¹ Ja̧'hua̧nö̧ ja̧'a̧ Tu̧ru̧hua̧ Diosmä pä'inödo Moisésrö'inä, Aarónrö'inä, Egipto rȩjȩnä̧ ttö̧ja̧cuo̧mȩnä̧: ² Pide kä̧hua̧mä̧ a̧'ȩ ä̧cuo̧mȩnä̧ kä̧hua̧ päi'önä ö̧jä̧cua̧ ucuturumä. ³ O'ca toi'önä Israel ttö̧ja̧rö̧ ji'ähuätucui: Pide kä̧hua̧ fecha diez päi'omenä, oveja itti̧rö̧ ȩmö̧ tti̧'chö̧'a̧nö̧ ja̧'a̧, ttojusodenä ka̧cuä̧tö̧ ttö̧'o̧ya̧ päi'önä, isode yodete pö̧nä̧mä̧ oveja itti̧ ya̧tȩrö̧tä̧. ⁴ Yodete isodenä ta̧ju̧tä̧ huotö ttö̧ja̧cu̧ttu̧mä̧, jahuätö ttahuaruhuäcu tö'cönänö ttö̧ja̧cu̧ttu̧mä̧, ya̧tȩrö̧ cuä'ö icu ttö̧ja̧ttö̧ topö, pä̧cuä̧da̧rö̧ ttiyäcua'anö cuä̧nö̧ ttö̧'a̧cuä̧cho̧mȩ jubötä. ⁵ Oveja itti̧ttö̧'inä̧cö̧, chivo itti̧ttö̧'inä̧cö̧ ya'ute a̧'ȩ ku̧nä̧rö̧, ötta jui'a̧ a̧dihua̧ttö̧ ȩmö̧ tti̧'chö̧'a̧nö̧ ja̧'a̧. ⁶ Oveja itti̧rö̧mä̧ hua'adö ttu̧ju̧nu̧'a̧nö̧ ja̧'a̧ ja̧u̧tä̧ kä̧hua̧ fecha catorce jubö. Ja̧u̧nu̧ mo̧ro̧ yo̧ä̧sa̧ päi'omenä o'ca toi'önä Israel ttö̧ja̧ ovejatö̧ tti̧tti̧mö̧rö̧ cuä'ö tticu'anö ja̧'a̧. ⁷ Ja̧'hua̧ta̧nö̧ oveja itti̧ ucuoja ȩmö̧, isode idepä ttucuäcuode äpate ä'ca jäyä odiyä todärenä'inä, äpate ä'ca huä̧mȩ isodänä'inä tuttepö'a̧nö̧ ja̧'a̧. ⁸ Ja̧u̧nu̧tä̧ yodo idepä ocuränä ȩttö̧ ttucu'a̧nö̧ ja̧'a̧. Pa̧ ppö̧ä̧mo̧cö̧cu̧, reö ojiyäcu, idepäcu ttucu'a̧nö̧ ja̧'a̧. ⁹ Idepä ji'quicha̧nö̧tä̧ i'ti'a'a'inä, ajiyanä ahuähua'a'inä cucuätucuä'. Ttupiyä'inä, ttöjahuiyä'inä, ttu̧huä̧siyu̧'inä̧ ocuränä ȩttö̧ cucuätucuaja pä'inödo Tu̧ru̧hua̧ Dios. ¹⁰ Ja̧'hua̧ta̧nö̧ cu̧ju̧ni'ätu̧cuä̧' yo̧ȩi ̧mo̧ro̧ juäisome cucuätucuäcua'amä. Ji'quicha̧nö̧tä̧ ki'ö̧ttö̧mä̧, ocuränätä ku cuicuätucu'a̧nö̧ ja̧'a̧ pä'inödo Dios. ¹¹ Pa̧'a̧nö̧ jȩpö̧ idepämä cucuätucuaja 'chä̧nö̧ cu̧'ca̧tä̧huäti̧yu̧tu̧cu̧'inä̧, cu̧jä̧pö̧ isäyatucu'inä, cuitta'catucu'inä cu̧mö̧nä̧ 'chu'huädö, jo̧mȩ päi'önä jȩcu̧'ätu̧cua̧ja̧ cui'chätu̧cua̧ pä'ö. Ja̧'hua̧ta̧nö̧ jurunänö cucuätucuaja, ttö, Cu̧ru̧hua̧ Dios, cu̧huä̧mȩtu̧cu̧nä̧ 'cuädopö yodo ja̧'a̧ttö̧. ¹² Ja̧'hua̧nö̧ ja̧'a̧ttö̧ ja̧u̧nu̧tä̧ yodo Egipto rȩjȩnä̧ 'cuä̧do̧pä̧cua̧sä̧. U̧mä̧tö̧ o'ca toi'önä ä̧cuo̧mȩnä̧ uhuäpächinätörö cuä'ö chicuä̧cua̧sä̧ ttö̧ja̧ttö̧'inä̧, ttä̧jimö̧ttö̧'inä̧. Ja̧'hua̧ta̧nö̧ Egipto ttö̧ja̧ ttö̧ä̧nä̧huo̧tö̧rö̧'inä̧ ro̧dȩpä̧cua̧sä̧. Ttötäsä Cu̧ru̧hua̧tu̧cu̧ Diosmä. ¹³ Oveja ucuojamä tocha pä'ö jä̧cua̧'a̧ cuoju odehuiyä cu̧ja̧cuätu̧cuodenä. Ucuoja tochomenä, ucuturumä cu̧huä̧mȩtu̧cu̧nä̧tä̧ 'cuä̧do̧pä̧cua̧sä̧. Ja̧'hua̧ta̧nö̧ surojö 'cuäopoca'a jä̧cua̧'a̧ ucuturu cuä'ö icuähuä juiyönä Egipto rȩjȩ ttö̧ja̧rö̧ ro̧dȩpo̧mȩnä̧. ¹⁴ Ja̧'hua̧ta̧nö̧ piy̧ ȩ mo̧ro̧ cunichi'ätucu juiya pä'ö a̧'ȩ jö̧ a̧'u̧cuä̧ Cu̧ru̧hua̧tu̧cu̧ Dios cu̧huä̧mȩtu̧cu̧nä̧ 'cuädopinö amöcuädö pä'cäri jȩcu̧'ätu̧cua̧ja̧. Piy̧ ȩ hueähuä huȩnȩ amöcuädö ucutu'inä cuahuaruhuä'cotö'inä jȩttä̧cuo̧tö̧ pä'inödo Tu̧ru̧hua̧ Diosmä. ²¹ Ja̧'hua̧nö̧ ja̧'a̧ Moisésmä Israel ttö̧ja̧ttö̧ u̧mä̧tö̧ tä̧mö̧tä̧ tticha pä'ö hue'inödo. Jahuätörö pä'inödo: Ȩmä̧jätu̧cui ̧ ovejatö̧ tti̧tti̧mö̧rö̧ cuojusodetucunä ka̧cuä̧tö̧ ttö̧'o̧ya̧ päi'önä. Cuä'ö icuätucui oveja itti̧rö̧, Cu̧ru̧hua̧tu̧cu̧ Dios cu̧huä̧mȩtu̧cu̧nä̧ 'cuäopö pä'cäri cuä'ö icuähuä isa̧ päi'önä. ²² Ja̧'hua̧ta̧nö̧ hisopo isade 'te'ädö, oveja ucuoja iso̧'ta̧nä̧ acuoyattö 'cucuetö tucuepätucuaja äpate ä'ca huäme isodänä'inä, äpate ä'ca jäyä odiyänä'inä. Ja̧'hua̧ta̧nö̧ ya̧tȩ'inä̧ isodettö räopö juiyö'a̧nö̧ ja̧'a̧ mo̧ro̧ juome jubö päi'önä pä'inödo Moisésmä. ²⁸ Ja̧'hua̧nö̧ ja̧'a̧ttö̧ Israel ttö̧ja̧ 'chä̧nö̧, Tu̧ru̧hua̧ Dios Moisésrö'inä, Aarónrö'inä hueinö ta'anö jȩpinä̧tö̧do. ²⁹ Ja̧'hua̧nö̧ ja̧'a̧ yodo kä'co päi'omenä, Tu̧ru̧hua̧ Dios cuä'ö icuinödo o'ca toi'önä äcuomenäji ruhuärö, Egipto rȩjȩnä̧ ka̧cuä̧tö̧rö̧. Egipto rȩjȩ ru̧hua̧ ideäcänä pö̧ äcuomenäji itti̧rö̧'inä̧, cärenä pä̧nö̧ äcuomenäji itti̧rö̧'inä̧, ttä̧jimö̧ pä̧cä̧yö̧ ä̧cuo̧mȩnä̧ tti̧tti̧mö̧rö̧'inä̧ cuä'ö icuinödo. Egipto rȩjȩ ttö̧ja̧ äcuomenäji tti̧tti̧mö̧rö̧ o'ca toi'önä cuä'ö icuinödo. ³⁰ Ja̧u̧nu̧ yodo Egipto rȩjȩ ru̧hua̧'inä̧, ippeye ruhuotö'inä, o'ca toi'önä Egipto rȩjȩ ttö̧ja̧'inä̧ porächi'inätödo. Ja̧'hua̧nö̧ ja̧'a̧ Egipto rȩjȩttö̧ rö̧ȩnä̧ ajuäcuähuinätödo. Isode yodete'inä ki'o̧ca̧'a̧ jina̧'a̧do tti̧tti̧ 'corupä'i'iyoco̧u̧ päjätömä. ³¹ Ja̧u̧nu̧ yodo Egipto rȩjȩ ru̧hua̧mä̧ Moisésrö'inä, Aarónrö'inä huopinödo tticha pä'ö. Pä'inödo: Rä'opätucui chumöhuäyotö ttö̧'quȩtȩttö̧mä̧, ucutu'inä, Israel ttö̧ja̧'inä̧. Cu̧ru̧hua̧tu̧cu̧ Diosrö cucuocua tätucui, ucutu päcuhuäjätucumä. ³² Cuä̧jimö̧rö̧ o'ca toi'önä, ovejatö̧rö̧'inä̧, chivotö̧rö̧'inä̧, pä̧cä̧yö̧rö̧'inä̧ ȩpätu̧cui,̧ ucutu päcuhuäjätucumä. Ja̧'hua̧ta̧nö̧ Cu̧ru̧hua̧tu̧cu̧ Diosrö ucuocuätucui ttörö ppäda pä'ö. ³³ Ja̧'hua̧ta̧nö̧ Egipto rȩjȩ ttö̧ja̧mä̧ Israel ttö̧ja̧rö̧ jurunä tti̧'cha̧ pä'ö hue'inätödo, ujutu'inä o'ca toi'önä 'corupäti'äcuotöjä a̧'cua̧ra̧'a̧ pä'ö ttamöcuäda'attö. ³⁴ Ja̧'hua̧nö̧ ja̧'a̧ Israel ttö̧ja̧ ttu̧cuȩ pa̧ isähua ppö̧ä̧mo̧co̧hua̧ ttö̧ä̧ro̧'ta̧ jacuä ȩnö̧, ttö̧'ca̧tä̧huäti̧yu̧ juäocua'a ttu'upi'canä hua̧'a̧nä̧ ȩpö̧ 'chinä̧tö̧do. ³⁵ Israel ttö̧ja̧mä̧ Moisés hueäji ta'anö jȩpinä̧tö̧do. Egipto ttö̧ja̧ttö̧ koro juäi pärätättö adicuä'inä, koro juäi orottö adicuä'inä, ttö̧'ca̧tä̧huäti̧yu̧'inä̧ ä'canä jä'epinätödo. ³⁶ Tu̧ru̧hua̧ Diostä jȩpinö̧do Egipto rȩjȩ ttö̧ja̧mä̧ Israel ttö̧ja̧rö̧ adiunä jȩtta̧ pä'ö. Ja̧'hua̧nö̧ ja̧'a̧ttö̧ Israel ttö̧ja̧ jättepinömä iyinätödo Egipto rȩjȩ ttö̧ja̧mä̧. Ja̧'hua̧nö̧ ȩpinä̧tö̧do Egipto rȩjȩ ttö̧ja̧ ttöärettö. ^{44 43} Ja̧'hua̧ta̧nö̧ Tu̧ru̧hua̧ Dios Moisésrö'inä, Aarónrö'inä pä'inödo: Ttö Cu̧ru̧hua̧ cu̧huä̧mȩtu̧cu̧nä̧ 'cuädopö hueähuä huȩnȩ piy̧ ȩmä̧: Korotö tti̧rȩjä̧ttö̧ ichinätöttö ya̧tȩ'inä̧ pä'cäri ucu juiyö'anö ja̧'a̧. ^{45 46} Ja̧'hua̧ta̧nö̧ oveja itti̧ idepämä yodetettötä cucuätucu'a̧nö̧ ja̧'a̧. Idepämä ji'quicha̧nö̧'inä̧ u̧micu̧ cuȩpätu̧cu̧ juiyö'a̧nö̧ ja̧'a̧. Ja̧'hua̧ta̧nö̧ ihue'ca ji'cate'inä 'tecuhuädätucu juiyö'a̧nö̧ ja̧'a̧. ^{49 50} Ja̧'hua̧nö̧ ja̧'a̧ Tu̧ru̧hua̧ Dios Moisésrö'inä, Aarónrö'inä hueäji ta'anö jȩpinä̧tö̧do Israel ttö̧ja̧ o'ca toi'önä. ⁵¹ Ja̧'hua̧nö̧ ja̧'a̧ ja̧u̧nu̧tä̧ mo̧ro̧ Tu̧ru̧hua̧ Diosmä Israel ttö̧ja̧ o'ca toi'önä̧rö̧ Egipto rȩjȩttö̧ rä'epö icuinödo.