¹ Ukufuma kwasongo wa chipanga, ukuya kumwanakazi yuyo asaliwe nu Chala poka nabana bache, babo mbaghanite nubwanaloli--sona tenene nemwene ne mbaghanite, loli nabonsi babo babumenye ubwanaloli-- ² chifukwa chabwanaloli bobusyalikile mumwitu sona buliba poka nuswe mukabalilo kambula kumala. ³ Ipyana, ichisa poka nu mtende wuyukuba poka nuswe ukufuma kwa Chala u Tata sona na kwa Yesu kilisitu, umwana wa Tata mubwanaloli nu lughano. ⁴ Nkhusekela hee pakuti nabagha abana bako bamo bakwenda mubwanaloli, ngati namumo tupokelile ulukomelezgo ukufumila kwa Tata. ⁵ Ulu po nkhukulambilizya, wemwanakazi uwe--tekokuti nkhakusimbila ulukomelezyo ulupya, loli lulo lo tukaba nalo ukwanda kubwandilo--ukuti tughananenge weka nuyunji. ⁶ Ulu lolughano, ukuti tuwenela ukwenda ukuyana ninkhomelezyo zyache. Ulu lolukomelezyo, ngati namumo ukivwila ukufuma kubwandilo, ukuti ukwenela ukwenda mu izyonyene. ⁷ Pakuti abamyansi abinji basata muchisu, sona batakwitika ukuti u Yesu Kilisitu akiza kumubili uwabunthu. Aba bobamyasi sona abakana Kilisitu. ⁸ Ilinga wemwene, ukuti utakapotwe ivinthu vivyo twebonsi twabombelanga, loli mwize mupokele ichilipwa chinu chonsi. ⁹ Wensi yuyo akutangila sona atakwikala muchimanyisyo vya Kilisitu ate nu Chala. Yuyo akwikala muchimanyisyo, uyu yo ali nu Tata sona nu Mwana. ¹⁰ Nanthi yumo akwiza kukwinu loli atakwiza ni chimanyisyo chino, utakamupokele pa nyumba yako sona utakamulamuke. ¹¹ Pakuti yuyo akumulamuka akuba poka nawe mumbombo zyache imbibi. ¹² Indi nivinthu ivinji ivyakukusimbila, loli nthakalondanga pakuvisimba pipepala ninkhi. Nanga buli, nkhulonda ukwiza kukwako nukunena nuwe maso namaso, ukuti ukuhoboka kwitu kwize kufike pabumalilo. ¹³ Abana ba muyemba wako umusaliwa bakulamuka.