¹ Pabwandilo pakaba izwi, sona izwi likaba nu chala,sona izwi akaba we Chala. ² Chino chikaba pabwandilo nu Chala. ³ Ivinthu vyonsi vikapangiwa ukwendela mumwache, sona kwambula yuyo kutakaba nachimo ichipeliwa chicho nge chikapangiwa. ⁴ Mumwache mukaba ubumi, sona ubumi bukaba bwelu bwa banthu. ⁵ Ubwelu bukubala muchisi, sona ichisi chitakabupota. ⁶ Akabako umunthu yumo yo akatumiwa ukufuma kwa Chala, yuyo izina lyache akaba we Yohani. ⁷ Akiza ngati we kamboni ukusimikizya izya bwelu, ukuti bosi basubalile ukwendela mumwache. ⁸ U Yohani butakaba bobwelu, loli akiza ukuti izya bwelu. ⁹ Ubwelu bwabwanaloli, bubo bukupa ubwelu ku banthu bosi, bukiza mu chisu. ¹⁰ Akaba muchisu, sona ichisu chikapangiwa ukwendela mumwache, sona ichisu chitakamumanya. ¹¹ Akiza pamwene, sona pamwene chitakamupokela. ¹² Loli kubinji bobakamupokela, bobakasubila mwizina lyache, akabapa amaka aghakuba bana ba chala. ¹³ Aba batakapapwa mu daba, pamo mubwighane bwa mubili, pamo mubwighane bwa munthu, loli nu chala. ¹⁴ Izwi likiza lyaba mubili sona nukwikala mumwitu. Twalolela ubuchindamu, ubuchindamu ubwa weka sona yo akiza ukufuma kwa Tata, uwakwizula nubwila sona nubwanaloli. ¹⁵ U Yohani akasimikizya izyache sona akapundilizya, ukuti '' Uyu we yumo yonkhanenanga, ukuti, ' yuyo akwiza pisinda papane mukulu ukupota mo mbelile, pakuti akabako bo ntchili nthizite. ¹⁶ Pakuti ukufuma mukukwanilisya kwache twebonsi tupokelite ubwila pa bwila. ¹⁷ Pakuti indaghilo zikapeghiwa ukwendela mwa Mozesi. Ubwila nu bwanaloli vikiza ukwendela mwa Yeso kilisitu. ¹⁸ Nayumo yo amulingite u Chala; u Chala mwene, yo alikumbali ya Tata, amupangite u Chala ukumanyikwa. ¹⁹ Ulu lolusimikizyo lwa Yohani po aba Yuda bakatuma aba Puti sona naba Levi kukwache ukufumila ku Yerusalemu pakumulalusya, '' Ka wewenu?'' ²⁰ Akitikizya--atakakana, loli akitikizya-- '' Tene kilisitu.'' ²¹ po bakamulalusya, '' ngapo wewenu lelo? we Eliya? '' akati, '''tenene,'' bakati, '' Ka we muwonela?'' Akamula, ''Awe.'' ²² Po bakati kukwache, '' nga wewenu, ukuti po tungaya tupeleke ilyamulo kubobatutumite? Ngumwe mukuti choni ilyinu?'' ²³ Akanena, '' Nelizyu, ilyakukolomoka munkholongo: ' Panga inzila ya Mwene yiwoloke,'ngati mo u Yesaya umuwonela akanenela.'' ²⁴ Po bamo abakufuma kubafalisi bakatumiwa, ²⁵ sona bakamubuzikizya bakati kukwache, " choni choukozya nanthi we kilisitu pamo we Eliya, pamo we muwonela? ²⁶ Uyohani akabamula akati, '' nkhonzya naminzi. loli pomuli alipo yumo yomutha mumenye. ²⁷ Uyo akwiza pisinda papane weyo une nthangasatula utukungilo twasapato zyache''. ²⁸ Ivinthu vino vikabombiwa ku Betaniya ku mbali iyinji iya ku Jolodani, ko uyohani akozyanga. ²⁹ Kundabi yache UYohani akalinga UYesu ali kukwache