¹ U Paulosi, Silivano, nu Timoti, ku chipanga cha batesalonika mwa Chala u Tata witu sona nu Mwene u Yeso Kilisitu. ² Ubwila ku kwinu sona nu mutende ukufuma kwa Chala u Tata witu nu Mwene u Yeso Kilisitu. ³ Uswe tubaghile akabalilo konsi tumupe amapalo u Chala chifukwa chinu, ba wamwitu, chifukwa ulusubilo lwinu lukukulila kulila, sona nu lughano lo yumo mwa umwe ali nalo kumunyantche lukukwera. ⁴ Po uswe paswebene tukubusila mwa umwe mu ma Tempeli gha Chala nu kufwasa nu lusubilo mu vyonsi ivyakuvwimiwa kwinu, na muvyakupinga vyo mukwendamo. ⁵ Ubu bo bukamboni ubwa bulongelo bwa bugholosu, ukuti musendiwe ba kukwana mu chinamwene cha Chala, cho numwe mukuyimbira. ⁶ Pakuti momumo, icha bugholosu kwa Chala pakunyosezya ulunyazyo ku bo bakubanyazya umwe, ⁷ nu butuzyo kumwe mwe mukunyaziwa nuswe, po u Mwene u Yeso asetuka ukufuma kumwanya na ba ndumi bache abamaka ⁸ mu moto uwakulilima, ukunyosezya ubukali ku bo batamumenye u Chala sona nabo batakwivwila ku butumi bwa mazwi gha Chala aghiza agha Mwene witu u Yeso. ⁹ Baliza banyale nu lufundo ilwa bupyutiwa bwa kumwanya ukufumapo pa naso gha Mwene sona na mu buchindamu bwa maka ghache. ¹⁰ Aliza abombe ivi po iza pisiku lira nu kuchindikiwa mu banthu bache abaswepu sona nu kuswighiwa mu bonsi bo ba kamusubila, chifukwa ulusimikizyo lwitu ku kwinu lukasubiliwa. ¹¹ Chifukwa cha ichi uswe nuswe tukubiputila akabalilo konsi, ukuti uChala abasende umwe bakukwana mulwito lwinu sona na maka ghache akwiza pa kufisya ichakulondiwa chonsi sona ni mbombo yonsi iya lwitiko. ¹² Tukwiputa ichi ukuti izina lya Mwene witu u Yeso lingachindikiwa mu mwinu, sona nuswe mumwache, ukuyana nu bwila bwa Chala witu nu Mwene u Yeso Kilisitu