक पक्केसे पकणे रहएँ तव, हम ख्रीष्टमे सहभागी होत हएँ । ¹⁵ जाके बारेमे आइसो कहो गओ रहए, “आज तुम बाको बोली सुनेहौ तव बिद्रोहोके दिनमे करे जैसे तुमर ह्रदय कठोर मत करओ।” ¹⁶ सुननबारे कौन रहएँ, जौन परमेश्‍वरको आवाज सुनी औेर बिद्रोहो करीं ? का बे सब बेहि न हयँ और, जो मोशाको अगुवाईमे मिश्रदेशसे निकरके आए रहएँ ? ¹⁷ जौन संग बा चालीस वर्षतक क्रोधित का न भव रहय ? का बे पाप करनबारे संग न रहयँ, जौनकी मरी शरीर उजाड-स्थानमे पडी रहएँ ? ¹⁸ बे बाके विश्राममे घुस ना पयँहएँ कहिके कौनसंग बा कसम खाई रहय, का बे बाके आज्ञा न माननबारे न हय ? ¹⁹ और जहेमारे हम देख्तहएँ, बे अविश्‍वासके कारन बाको बिश्राममे घुस न पाइँ।