अध्याय १०
1
2
१)यीसु कोयु,मी तुमुह खोराखोर कोयतलु, ज्यु कुण मेंडा बुकडान वाडाम जाणेन जुपाखेर ओयतु नी, पुण दीहरा खेर ओयतु जाये ते,च्यु चुटु एने डाखु से। २) पुण ज्यु कुण वाडाम जुपाखेर ओयतु जाये ते,च्यु मेंडान गुवाव्यु से ।
3
4
३) जेतार च्यु गुवाव्यु ओवे ते,शाबान राखवावी कोरनारु जागल्युज जुपु उगाडतलु,एने मेंडा बुकडा गुवाव्यान बुली फारोकतला, एने तेरो होंबीन तीनाहाते आवतला,एने च्यु तीनुह तींदरो नाव दोरीन बुलाडतलु,एने बारथे चारने लीजातलु। ४) जेतार बोठा मेंडा बुकडान च्यु बारथे ली जातलु तेतार च्यु तींदरे ओगोव ओगोव चालतला, काहाके च्या तेरी बुली फारोकतला।
5
6
५) पुण जीनाह च्या नी जाणतला तींदरे फोसोव फोसोव नी जातला, च्या तीनाहाते दोखा सेटा दोवडी पोडे, काहाकी च्या ओनजावडान बुली नी जाणतला। ६) यीसु यु दाखलु ज्या माणहे हाते ओता तीनुह कोयु,पुण च्या तेरो मोतलोब नी सोमज्या
7
8
७) यीसु फोसु तीनाह कोयु , मी खोराखोर तुमुह कोयतलु मीज मेंडान कोरता जुपु से । ८) ज्या मेहे दोखा पेल आवला,च्या बोठा चुटठा ने डाकु से,पुण मेंडा बुकडा तींदरी बुली नी होंब्या। ( यिरमीयाह २३:१ युहन्ना १०:२७)
9
10
९) मी जुपु से,ज्यु कुण लागाडीन जुपाखेर ओयतु जाये ते, च्यु वाच जाहे ,च्यु माय एने बारथे आव जाव कोरतु रोयहे, एने तीनाह जीव आत्मामा वोडनेन कोरता जीव आत्मान खोणो जुडहे। १०)चुट्टु माणुह चुरने एने मारने एने नास कोरने ओतरूज आवतलु ,पुण मी माणहोह खोरली जीवाय,एने आखा दोखी हाजी जीवाय पुरीन पुरी आपणे आवलु से।
11
12
13
११) मीज हाजु गुवाव्यु से, हाजु गुवाव्यु तेर मेंडा बुकडान कोरता जीव आपणे बी तीयार रोयतलु। ( भजन संहिता २३:१, यहेजकेल ३४:१५) १२) ज्यु पोमहान कोरता ओतरु गुवावी कोरनारु से , च्यु मेंडा बुकडान मालीक नींबे च्यु लांडगो आवतलो देखीन मेंडा बुकडाह सुडीन नाह जातलु, एने च्यो लांडगो आवीन मेंडाह दोरीन इंखेर तींखेर कोर देतलो। १३) पोमहान कोरता गुवावी कोरनारु मेंडा बुकडान चींता नी कोरे कोरीन च्यु लांडगो देखीन नाह जातलु।
14
15
16
१४)मीज खोरलु गुवाव्यु से, जोहलु मार बाबु मेहे जाणतलु ,एने मी मार बाबाह जाणतलु तोहलो मी मार मेंडा बुकडान जाणतलु। १५) एने मार मेंडा बुकडा मेहे जाणतला,एने मी तींदरे कोरता मार जीव लोगोण आप देतलु। १६) मार उंजु बी दीहरा मेंडा बुकडा से, च्या इना मेंडा बुकडान वाडान नींबे,तीनुह बी मेहे लावणु जोरुडी से, एने एकुज गोवारु बोण जाहे,एने तींदरे एकुज गुवाव्यु रोयहे। ( यशायाह ५६: ८ यहेजकेल ३४:२३ यहेजकेल ३७:२४)।
17
18
१७) बोगवान बाबु मेहे मोंग कोरतलु, कोरीन मी मार जीव आपणे बी तीयार से ,पुण मी मोरन्यु एने फोसु मी जीवतु ओयण्यु से। १८)मारी मोरजी नी ओयेते कुण बी मेहे नी मार सोकतला,पुण यी मारी मोरजी से के,मी मार जीवोह मोरने होपतलु,मेहेपोर जीव आपणेन एने फोसु लेणेन बी आदीकार से,मार बोगवान बाबु मेहे एंहे कोरने हुकुम आपलु ।
19
20
21
