¹ Cando Iahveh o teu Deus destrúa as nacións das que Iahveh che dá a súa terra, e ti as desaloxes, e habites nas súas cidades e nas súas casas, ² reservarás tres cidades no medio da terra que Iahveh o teu Deus che dá en posesión. ³ Prepararás os camiños, e dividirás en tres partes o territorio da túa terra que Iahevh o teu Deus che dá en posesión, para que fuxa alí todo homicida. ⁴ E este será o caso do homicida que fuxa alí e viva: cando mate ao seu próximo sen querer, sen odialo anteriormente. ⁵ Tal como cando un home vai ao bosque co seu próximo para fender leña, e ao botarlle a man ao machado para cortar a árbore, o ferro sóltase do mango e bate contra o seu próximo, e este morre, el poderá fuxir a unha destas cidades e conservar a vida; ⁶ non sexa que o vingador do sangue persiga o homicida en quente, e ao ser longo o camiño, o alcance e lle quite a vida, non sendo el merecedor de morte, xa que non o odiaba anteriormente. ⁷ Por tanto, mándoche, dicindo: haste reservar tres cidades. ⁸ E se Iahveh o teu Deus ensancha o teu territorio, como xurou aos teus pais, e che dá toda a terra que dixo que daría aos teus pais ⁹ (se gardas coidadosamente todos estes mandamentos que che mando hoxe, de amar a Iahveh o teu Deus e de andar sempre nos seus camiños), entón poderás engadir tres cidades máis, amais destas tres. ¹⁰ Deste xeito non se derramará sangue inocente no medio da túa terra que Iahveh o teu Deus che dá por herdade, e non serás culpable de derramar sangue algunha. ¹¹ Pero se hai un home que odia o seu próximo, e lle ande ao asexo, e erguéndose contra del, e féreo de morte, e morre e foxe a unha destas cidades, ¹² entón os anciáns da súa cidade mandarán a prendelo de alí, e entregarano ao vingador do sangue para que morra. ¹³ Non terás piedade del; deste xeito limparás de Israel o sangue do inocente, para que che vaia ben. ¹⁴ Non moverás os lindeiros do teu próximo, fixados polos antepasados, na herdanza que recibas na terra que Iahveh o teu Deus che dá en posesión. ¹⁵ Non se levantará unha soa testemuña contra un home por calquera iniquidade ou por calquera pecado que cometese; o caso será confirmado polo testemuño de dúas ou tres testemuñas. ¹⁶ Se aparece unha testemuña falsa contra alguén para acusalo dunha transgresión, ¹⁷ os dous litigantes hanse presentar diante de Iahveh, diante dos sacerdotes e dos xuíces que haxa neses días. ¹⁸ E os xuíces farán unha boa pescuda; e se a testemuña é unha testemuña falsa e acusou o seu irmán falsamente, ¹⁹ entón farédeslle a el o que el tentaba facer ao seu irmán. Así quitarás o mal de en medio de ti. ²⁰ Os demais escoitarán e temerán, e nunca máis volverán facer unha maldade semellante entre os teus. ²¹ E non terás piedade: vida por vida, ollo por ollo, dente por dente, man por man, pé por pé.