¹ Peteli, mumanyili wa Yeso Kilisitu, ku balendo bakusatana, abasaliwa bonsi, mu Ponitasi, Galatiya,Kapadoniya, Asiya, na Beteniya. ² Ichi chilingati mahala agha kale agha Chala u Tata, ukwizila m mbombo iziswepu izya muzimu, mukwivwila nukutonya kwidaba lya Yesu Kilisitu. Ichisa chibe kwa umwe, sona nu mutende winu ghukule. ³ U Chala u Tata wa Mwene witu u Yesu Kilisitu apaliwe! Mu chisa chache ichikulu, twapapiwa ku moyo uwa lusubilo ulupya ukwizila mu kuzyuka kwa Yesu Kilisitu ukufuma ku bufwe. ⁴ Ichi cha kupyana ko kutakunanganika, ko te kwize kufisiwe, sona te kwize kukulupe. Kumwanya kusungiwe chifukwa cha umwe. ⁵ Mukusungiwa na maka gha Chala ukwizila mu lusubilo lwa bupokiwa bo bubikiwe ukuti buvumbuliwe mu masiku gha bumalilo. ⁶ Muhobokite nkhani pa ichi, napo buli zibaghile kwa umwe ukuti musulumanie mungelo zya kulekanalekana. Ichi chili ulu ukuti lupimiwe ulwitiko lwinu, cho chakulondiwa nkhani ukulusya u golide yo anangika, napo buli chipimiwe nu moto. ⁷ Ichi chikubombwa ukuti ulwitiko lwinu lwize lwaghiwe mukupaliwa, mukukweziwa na mubuchindamu pa kuvumbula kwa Yesu Kilisitu. ⁸ Mutamulinga, loli mumughanite. Mutakumulinga lonsi ulu, loli mukusubila mu mwache sona mukusekelela nukuhoboka hee. ⁹ Po mukwipokelela mwebene ivyakukonkhapo vya lwitiko lwinu, ukupokiwa ni mizimu yinu. ¹⁰ Ivya kwamfania ni zyakupokiwa uku, abaghonela bo bakalotela izya chisa cho chibaghile ukwiza kukwinu, bakalondalonda ku maka izya ichi, ¹¹ Bakayezya ukuti bamanye umunthu pamo akabalilo ka Muzimu wa Kilisitu gho ghukaba mu mwabo gho ghukalangizyanga bo akabalilo katakwanite izya kunyoziwa kwa Kilisitu nu buchindamu bwache. ¹² Zikavumbuliwa kukwabo ukuti batakiyavwa bene, loli umwe, bo bakanena izya vinthu vyo akabalilo aka vyabuziwa kukwinu nabo bakalumbilila amazwi kukwinu mwa Muzimu ughuswepu gho ghukatumiwa ukufuma kumwanya---ivinthu mo abangelo bakalonda pakulinga. ¹³ Po kungani aminong'ono ghinu. Mube bakwikola. Bika ulusubilo lwinu lonsi mu chisa cho chiliza kwa umwe po u Yesu Kilisitu avumbuliwa. ¹⁴ Ngati bana bakwivwila, mutakapangile mwebene ivinyonywa vyo mukaba navyo po mutakamanyanga. ¹⁵ Loli ngati yo akubitizya umwe umuswepu, umwe, nimile mube baswepu munkhalo yinu yonsi. ¹⁶ Pakuti visimbiwe, '' Mube baswepu chifukwa ne muswepu.'' ¹⁷ Po nanthi ukwitizya ''Tata'' yo akulonga umwakuyana sona ni mbombo zya aliwensi, akwendamo mukabalilo ka bulendo umwakuswighisya. ¹⁸ Mumenye ukuti atakaba we siliva pamo u golide yo akaba poka ku mikalilo ghinu aghamwalwe gho mutakamanyikwa ukufuma ku ba tata binu. ¹⁹ Mu buyo bwache, mukapakwa nu daba uwa pamwanya pa Kilisitu, yo akaba ngati we nang'onzi ye ate nichilema nachimo pamo akabala. ²⁰ U Kilisitu akimikiwa bo ulufula lwa chisu lutabikiwe, loli pano avumbuliwa kukwinu mutubalilo tuno utwabumalilo. ²¹ Ukwizila mumwache mukusubila mwa Chala, yo akamuzusya ukufuma kubafwe nukumupa ubuchindamu bwache, ukuti ulwitiko nu lusubilo lube mwa Chala. ²² Muswefizye imizimu yinu mukwivwila kwa bwanaloli. Ichi chikaba chifukwa cha lughano lwa ba wamwitu abaghaniwa; Po mughanane weka nu munyantche ukufuma mu moyo. ²³ Mwebapokiwa, te kufuma ku mbeyu yakunanganika ukwizila mu mazwi aghumi sona gho ghasyete agha Chala. ²⁴ Pakuti, ''Imibili yonsi yili ngati lisote, sona nubuchindamu bwache bonsi buli ngati maluba agha lisote. Isote likumila, sona niluba likuwa pansi, ²⁵ loli amazwi gha Mwene ghakubako akabalilo konsi.'' Izwi ili lyolyo mazwi amiza gho ghakalumbililiwa kukwinu.