¹ Por iso, temos que poñer máis atención ao que escoitamos, non sexa que nos desviemos. ² Pois se a palabra declarada por medio dos anxos resultou ser firme, e toda a transgresión e desobediencia recibiu xusto castigo, ³ como fuxiremos nós se descoidamos unha salvación tan grande? A que, despois de ter sido anunciada polo Señor, foinos confirmada polos que a escoitaron, ⁴ testificando Deus con eles, tanto por sinais como por prodixios, e por diversos milagres e dons repartidos polo Espírito Santo segundo a súa propia vontade. ⁵ Porque non someteu os anxos este mundo que está por vir, do que estamos a falar. ⁶ Mais un testemuñou nalgún lugar: "Que é o home para que te lembres del, ou o fillo do home para que o teñas en conta? ⁷ Fixéchelo un chisco menor aos anxos; coroáchelo de gloria e honor, e puxéchelo sobre as obras das túas mans; ⁸ sometíchelo todo baixo os seus pés". Porque ao estarlle todo sometido, non deixou nada sen lle someter. Mais agora non vemos tódalas cousas que lle están a ser sometidas. ⁹ Con todo vemos a Aquel que é pouco menor aos anxos, é dicir, a Xesús, coroado de gloria e honor polo padecemento da morte, para que pola graza de Deus gustara a morte por todos. ¹⁰ Porque conviña que Aquel, a través de quen son tódalas cousas, e por medio do que subsisten tódalas cousas, sendo quen de levar moitos fillos á gloria, perfeccionara por medio do padecemento ao autor da salvación deles. ¹¹ Porque tanto o que santifica como os santificados, son todos dun; polo que El non se avergoña de chamalos irmáns, ¹² dicindo: "Anunciarei o teu nome aos meus irmáns, no medio da congregación te hei louvar con cantos". ¹³ E outra vez máis: "Eu confiarei nel". E outra vez: "Velaquí estou, Eu e máis os fillos que Deus me deu". ¹⁴ Por iso , como os fillos participan de carne e sangue, El tamén participou disto mediante a morte para anular o poder daquel que tiña a morte, é dicir, o diaño; ¹⁵ e liberar a todos aqueles que por temor á morte están suxeitos a escravitude para toda a vida. ¹⁶ Porque de certo non vén axudar os anxos, senón que vén na axuda da descendencia de Abraham. ¹⁷ Por iso tiña que asemellarse aos seus irmáns en todo, a fin de que chegase a ser un sumo sacerdote misericordioso e fiel nas cousas de Deus, para facer expiación polos pecados do pobo. ¹⁸ Xa que El mesmo padeceu sendo tentado no sufrimento, é poderoso para socorrer os que son tentados.