१ अध्याय
1
2
3
१) कोवी गोडायणेन पेलेन बोगवानोन बुल ओतरुज ओतु,एने च्यु बुल बोगवानोन हाते ओतु, एने युज बुल बोगवान ओतु।
२)बोगवान आंखी कोव गोडायणेन पेलेन ,बोगवानोन बुल बोगवानो हाते ओतु।
३)एने बोगवान तीनाह लागाडी आखी कोवीमायलो आखो उबजाडयु ,एने बोगवान तेर बीगुर कायीज नी उबजाडयु।
4
5
४)च्यु बुल ज्यो का बोणलो आखानुह जीव आप्यु , एने तेर जीव आखा माणहोन जीवायमा उज्यावी रोयलो से।
५) एने यो उजावे आंदारलामा पीपलतो रोयो, पुण आंदाराह यो उज्यावो कोदी नी जीकायो। .
6
7
8
६)बोगवान एक माणहोह मुकोल्लु ओतु ,तेर नाव युहन्ना ओतो।
७) च्यु तीन उज्यावन बारामा आखा माणहोह कोयणे आव्यु,काहाके तेरी गोवायी होंबीन आखा माणहे तीना उज्यावा पोर बुरहु कोरहोत।
८) युहन्ना सोता उजावे नी ओतु, पुण च्यु तीना उज्यावान बारामा गोवायी आपणेन कोरता ओतरुज आवलु ओतु।
9
९) च्यु खोरो उज्यावो से, दुनिया मा आवीन आखा माणहोह उजावे आपणारु से।
10
11
१०) च्यु कोवी मा ओतु एने च्युज कोवीन आखा चीजे गोडलु, ती बी कोवीन माणहे तीनाह नी उवख्या।
११) च्यु तेर सोतान घरा मा आव्यु, पुण तेर सोतान येहुदी जाती मायला माणहे बी तीनाह नकार कोरला।
12
13
१२) पुण जोतरा माणहे तेर नावों पोर बुरहु मेकीन तीनाह मान्या, तीनु आखानुह बोगवाऩन तेर खास पुरया बोणावणे आदीकार आप्यु
१३) ज्या बोगवानोन पुरया बोणनार, तीदंरा आय बाबान मोरजीन इसाबे तीदंरा लुयोन मेवाप दोखा बी फोयदा नी ओया, पुण बोगवानुज तीनुह सोतान मोरजी दोखु उबजाड्यु।
14
15
१४) बोगवानोन बुल माणुह बोणीन तेर बाह बोगवानो पाह दोखु आव्यु, एने आपणा वीस्मा रोयु, एने च्यु आपुपोर खुब दोया कोरनार एने खोरु ओतु , बाह बोगवान तेर एकुज पुरयाह आपुह आपलु, तेरी मोहिमा आमु देख्या।
१५)एक दीह युहन्ना तेर बारामा माणहोह गोवायी आपतो ओतु,तेतार च्यु यीसुह देख्यु ,ते च्यु तीनाह आयडीन कोयु , मी तुमुह पेलेन कोयलु ओतु ,के एक माणुह मार फोसोव आवणारु से, च्यु मेहे दोखु खुब खास माणुह से, एने च्युज मेहे दोखु पेलेन ओतु, इनाज माणहोन बारामा मी वातु कोरतोतु।
16
17
18
१६) एने आमु पोर खुब कीव दोया देखाड्यु ,कोरीन आपुह उपरा चापरी कीव दोया जुडी।
१७) बोगवान तेर नेम मुसाह लागाडीन माणहोह आपलु ओतु , पुण बोगवान यीसु मोसीहोह लागाडीन च्यु कोतरु कीवात, एने दोयावु एने कोतरु खोरु बोगवान से कोरीन देखाडयु।
१८) कुण बी बोगवानोह कोदी नी देख्या, बाकीन बोगवानोन एकुज पुरयु ज्यु होमेस्या बाह बोगवानो हाते रोयतेलु से, च्यु बोगवान कुण से कोरीन माणहोह देखाडयु।
19
