¹ Nalondanga ukuti mube nune mu bupunganu bwanebuno. Naloli muli nune. ² Pakuti indi nakabini numwe. Ngati mo utwachala twinu tuli nakabini numwe, ngati mo tukapanganilana numwe ukusendwa kwa mwanalume weka. Nkhupangana numwe mbabike kwa Yeso ngati mwanakazi yo atakomanitepo nu mwanalume.Nkupangana ukukubika ngati we mulindu umwenecho kwa Kilisitu. ³ Loli nkowopa ukuti pamo, ngati mo injoka yikamupusikila u Eva, numwe inyinong'ono zinu zngafumako kwa Yeso. ⁴ Nanthi waghe yumo iza nukunena izya Yeso uyunji ukuleka yo tukulalikila. Pamo nanthi waghe mukupokela umuzimu ughunji ukulusya gho mukapokela. Pamo mwapokela amazwi aghanji ukulusya gho mukapokela. Inyinong'ono zinu zikufumako ichete! ⁵ Loli nthakwinong'ona ukuti ne wabamo wakuchindikiwa ku bo--bakwitiziwa batumiwa--ba pamwanya. ⁶ Loli napo nthamanyisiwe mukanenele, nthamanyisiwe mu mahala. Pa vyonsi vyo vipangiwa vikumanyikwa nuwe. ⁷ Ka nkananga pa kwipepula? Ukuti nsatuke pakulumbilila amazwi gha Chala ku kwinu. ⁸ Nkapusika ama chalichi ghamo ukuti ghanthule ubutuli ukuti mbatule umwe. ⁹ Bo indi numwe nkaba wakulondiwa hee, nthakamubenga nayumo. Pakuti ivyakulondiwa vyane vikafumanga ku ba wamwitu bo wakafuma ku Makedonia. Munzila zyonsi nthakalonda ukuti yumo apyoke, sona inthi mbukilizye bunonyene. ¹⁰ Ngati mo ubwanaloli bwa Kilisitu bubelile mu mwane, ukwikuzya kwane te kulekeziwepo mu vigaba vya Akaya. ¹¹ Ka chifukwa cha choni? Chifukwa chakuti nthakughanite? U Chala azimenye. ¹² Loli cho nkubomba inthi mbukilizye bwaka, ukuti ndumulizye umwabi wa bo bakulonda ukwikuzya--ukuti baghiwe ukubomba imbombo iya kuyana bwaka nayo tukubomba. ¹³ Pakuti abanthu ngati aba batumiwa abamyansi sona bambombo abamyansi. Loli bakwipangisya ngati batumiwa ba Kilisitu. ¹⁴ Loli te chakusighisya, pakuti wepe u satana akwing'anamula ukuba ngati wa nthumi wa bwelu. ¹⁵ Chitangaba chakuswighisya awe pala aba mbombo bache bope bakwing'anamula ukuba ngati ba mbombo ba bwelu. Ubumalilo bwabo inthi buyane bwaka ni mbombo zyabo. ¹⁶ Nkunena sona: Patabe nayumo yo inong'onenge ukuti ne mupunganu. Loli pala ukubomba , umupokele ngati mupunganu ukuti mbuse panandi. ¹⁷ Cho nkunena nu kwikuzya konsi---nkunena mo uMwene akulondela-- nkunena ngati mupunganu. ¹⁸ Ngati mo abanthu bakwikuzizya ni vya mubili, nune inthi nikuzye. ¹⁹ Pakuti umwe muli na mahala na bapunganu muli na mahala mwebene. ²⁰ Pakuti mwikwikola napo umunthu angabang'anamula ukuba muzya, pamo alya ivinthu ivi, pamo akwitukumula, pamo akubapusika, pamo akuchaya ku maso. ²¹ Indi ni soni sona nkwitikizya pakuti tukapusa. Napo yumo angitutumula--- nkunena ngati mupunganu-- nune kwiza ukwikuzya. ²² Ka ba Yuda? Po nene. Ka ba Izilayeli? Ka luko lwa Abulahamu? Po nene. ²³ Ka bambombo ba Kilisitu? ( nkunena ngati ne mulunkanu.)Ne mwinji. Wabomba imbombo inkavu nkani, ukwingila mu Jele, ukumiwa ukwakupululila ichipimo, nkalinga ubulwani ubwamfwa. ²⁴ Ukufuma ku ba Yuda, nkapokela nukunyamia ka fayivi '' amalashezi fote ukufumya lyoka'' Katatu ko nkumwa ni nkomo. Bakansumba na mabwe. ²⁵ Katatu ko iboti likatukomanikila. Nkikala ubusiku nu musanya pabwelu pa nyanja. ²⁶ Nkaba pa bulendo bwa kabilikabili mu bulwani ku nsoko, mu bulwani ku vigabenga, mu bulwani kubanthu abanyane, mu bulwani ku bakunzi, mu bulwani ku ba kaya, mu bulwani mu nkolongo, mu bulwani pa nyanja, mu bulwani ku ba wamwitu abamyansi. ²⁷ Nkaba pa mbombo inkavu sona nu moyo ughughomu, nu busiku ubwinji ubwa kupotwa ukughona utulo, mu nzala na mu nyota, ukwiyima , mu butalale na mu nkule. ²⁸ Ukufumyako ivinthu vyonsi, pali ubufwase bwa bwilebwile ukuyana ni nyinong'ono zyane ku ma chalichi ghonsi. ²⁹ Wewenu yo mudedebazu, sona te ne mudedebazu? Wewenu yo akapangisya ukuti anange, sona une nthakapya. ³⁰ Pala nkwikuzya, inthi nikuzye nivya kwilangizya umwa kupotwa kwane. ³¹ U Chala nu Tata uwa Mwene uYeso, uwa bamo yo tukumupala bwilebwile, amenye ukuti nthakutamantha! ³² Ku Damasika, ikambala lya mwene u Aretasi akalingililanga ichikaya cha Damasikasi ukuti bankunge une. ³³ Loli bakanisya mu chizanga ukwendela pa bwindo lya pa lubumba, sona nkapulumuka munyobe zyache.