¹ E aconteceu que no ano trinta, no cuarto mes, no quinto día do mes, cando eu estaba entre os cativos xunto ao río Quebar, abríronse os ceos, e vin visións de Deus. ² No quinto ano da deportación do rei Ioaquín, no quinto día do mes, ³ veu a palabra de Iahveh ao sacerdote Ezequiel, fillo de Buzi, na terra dos caldeos, xunto ao río Quebar; e alí veu a man de Iahveh sobre el. ⁴ Mirei, e velaí, viña do norte un vento de tormenta, unha grande nube e lume envolvente, e un resplandor redor del, e no medio do lume algo que semellaba bronce resplandecente. ⁵ E no medio del, a imaxe de catro seres viventes; e este era o seu parecer: tiñan semellanza de homes. ⁶ Cada un tiña catro caras e catro ás. ⁷ As súas pernas eran rectas, e a planta dos seus pés coma o pezuño dun becerro, e resplandecían coma bronce queimado. ⁸ Por debaixo das súas ás, aos seus catro lados, tiñan mans de home, e os catro tiñan cadansúas caras e ás. ⁹ E as súas ás tocábanse unha á outra; e non se volvían ao camiñar, senón que cada un ía cara adiante. ¹⁰ O aspecto das súas caras era coma a face dun ser humano, pero os catro tiñan tamén cara de león ao lado dereito; os catro tiñan cara de boi, á esquerda, e os catro tiñan tamén cara de aguia. Deste xeito eran as súas caras. ¹¹ Tiñan as súas ás despregadas cara arriba, cada un tiña dúas ás que se tocaban, e as outras dúas que cubrían os seus corpos. ¹² E cada un camiñaba segundo a orientación da súa face; onde o espírito os facía ir, ían; e cando ían, non se volvían. ¹³ E en canto á semellanza dos seres viventes, a súa aparencia era coma carbóns de lume acendidos, coma a aparencia de fachóns acendidos que camiñaban entre os seres viventes; e o lume resplandecía, e do lume saían lóstregos. ¹⁴ E os seres viventes corrían e volvían coma lóstregos. ¹⁵ Mentres miraba os seres viventes, vin unha roda que estaba sobre o chan xunto aos seres viventes, polos catro lados. ¹⁶ A aparencia das rodas era coma o brillo do crisólito; as catro rodas tiñan a mesma semellanza; e a súa feitura era coma se unha roda estivera encaixada no medio da outra, ¹⁷ para poder rodar nas catro direccións sen ter que xirar cando camiñaban. ¹⁸ As súas circunferencias eran altas e inspiraban medo, pois as catro estaban cheas de ollos arredor. ¹⁹ E cando os seres viventes camiñaban, as rodas ían xunto a eles; e cando os seres viventes se alzaban da terra, as rodas erguíanse. ²⁰ Onde o espírito os impulsaba a ir, alí ían; onde o espírito os impulsaba a ir, as rodas erguíanse detrás deles, porque o espírito dos seres viventes estaba nas rodas. ²¹ Cando eles ían, elas ían tamén; e cando se detiñan, elas tamén se detiñan; e cando se alzaban da terra, as rodas alzábanse detrás deles, porque o espírito dos seres viventes estaba nas rodas. ²² E sobre as cabezas dos seres viventes aparecía unha expansión semellante ao cristal marabilloso, estendida sobre as súas cabezas. ²³ Por debaixo do firmamento as súas ás estaban endereitadas, estendéndose unha cara a outra; e cada un tiña dúas ás que cubrían o seu corpo. ²⁴ E escoitei o balbordo das súas ás cando camiñaban, coma o balbordo de moitas augas, coma a voz do Todopoderoso, coma murmurio de multitude, coma o balbordo dun exército. Cando se detiñan, pregaban as súas ás. ²⁵ E cando se escoitaba unha voz no firmamento enriba das súas cabezas, detíñanse e pregaban as súas ás. ²⁶ E sobre a expansión que había sobre as súas cabezas había un trono que semellaba unha pedra de zafiro, e sobre o trono había un que semellaba un home sentado sobre el. ²⁷ E vin coma o resplandor de bronce acrisolado, e unha aparencia de lume arredor del enmarcábao no que parecía ser a aparencia dos seus lombos cara arriba, e do que parecía ser a aparencia dos seus lombos cara abaixo; vin a súa aparencia coma lume, e tiña un resplandor redor de sí, ²⁸ á semellanza do arco iris que está nas nubes no día da choiva, así era a aparencia do resplandor arredor del. Tal foi a visión da aparencia da gloria de Iahveh. Cando a vin, caín rostro en terra; entón escoitei unha voz que falaba.