१९) यीसु कोयलु ,यी वातु होंबीन येहुदी माणहे फोसा फाटाफुट ओय गोया। २०) तीनामायला होंटा माणहे कोया च्यु बुतडु बोरायलु से,च्यु ते गांडु से, एरो काहा होंबोवतला। २१) पुण दीहरा यो होंबीन कोया,बुतडु बोरायलु माणुह ओहली वातु नी कोर सोकतलु,बुतडु बोरायलु आंदवान डुवा,उगाड सोकतलु के।
22
23
24
२२) मोंदीर उदगाटण तीवारोन टेमे यीसु येरुसलेमोमा ओतु, च्यु ठोंठीन टेमे ओतु। २३) यीसु बोगवानोन मोंदीरोमा सुलेमान नावोन एक मांडवामा चालतोतु। २४) तेतार येहुदी जातिन माणहे ,तेर सोमखेर आवीन तीनाह गेर लेदया तीनाह फुसयातु आमरी आत्माह केतार लोगोण ठावफा मेकहे, जोर तू मोसी आहे ते आमहु होस कोरिन कोयदे ।
25
26
२५) यीशु कोयु ,मी तुमुह कोयलु ओतु के, मी मोसी से, पुण तुमू मेहे पोर बुरहू नी कोरया ,मार बाबान तापोमा ज्यो काय मी कोरलू ,ज्यु जो मार पुरावू से । २६) पुण तुमु बुरहुज नी कोरतला, काहाके तुमु मार मेंडा बुकडा नीम्बे।
27
28
२७) मारा मेंडा बुकडा मारी बुली होंबोवतला ,मी तीनुह जाणतलु एने च्या मार फोसोव फोसोव आवतला। २८) मी तीनुह ओमरा जीवाय आपतलु ,एने च्या कोदी मोरेज नी तीनुह मारा आथोम दोखा कुणीजनी सांडाड सोकतलो।
29
30
31
२९) मार बाबु ज्यु मेहे तीनुह आपलु ,एने च्यु आखा दोखु ताकोत वावु से ,तीनुह पोर आथोम, दोखा कुणीज नी साडाड सोकतला ।
३०)मी ऐने मार बाबु एकुज से ।
३१)तेतार येहुदी जातिन माणहे फोसा यीशुह मारने कोरिन दोगडा चुटया।
32
33
३२)बाकीन यीसु तीनुह कोयु ,मी मार बाबान मोरजी दोखु तुमरे ओगोव खुब हाजा कामे कोरिन देखाडतलु, तीनामायला काल्ला कामोंन कोरता तुमू मेहे दोगडा देणे हुततला । ३३)येहुदी जातिन माणहे जो पाप आपया ,आमु तार हाजा कामोन कोरता दोगडा नी देतला ,पुण तु एका माणहु से,सोतान मी बोगवान से कोयीन तु बोगवानोन नाव बोदी कोरतलु ।
34
35
36
३४) यीशु तीनुह जोपाप आपयु ,तुमू देवे सेताह एहे मी कोयलु कोरीन तुमरा नेमोमा लेखला यी वात तुमू मालुम नींबे
३५)जुनला वारामा जीनु पुडारिया माणहोनुह बोगवान तेरी वात पुचाडलू तीनुह लोगोण बोगवान देवे कोरिन बुलाडया तुमू जाणतला के बोगवानोन पोवितृ पुस्तकोमा लेखली वात कोदी नी टोवे।
३६) बोगवान बाबु मेहे नीवडीन पोवितृ कोरीन इनी कोवीमा मुकोललु ,जेतार मी बोगवानोन पुरुयु कोयलु ते मी बोगवानोन नाव बोदी कोरतलु ,कोरीन मेहे काहा कोयतला।
37
38
39
३७) जोर मी मार बाबान काम नी कोरतु ते तुमु मेहे पोर बुरहु जुण कोरता । ३८) बाकीन मी बाबान काम कोरतलु ती बी तुमू मेहे पोर बुरहु बी नी कोरे ,मार मोटला कामे देखीन ते बुरहू कोरजु, तेतार तुमू बाह बोगवान मार हाते से, एने मी बी तीना हाते से कोरिन सोमज सोकतला।
३९) फोसा च्या तीनाह दोरने हुदया,पुण यीशु तींदरा आथोम दोखु नीसटिन जात रोयु।
40
41
42
४०) यीशु फोसु योरदोन खुदरान पोल्लीखेर ज्याहरी पेल युहन्ना बपतींसमा आपतोतु च्यांहारी जायीन रोयु। ४१)होटा माणहे यीशु हाते आव्या, एने कोया युहन्ना खुब मोटला कामे नी कोरयु चयु ज्यो काम यीशु बारामा कोयलु ओतु ,च्यो खोरो निकोवलो। ४२)एने च्याहरी खुब माणहे यीशु पोर बुरहु कोरया।