¹ Ja̧'hua̧ta̧nö̧ Tu̧ru̧hua̧ Dios Moisésrö pä'inödo: Jitä ttö Egipto rȩjȩ ru̧hua̧rö̧ jȩchä̧cuȩmä̧ to̧cu̧'ä̧cua̧jä̧. Ttö chujurunä jȩchä̧cua̧sä̧ Egipto rȩjȩ ru̧hua̧ ja̧'a̧tä̧ toa pä'ö Israel ttö̧ja̧rö̧ rättopächa'anä. Ttö chujurunä jȩchä̧cua̧sä̧ hue'ö icua pä'ö jahuätörö chutä iŗ ȩjä̧ttö̧. ² Ja̧'hua̧ta̧nö̧ Tö̧ä̧nä̧hua̧ Dios Moisésrö pä'inödo: Ttötä ucu Cu̧ru̧hua̧mä̧. ³ Abraham minärö'inä, Isaac minärö'inä, Jacob minärö'inä, O'ca juiyönä Ju̧ru̧hua̧ Ttö̧ä̧nä̧hua̧ Dios päi'önä ijȩcuinö̧sä̧. Ja̧'hua̧nö̧ ja̧'a̧nä̧ ttö chimimä̧ Chu̧ru̧hua̧ Dios pä'ömä yorö'iso ttieruhuinäcusä. ⁴ Ja̧'hua̧ta̧nö̧ ttö jahuätörö iso päi'önä jȩchä̧cuȩ huȩnȩ ji'ähuinösä, korotö tti̧rȩjä̧, Canaán rȩjȩ jahuätö ttö̧jinä̧jä̧, tti̧rȩjä̧ päi'önä chiyatö pä'ö. ⁵ Ja̧'hua̧ta̧nö̧ Israel ttö̧ja̧ ajuäu kä̧nö̧ huotta'a ä̧ju̧cuinö̧sä̧, Egipto ttö̧ja̧ pä̧icu̧nä̧ ttaditönä huettä̧rä̧u̧. Ja̧'hua̧ta̧nö̧ ttö jahuätörö iso päi'önä jȩchä̧cuȩ huȩnȩ pädinömä amöcuädäjisä pä'inödo Dios. ⁶ ―Ja̧'hua̧nö̧ ja̧'a̧ttö̧ Israel ttö̧ja̧rö̧ piy̧ ȩ chihuȩnȩ jicuhuähuaja: Ttötäsä ucutu Cu̧ru̧hua̧tu̧cu̧mä̧, pä'äji Tu̧ru̧hua̧mä̧ pä'ö. Egipto rȩjȩ ttö̧ja̧ pä̧icu̧nä̧ huettära̧'a̧ttö̧ rä'epö chicuäcuotöjä. Ja̧'hua̧ta̧nö̧ pä̧icu̧nä̧ cuaditähuättömä 'chodipäcuotöjä. Ja̧'hua̧ta̧nö̧ chöjo cä'epö chujurunä Egipto rȩjȩ ttö̧ja̧rö̧ pä̧icu̧nä̧ ro̧dȩpä̧cua̧sä̧ cu̧jipätu̧cua̧ pä'ö. ⁷ Ja̧'hua̧nö̧ ja̧'a̧ ucuturu chȩmä̧cua̧sä̧ chumöhuäyotö päi'önä cu̧jätu̧cuä̧cua̧'a̧nö̧. Ja̧'hua̧nö̧ ja̧'a̧ttö̧ ttötä ucutu Cu̧huä̧nä̧hua̧tu̧cu̧ päi'önä chö̧jä̧cua̧sä̧. Egipto rȩjȩ ttö̧ja̧ pä̧icu̧nä̧ huȩttä̧ro̧mȩttö̧, ujuturu rä'epö icuinö pä'ö cu̧huo̧juä̧cuo̧tö̧jä̧. Ja̧'hua̧ta̧nö̧ ucutu cu̧huo̧juä̧cuo̧tö̧jä̧ ttörö ujutu Tu̧ru̧hua̧ Diosmä iso päi'önä kö̧ pä'ö. ⁸ Korojä̧ Abraham minärö'inä, Isaac minärö'inä, Jacob minärö'inä chiy̧ ä̧cua̧sä̧ pä̧dinä̧jä̧ra̧'a̧ chȩpä̧cuo̧tö̧jä̧. Ja̧'hua̧ta̧nö̧ ucuturu chiy̧ ä̧cua̧sä̧ ja̧huä̧jä̧ ucututä cua̧mo̧nä̧ cuiŗ ȩjätu̧cu̧ päi'önä. Ttötäsä ucutu Cu̧ru̧hua̧tu̧cu̧mä̧ pä'inödo Dios Moisésrö. ⁹ Moisés Dios hueäji huȩnȩ Israel ttö̧ja̧rö̧ jiähuomenä, ä̧ju̧cuo̧co̧tö̧ pinätödo rö̧ȩnä̧ tta̧'cua̧ tta̧ttȩcua̧'a̧ttö̧, ja̧'hua̧ta̧nö̧ juruhuächi'ö pä̧icu̧nä̧ ttadita'attö. ¹⁰ Ja̧u̧nu̧ o'ca'a Tu̧ru̧hua̧ Dios Moisésrö pä'inödo: ¹¹ Ji'ähuäji Egipto rȩjȩ ru̧hua̧rö̧: Cuiŗ ȩjä̧ttö̧ Israel ttö̧ja̧mä̧ rättopa'anä ja̧'a̧tä̧ topitödo pä'ö. ¹² Ja̧'hua̧nö̧ ja̧'a̧nä̧ Moisés Tu̧ru̧hua̧ Dios ä'ca jo̧mȩttö̧ ucuocu pä'inödo: Topi. Israel ttö̧ja̧ yorö'iso ttörö ä̧ju̧cuo̧co̧tö̧ päjätö. Ja̧'hua̧nö̧ ja̧'a̧mä̧ ¿tta̧'a̧nö̧ ä̧ju̧cuä̧cua̧'a̧ jä̧ttö̧ ttörö Egipto rȩjȩ ru̧hua̧mä̧? Ttömä adiunä ucuocuä̧ro̧cö̧sä̧. ¹³ Ja̧'hua̧nö̧ ja̧'a̧ Tu̧ru̧hua̧ Dios Moisésrö'inä, Aarónrö'inä ucuocuinödo. Jahuätörö hue'inödo Israel ttö̧ja̧rö̧'inä̧, Egipto rȩjȩ ru̧hua̧rö̧'inä̧ ucuocu tti̧'cha̧ pä'ö, Israel ttö̧ja̧rö̧ Egipto rȩjȩttö̧ rä'epö tticua pä'ö.