¹ U songo kumughaniwa u Gaius, yuyo mughanite naloli. ² Baghaniwa, nkhuputa ukuti vyonsi vyende akiza numwe sona nukuti pamubili pinu pabe akiza, ngati namumo vibelile akiza nubumi bwinu. ³ Pakuti nkhasekela nkhani bo abawamwitu biza sona nukubimilila ubwakaboni pabwanaloli bwinu, ngati namumo mukwendela mubwanaloli. ⁴ Nthenulusekelo ulunji ulukulu pakuchila pa luno, pakwivwa ukuti abana bane bakwenda mubwanaloli. ⁵ Baghaniwa, mukuyezya ukubomba nubusubaliwa ponsi po mukubambela abawaghaniwa sona nabalendo ⁶ bobabimilila ubukamboni bwa lughano lwinu pamaso gha chalichi. Mukubomba akiza pakubatuma pabulendo bwabo mukabele akaghindikiwa aka Chala, ⁷ pakuti chikaba chifukwa chalizina lyache ukuti babuke, kwambula ukusenda chimo ku bakunzi. ⁸ Polelo tuwenela ukubapokela abangati aba ukuti tukabe twebabombeli benebene pabwanaloli. ⁹ Nkhasimba zimo kuchipanga, loli Diotrephes, yo aghanite ukuba wabwandilo kukwabo, atakutupokela uswe. ¹⁰ Po nanthi niza, nkhuzukumulingilila kuvivyo akubomba, pakunena ivibibi ivyamwalwe kukwitu. Kwambula ukwikutisiwa navyo, atakukana bwaka pakubapokela aba wamwabo mwene, loli akubakanizya nababo bakulonda ukubapokela sona nukubafumya muchipanga. ¹¹ Baghaniwa, mutakalingilenge ichibibi loli chene chochochiza. Yuyo akubomba akiza we Chala; Yuyo akubomba imbibi atamubweni u Chala. ¹² Demetrius we kaboni umwenencho ku vyonsi sona ku bwanaloli bwene. Nuswe tuli nubwakaboni, sona muzimenye ukuti insimikizyo zyitu zyamomumo. ¹³ Nali nivinthu ivyinji ivyakukusimbila, loli nthakunyenywa pakukusimbila nichisilimbilo poka ninkhi. ¹⁴ Loli nkhulonda ukukomana nuwe lunonyene, po tulinenezania maso na maso. ¹⁵ Umutende wube nuwe. Abamanyani bakukulamuka. Ubalamuke abamanyani bitu mwi zina.