po akati, ''lingisya umwana wa Ng'onzi wa chala yoakufumya imbibi zya pachisusu chapansi. ³⁰ Uyu weyula yonkhanenanga yo iza pisinda papane apotite une chifukwa akabako boune nthaliko.' ³¹ Nthakamumanya umwene, loli chikaba chisetuliwe ku Tzilayeli ukuti nkhiza pakozya naminzi''. ³² UYohani akabika ubumboni akati, ane ankhalolela umuzimu ghukwisika ngati nkhunda ukufumila ku mwanya, sona ghukikala papache. ³³ Une nthakamumanyanga umwene loli yoakatuma pakozya naminzi akati kukwane,'payuyo yokizaumuzimu wisika nukuba papache uyonye yo akozya nuuzimu ubuswepu.' ³⁴ Nalolela sona nasimikizya ukuti uyu mwana wa chala. ³⁵ Sona ubwacha boyohani imilile nabafundiwa bache babili, ³⁶ bakalinga uYesu akwenda papipi sona uYohani akati,''linga umwana wambelele uwa chala'', ³⁷ Abafundiwa bache babili bobamwivwa mo akunenenela pobakamukonkha uyesu. ³⁸ UYesu akalingisya kwisinda akabalinga ukuti bakumukonkha sona akati kukwabo ''Mulondachi?'' Bakamula, ''Rabi''[choching'anamula ''Manyisi''] ka mukwikala kwi?'' ³⁹ Akati kukwabo ''zanga sona mulolele'' po bakiza sona bakalolela poakwikala ;bakikala nawe pisiku lila, chifukwa kakaba kabalilo ka 10 okoloko. ⁴⁰ Mwa weka pababili yo akivwa uYohani akunena sons akamukonkha uYesu akaba we Andileya uwamwabo wa Simon Peteli. ⁴¹ A kanda pabwandilo amwagha uwamwabo wache u Simon nukunena ukuti ''twamwagha'' uMesiya'' [choching'anamula kilisitu]. ⁴² Bakiza nawe kwa Yesu, sona uYesu akamulingisya nukunena ukuti, ''We simoni umwana wa Yohani. Inthi witiziwenge ukuti Cefasi,'' [choching'anamula peteli]. ⁴³ Indabi yache bo uYeso akalonda ukunyamuka ukuya ku Galileya, akamwagha ufilipu akamubuzya ukuti nkhonkha une''. ⁴⁴ Po ufilipu akaba wakufuma ku besitayida mu kaya akakulu aka Peteli nu Andileya. ⁴⁵ UFilipu akamwagha uNataniyele sona akati kukwache,'' vyo yo umozesi akasimba mu lulaghilo, sona abaghonela tumwaghite yuyo: uyesu umwana wa Yesefe uwaku nazaleti''. ⁴⁶ UNataniyele akati kukwache, '' ka ichiza chimo chingafuma muNazaleti? uFilipu akati kukwache ''zakuno ulolele''. ⁴⁷ UYesu ba alinga uNataniyele akwiza kukwache sona akati nawe ,''linga, umu izilayele wabwanaloli yo ate nubujanja. ⁴⁸ U Nataniyele akati kukwache,''mukumanya bulibuli une'' uYesu akamwamula akati,''Bo ufilipu atakwitizizye uwe po ukaba munthende mwikomo liya mukuyu une nkhakulinga. ⁴⁹ U Nataniyele akamula,'' Rabi, we mwana wa chala! We mwene wa Izilayeli!'' ⁵⁰ Uyesu akamwamula akati chifukwa nkhanena kukwako kalinga munthende mwikomo lya mukuyu, ukusubalila? ukwiza ukulinga ivinthu ivikulu ukulusya vino. ⁵¹ Po akati,naloli loli, nkhunena kukwako ukwiza ulinga ku mwanya kwighukite, sona abangelo bachala bakwisika nukukwela chifukwa cha mwana wa munthu''.