¹ U Paulosi, ukayidi wa Kilisitu Yesu, poka nuwamwabo u Timoti, kwa filimoni, umukamu witu umughaniwa sona uwambombo umunyitu, ² sona na kwa Apphia umuyemba witu, sona na kwa Archippus umulwabite umunyitu, na ku Chalichi lyo likukomana pakaya kako. ³ Ichisa chibe kukwako sona umutende wakufumila kwa Chala witu sona nu mwene Yesu kilisitu. ⁴ Nkhumusalifyanga akabalilo konsi u Chala wane nanthi nkhukutambula uwe mu nyiputo, ⁵ chifukwa nkhwivwa nizya lwitiko lo uli nalo pachala u Mwene Yesu sona nu lughano lo uli nalo kubanthu bonsi abawolosu. ⁶ Nkhuputa ukuti ukugabana kwa lwitiko lwinu lungaba lwamaka, po mukuzukuba nukwivwikisya ukwenecho ku chinthu chilichonsi ichiza cho tuli nacho mwa Kilisitu. ⁷ Pakuti nge naba nubuhobosu nkhani sona nukuwomya chifukwa cha lughano lwinu, chifuwa imyoyo ya bana ba Chala abawolosu vyapyaniziwa numwe, bakamu. ⁸ Po lelo, nanga buli ndi nubujimvu nkhani mwa Kilisitu pakubalamula pakuti mubombe vyo mwenelile ukubomba, ⁹ po chifukwa cha lughano, nkhubalambilizya umwe bwaka-Une, Pawulosi, umunthu umugosi, sona ulu umukayidi wa Kilisitu Yesu. ¹⁰ Nkhubalambilizya umwe ukulingana nu mwana wane u Onesimasi, yuyo namulera bo ndi mu mphingwi. ¹¹ Pakuti akaba lumo mwalangani kukwinu, loli ilero waphindu konsi konsi kukwinu na kukwane. ¹² Namutuma sona kukwinu, yuyo yo moyo wane nkhani. ¹³ Nanyenywanga ukuti nge namwikazya papipi nune ukuti angambombela une kukwinu po nchili ndi mumphimgwi pachifukwa cha mazyu. ¹⁴ Loli nthalondanga ukubomba zimo po uwe uchili utazimenye. Nthalondanga imbombo zyako iziza pavyakulondiwa loli ukufuma ku bwighane ubwiza. ¹⁵ Lumo pa ichi akapawuliwako kukwinu pakabalilo, ukuti mungaba nawe sona bwile na bwile. ¹⁶ Napapo angaba muzya, loli umwizako ukulusya umuzya, uwamwitu umuganiwa. Mughaniwa nkhankhani kukwane, sona ukupota nakukwinu, muvyonsi ku mubili na mwa Chala. ¹⁷ Po nanthi muli nune ukuba nemukamu, mupokele ngati nene. ¹⁸ Nanthi abanangila pamo ali ningongole pachimo, ndonga une yibe yane. ¹⁹ une, ne Pawulosi, nkhusimba chino ninyobe yane. Une nemwenecho nkhuzukubalipila-mutakatambule ukuti ndi ningongole kukwinu! ²⁰ Eeee, wamwitu, ninong'onelako mwa chala; Unhobosyeko mumoyo wane mwa Kilisitu. ²¹ Ukunena ubwanaloli nizya kwivwila kwako, nkhusimba kukwako. Nzimenye ukuti inthi ukabombe ukuchila mo nalengela. ²² Pakabalilo akonyene, nsenganizya ichipinda chane, pakuti nkhusubila ukuti ukwendela mu nyiputo zyinu ndipelekiwa sona kukwinu. ²³ Epaphras, umukayidi umukayidi umunyitu mwa Kilisitu Yesu, akubalamuka. ²⁴ Babo we Maliko,Demasi nu Luka, umubombeli umunyitu. ²⁵ Ichisa cha Mwene witu u Yesu Kilisitu, chibe nu mzimu winu. Ameni.