20
21
१९) युहन्नान गोवायी यी से के येहुदीन पुढांरी माणहे येरुसलेम दोखा थुडाक पुजाराह एने लेवी माणहोह युहन्ना पाह मुकोल्ला ओता, च्या युहन्ना पाह आवीन फुस्या के तु कुण से।
२०) युहन्ना तींदरे ओगोव काय बी नी लीकाड्यु ,पुण च्यु तीनुह खोरा खोर कोयु मी मोसी नीम्बे।
२१) ओवता च्या युहन्नाह फुस्या मोंग तु कुण से , तु एलीया से के , च्या फोसा फुस्या तु बोवीस्य कोयणारु से के, युहन्ना कोयु काय नी।
22
23
२२) च्या फोसा युहन्ना फुस्या जोर तु जेहे कोयतलु तेहे ओयेते तु कुण से, आमुह कोयाप,काहाके ज्या आमुह मुकोल्ला ओता तीनाह आमुह जोपाप आपणु पोडहे ,कोरीन तु तार बारामा काय कोयतलु।
२३) युहन्ना तीनुह कोयु बोवीस्य कोरणारु येसाया ज्यो काय कोयलु ओतु, तेहे पोरबुन कोरता वाट तीयार कोरु मार आवाज उजाडी जागामा आयोडने वालान आवाज से।
24
25
२४) फरीसी पोंथवालाक मुकोल्ला ओता, थुडाक माणहे युहन्ना पाह आव्या।
२५) च्या युहन्नाहा फुस्या जोर तु मोसी नीम्बे, नी ते एलीया नीम्बे, एने बोवीस्य कोरणारु बी नीम्बे ,ते तु काहा माणहोह बापतीस्मा आपतलु।
26
27
28
२६)ओवतु युहन्ना तीनुह कोयु मी ते तुमुह पाणी कोरीन बापतीस्मा आपतलु पुण तुमरे वीस्मा एक माणुह से तीना तुमु नी उवोखतल।
२७)मी पेल आवलागलु ती बी मी डुंगु वोवीन चाट्यना पोट्टी सुडनेन बी लायक नीम्बे। , २८)यो आखो यरदन खुदरान पोल्ली खेरला बेतनीया गावमा ओयलो से च्यांहरी युहन्ना माणहोह बापतीस्मा आपतोलु।
29
30
31
२९)दिहरे दिह युहन्ना तेर हाते यीसु आवतलु देखीन माणहोह एंहे कोयु ,देखु तु बोगवान मुकोल्लु मेंडो बुकडान बादान गीदलो से, च्यु दुनियान माणहोन पापोन माफी आपणे आवलु से। . ३०) एर बारामा मी पेलेन कोयतोतु,युज च्यु से एक माणुह मार फोसोव आवहे,च्यु मेहे दोखु मोटु से,काहाके मी पोयदा ओयणेन पेलेन च्यु ओतु।. ३१) च्यु कुण से कोरीन मेहे बी मालुम नी ओतो,पुण इसरायेली माणहे तीनाह जाणनु जुवे कोरीन ,मी बाणीन कोरीन बापतीस्मा आपणे आवलु से।
32
33
34
३२) एने युहन्ना गोवायी आपयु, मी बी तीनाह काय नी उवोखतोतु, पुण बोगवान ज्यु मेहे पाणी कोरीन बापतीस्मा आपणे मुकोल्लु,च्यु मेहे कोयु के पवित्र जीव आत्मा जीना माणहो पोर पेरवान रुपोमा सोरगोम दोखी तु उतोरतली देखहे,च्युज माणहोह पवित्र जीव आत्मा कोरीन बापतीस्मा आपणारु से। . ३३) एने मी देख्यु पवित्र जीव आत्मा,एक पेरवान रुपमा सोरग खेर दोखी आवीन तीना पोर उतोरली ओती। . ३४) मी यीसु हाते काय ओयलो देखीलु कोरीन मी खोरु पुरावु आपलु ,के ज्युज बोगवान पुरयु से।
