1
Entón levantei os ollos e mirei, e velaquí, vin un home cun cordel de medir na man.
2
E díxenlle: Onde vas? E respondeume: A medir Xerusalén para ver canta é a súa largura e a súa longura.
3
Velaquí, cando o anxo que falaba comigo saía, atopouse con outro anxo
4
que lle dixo: Corre, fálalle a ese mozo e dille “Xerusalén será habitada sen muros, por mor da multitude de homes e de gando dentro dela.
5
E serei para ela- declara IaVHeH- unha muralla de lume ao arredor, e serei gloria no medio dela.
6
Ea, ea! Fuxide da terra do norte- declara IaVHeH- porque dispersareivos como os catro ventos do ceo declara IaVHeH.
7
Ea, Sión, ti que moras coa filla de Babilonia, escapa!
8
Pois así di IaVHeH dos exércitos, cuxa gloria me enviou contra as nacións que o despoxaron, porque o que vos toca, toca a niña do meu ollo.
9
Velaquí, alzarei a miña man contra elas, e serán despoxo para os seus escravos. Entón saberedes que IaVHeH dos exércitos me enviou.
10
Canta de xúbilo e alégrate, oh filla de Sión, porque velaquí, veño e habitarei no medio de ti- declara IaVHeH.
11
E moitas nacións uniranse a IaVHeH naquel día, e serán o meu pobo. Entón habitarei no medio de ti e saberás que IaVHeH dos exércitos me enviou a ti.
12
E IaVHeH posuirá Xudá, a súa porción na terra santa, e volverá escoller a Xerusalén.
13
Toda carne debe calar diante de IaVHeH, porque se levantou da súa morada santa.