¹ Non son libre? Non son apóstolo? Non vin a Xesús noso Señor? Non sodes vós a miña obra no Señor? ² Se para outros non son apóstolo, polo menos para vós si que o son; pois sodes o selo do meu apostolado no Señor. ³ Esta é a miña defensa contra os que me acusan: ⁴ será que non temos dereito a comer e beber? ⁵ Será que non temos dereito a levar connosco unha esposa crente, así como os demais apóstolos e os irmáns do Señor, e Cefas? ⁶ Ou só Bernabé máis eu non temos dereito a non traballar? ⁷ Quen serviu algunha vez coma soldado a conta de seu? Quen planta unha viña e non come do seu froito? Ou quen coida un rabaño e non bebe o leite do seu rabaño? ⁸ Non digo estas cousas como humano, ou é que a lei non di o mesmo? ⁹ Pois na lei de Moisés está escrito: "Non porás bozo ao boi que trilla". Preocúpanlle a Deus os bois, ¹⁰ ou o di precisamente por nós? Si, escribiuse por nós, porque o que ara debe arar con esperanza, e o que trilla coa esperanza de ter a súa parte. ¹¹ Se sementamos en vós o espiritual, será moito que colleitemos de vós o material? ¹² Se outros participan deste privilexio sobre vós, canto mais nós? Con todo, non facemos uso deste dereito senón que o soportamos todo para non poñer ningún atranco ao evanxeo do Mesías. ¹³ Non sabedes que os que se adican aos servizos sagrados comen da comida do templo, e os que acotío serven ao altar, participan do altar? ¹⁴ Así mesmo ordenou o Señor que os que proclaman o evanxeo, vivan do evanxeo. ¹⁵ Mais non me aproveitei de ningunha destas cousas, e non o escribo para que se faga así comigo, porque para min mellor é morrer a que ninguén faga va esta a miña gloria. ¹⁶ Porque se predico o evanxeo, non teño nada de que gloriarme, pois levo enriba esa necesidade; e, ai de min se non predicase o evanxeo! ¹⁷ Pois se fago isto de xeito voluntario, salario teño; pero sendo por imposición, foime confiada unha mordomía. ¹⁸ Cal é, entón, a miña recompensa? Que predicando as boas novas, presente gratuitamente o evanxeo para non facer uso do meu dereito no evanxeo. ¹⁹ Entón, sendo libre de todos, fíxenme escravo de todos para gañar a maior número. ²⁰ Fíxenme xudeu para os xudeus, coa fin de gañar os xudeus; para os que están baixo a lei, como baixo a lei (aínda que eu non estou baixo a lei) a fin de gañar os que están baixo a lei; ²¹ aos que están sen lei, como sen lei (aínda que non estou sen a lei de Deus, senón baixo a lei de Cristo) para gañar os que están sen lei. ²² Fíxenme feble para os febles, para gañar os febles; fíxenme todo con todos, para dalgún xeito salvar a algúns. ²³ E fago todo por amor do evanxeo, para ser copartícipe del. ²⁴ Non sabedes que os que corren no estadio, todos á verdade corren, pero só un recibe o premio? Correde de tal xeito que o acadedes! ²⁵ Pero todo aquel que se esforza loitando aprende a conterse; de feito fano para recibir unha coroa corruptible, mais nós unha incorruptible. ²⁶ Polo tanto, eu corro deste xeito, non como sen ter meta; deste xeito pelexo, non como dando golpes ao ar, ²⁷ senón que dobrego o meu corpo poñéndoo en servidume, non sexa que téndolle predicado a outros, eu mesmo veña ser descualificado.