¹ र तिमीहरूको लागि, तिमीहरू त आफ्ना अपराधहरू र पापहरूमा मरेका थियौं, ² यस संसारको रीतिअनुसार तिमीहरू यस्ता कुराहरूमा एकपल्ट हिंडेका थियौ । आकाशको शक्तिको शासक अनुसार तिमीहरू बाँचिरहेका थियौ, त्यो आत्मा जो अनाज्ञाकारिताका सन्तानहरूमा काम गर्थ्यो । ³ हामी एकपल्ट त्यही व्यक्तिहरू बीच बाँचिरहेका थियौं, आफ्ना शरीरको खराब इच्छाहरु पूरा गर्दै, र शरीर र दिमागको इच्छा अनुसार काम गर्ने गर्‍थ्‍यौं । हामी अरू मानिसहरू जस्तै स्वभावले क्रोधका सन्तान थियौं। ⁴ तर परमेश्‍वर दयामा धनी हुनुहुन्छ आफ्नो महान् प्रेमको कारण जसद्वारा उहाँले हामीलाई प्रेम गर्नुभयो । ⁵ जब हामी आफ्ना अपराधहरूमा मरेका थियौं, उहाँले हामी सबैलाई सँगै ख्रीष्‍टमा जीवित तुल्याउनुभयो । उहाँको अनुग्रहद्वारा तिमीहरू बचाइएका छौ । ⁶ ख्रीष्‍ट येशूमा हामीलाई परमेश्‍वरले उठाउनुभएको छ, र परमेश्‍वरले हामीलाई स्वर्गीय स्थानहरूमा येशू ख्रीष्‍टसँगेे बसाल्नुभएको छ । ⁷ ताकि आउँदा दिनहरूमा उहाँले आफ्नो अथाह अनुग्रहको प्रशस्तता हामीलाई देखाउन ख्रीष्‍ट येशूमा उहाँको दयाद्वारा यो व्यक्त गर्नुभयो । ⁸ किनकि तिमीहरू अनुग्रहबाट विश्‍वासद्वारा बचाइएका छौ, र यो तिमीहरूबाट आएको होइन, यो परमेश्‍वरको उपहार हो, ⁹ कामहरूबाट यो होइन, यसैकारण कसैले घमण्ड गर्न सक्दैन । ¹⁰ किनकि हामीहरू परमेश्‍वरका कारिगरीहरू, धेरै पहिले देखि नै योजना गर्नुभएको असल काम गर्नको निम्ति ख्रीष्‍ट येशूमा सृजना गरिएका हौं, ताकि हामीहरू ती बमोजिम हिडौं। ¹¹ त्यसकारण यो कुरा सम्झ कि एक समय तिमीहरू शरीरमा गैरयहूदीहरू थियौं । मानिसहरूका हातहरूबाट शरीरमा खतना भएकाहरूले तिमीहरूलाई “बेखातनाको” भनेर बोलाउँथे । ¹² किनकि त्यो समयमा तिमीहरू ख्रीष्‍टबाट अलगिएका थियौं, इस्राएलका मानिसहरूका निम्ति परदेशी थियौ, प्रतिज्ञाका करारबाट बिराना थियौं, परमेश्‍वर बिना यस संसारमा तिमीहरूको कुनै आशा थिएन । ¹³ तर अब येशू ख्रीष्‍टमा तिमीहरू जो एक समय परमेश्‍वरबाट टाढा भएका थियौ येशू ख्रीष्‍टको रगतद्वारा नजिक ल्याइएका छौ । ¹⁴ किनकि उहाँ आफै हाम्रो शान्ति हुनुहुन्छ, उहाँले दुईलाई एक बनाउनुभयो । हामीलाई एक अर्कामा विभाजन गर्ने शत्रुताका पर्खालहरू उहाँको शरीरद्वारा भत्काइएका छन् । ¹⁵ उहाँले नियमहरू र आज्ञाहरूका कानुनलाई खारेज गरिदिनुभयो ताकि उहाँमा नै दुई मध्ये एउटा नयाँ मानिस सृष्‍टि गर्न, शान्ति बनाउनुभयो। ¹⁶ ख्रीष्‍टले क्रूसद्वारा दुवै मानिसहरूलाई परमेश्‍वरमा एकै शरीरमा मेलमिलाप गर्नुभयो , शत्रुतालाई नाश गर्नुभयो । ¹⁷ येशू आउनुभयो र धेरै टाढा भएकाहरूलाई शान्तिको असल समाचार र नजिक भएकाहरूलाई शान्तिको घोषणा गर्नुभयो । ¹⁸ किनकि येशूद्वारा हामी दुवै एउटै आत्मामा पिताकहाँ जान सक्छौं । ¹⁹ त्यसकारण, अब तिमी गैरयहूदीहरू कोही पनि नौलो मानिस वा परदेशी छैनौ । तर सबै परमेश्‍वरको निम्ति अलग गरिएकाहरू सँगै उहाँको राज्यको संगी नागरिकहरू हौ र परमेश्‍वरको परिवारका सदस्यहरू हौ । ²⁰ तिमीहरू प्रेरित र अगमवक्ताहरूको जग माथि बसालेर निर्माण गरिएका हौ र ख्रीष्‍ट येशू आफैं कुने-ढुङ्गो हुनुहुन्छ । ²¹ येशू ख्रीष्‍टमा उहाँको सारा निर्माण मिल्दै जान्छ र प्रभुमा एउटै मन्दिरको रूपमा बढ्दै जान्छ । ²² अनि उहाँमा नै तिमीहरू पनि पवित्र आत्मामा परमेश्‍वरको वासस्थानको रूपमा सँगै निर्माण भइरहेका छौ ।