Salam jiaka paohaya dumanai Gayus ¹ Walung tamabokul gareja lai Gayus namapanamungu, ku namuya tadalu mapadenungu. ² Olidadi buhagu, nyuwa ku habaya gimi. kapiaku na nyiami kaaigimi tamaga loli hadadona, tangara duka napa dami, tamoruku magaloli, marana na dewamu baaiya tamoruku magaloli. ³ Nyuwa lali bakuluya na atigu oli dadi buha bami mai bami panewiya ngera nama kalungu laiyiami, babeya bami moruku tadulana namapakalungu. ⁴ Nyuwa dana bakulma naatigu nama raihi pabakul walungu napa rangugu ta anagu bahalaku talara namakalungu. ⁵ Oli dadi buhagu, yiami mapahalakuya namapadenungu tadalu ngaradukana naparamami dumada daoli dadimi, langka tau padapenguya. ⁶ Nyiami mipa newiya ngerana napanamigimi tahaga kaboguru harani. nyiami mipa halakiya nama kalungu ngerana napadulangu lai duda banapatuwunya napahalaku waingupata napabuhanai mauri. ⁷ Duda dahalauku wainya na Ngaranai Mauri, daaimang padekida walung ta tau damawai. ⁸ Batauna nauka, duta kata dulaha da tau merang duda lapa duta kadadi oli rama hup nama kalung. Diofretes jiaka Demetrius ⁹ Nyuwa kutuliya nahuratu takaboguru harani, taka yi Diofretes, na buhangu bana raihi walungu lai duda, dana buhamagam yiama. ¹⁰ Batauna nau, duku maikaka, kaku panamunya duna napawoluna, bana panewi waigama yiama waingu panewina dama kalungu! Dakadama naka nau, duna dana buhajala mangbuhamangu ba aija daolidadina jiaka na hairuja jiaka nakahika duda dama walungu takaboguru harani. ¹¹ Oli dadi buhagu, abi kariloliha dama damakalungu, taka pakeringu tamakalungu. Natau nama ramaya nama kalungu walinai lai Mauri, taka natau nama woluya dama kalungu dana ita maya na Mauri. ¹² Ngaraduka natau namapanewiya nama kalungu ngera nai Demetrius, yiama kika mapanewiya, taka nyiami mipenya napawima yiami nama kalungu. ¹³ Duku lalu danguya napabuhang patuliya dumam au, taka daku buhamangu baku tuliya waingu pena jiaka tinta. ¹⁴ Nyuwa duku lalu buhang baku paraga dangagu kapeku panewi haga watungu. ¹⁵ Mumaga lolu hadadona. Da olimu yayi dapangidigu salam dumamu lapa da salam ma yiama dumada daolidadima natu.