35
36
३५) दीहरे दीह युहन्ना तेर दुय चेला हाते उबरोयलु ओतु।
३६) येसुह जातलु देखीन युहन्ना कोयु, देखु ,युज बोगवान मुकोल्लु मेंडा बुकडान गीदलो से।
37
38
39
३७) युहन्ना कोयलु होंबीन च्या, दुय चेला यीसु फोसोव गोया। . ३८) येसु फोसु फिरीन बाव्यु,च्या दुय चेला आवतला देखीन तीनुह फुस्यु,तुमु काय हुदतला एने च्या कोया हे गुरुतु काहरी रोयतलु। . ३९) येसु तीनुह कोयु ,तुमु आवीन देखु, च्यो होंबीन च्या यीसु हाते गोया, एने च्या देख्या ,के यीसु काहारी रोयतलु, तेतार माजणेक दीहोन च्यार वाज रोया ओता, तेतार च्यु यीसु हाते मुकाम रोयणे ओता।
40
41
42
४०) युहन्नान वातु होंबीन यीसु फोसोव गोयला ओता,दुयोमाय एकान नाव आंदरीयास ओतो, च्यु सीमोन पोतरसोन बायह ओतु।. ४१) च्यु तेर बायह सीमोनोह मीवायु,एने कोयु आमु वाचाडनारा मोसीहोह मीवायला जीनाह आमु मोसी कोयतला।. ४२) ओवतु च्यु तेर बायह सीमोनोह यीसु हाते लाव्यु, यीसु तीनाह देखीन कोयु ,सीमोन युहन्नान पुरया तु केफा मोजे पोतरस कोवायहे।
43
44
45
४३) दीहरे दीह यीसु गोलील जीलामा जाणे हुत्तोतु,पुण वाटे फिलीप्पुस नावोन माणुह मीवायु , एने यीसु तीनाह कोयु, तु मार फोसोव आव।
४४) आंदरीयास एने पोतरोस बेतसायदा गावोन ओता, एने फिलीप्पुस बी तीनाज गांव मायलु ओतु।. ४५) जेतार फिलीप्पुस नोथनीयेलोह मीवायलु तेतार , च्यु कोयु आमु यीसुह मीवाया ज्यु नाजरेत गांववालु एने युसुफोन पुरयु से, च्यु से , यु ज्यु मुसान कायदामा लेखलो से, एने बोवीस्य कोयणारा तेर वारामा लेखला ओता ,च्यु आमुह जुड गोयु।
46
47
48
४६)च्यो होंबीन नोथनीयेल फिलीप्पुसोह फुस्यु नाजरेत गांव दोखु काय बी हाजो काम ओय सोकतलो के ,ओवतु फिलीप्पुस तीनाह कोयु तु आवीन ते देख ले।
४७) येसु खेर नोथनीयेल आवतलु देखीन, यीसु कोयु ,यु खोरु इसरायेल जातीन माणुह से, एर मोनोमा काय बी डोंगडा नीम्बे। ४८) यो होंबीन,नोथनीयेल यीसुह फुस्यु मार बारामा तोंहो केहेक मालुम से, एने यीसु तीनाह कोयु, फिलीप्पुस तोंहो हादणेन पेल तु उंबरोन जाडोन नेचे ओतु तेतारेन।
49
50
51
४९)ओवतु नोथनीयेल यीसुह कोयु, ए गुरु तु बोगवानोन पुरयु से, तु इसरायेली माणहोन मोटलु राजा से।. ५०)यीसु कोयु, तु उंबरोन जाडोन नेचु ओतु, तेतारेन मी तोहो देखलु एंहे मी कोयलु, कोरीन तु मेहे पोर बुरहु कोरतलु के ,पुण इना देखा बी तु मोटला कामे देखहे। . ५१)यीसु तीनुह कोयु, मी तुमुह खोराखोर कोयोह तुम सोरग उगोडतलो देखहे, एने माणहोन पुरयाहाते बोगवानोन सोरगदुते उपोर चोडतला एने उतोरतला तुमु देखहोत।