¹ Ntunna in yene nkan gono kadura kidya din cinu utolu unuzu kitene kani. Iwa tursu ghe nin kuwut, a likashi wa di kitene liti me. Umuro me wa massin uwui a abunu me nafo tilem nla. ² Awa min kafa ninyert ncara me na kawadi foang, amini wa darda kubunu ncara ulime me kitene kurawa a kun cara ugule me kitene kutiyen. ⁴ Asa ututu kuzor une ngurno nwa din nworu nnyertin, nlanza liwui kitene kane nworu, "Nyeshe likot uliru ule na ututu kuzore wa belin. Nna uwa nyertin ba." ⁵ Gono kadura kanga na nwa yene a yisin kitene kurawa nin kutiyen, a ghantina ucara ulime me kitene kani ⁶ a silo nin le na adi uworu sa ligang-ule na ana ke kitene kani nin nimon ile na idi nan nye vat; uyii nin nimon ile na idi nan nye vat, a kurawa nin nimon ille na idi nan nye vat: "Na umong umolu kubi ma yituku tutung ba. ⁷ Ama lilo na gono kadura kin zore cinu uwulsunu kulantung me, ma imon inyeshin Kutelle ma nin kulu, nafo na awa belin acin me anan liru nin nuu me." ⁸ Liwuiye na nwa lanza kitene kane su uliru nin mi tutung, aworo, "Cang, sere kufa ninyerti kongo na kudi ncara ngono kadure ule na a yissin kitene kurawa nin kutien." ⁹ Nya ndo kini gono kadurawa Kutelle nbelin ghe aniyi kaffa ninyerte. A woroi nenge, "Sere kufe uli kunin. Kuma ti liburi fe gbagai, ana nnuufe, kuba yitu mamas nafo titong." ¹⁰ Nwa seru kafa ninyerte ncara ngono kadure nleo kunin. Ku wa di mamas nnuu nighe ta gbagbai. ¹¹ Ntong tiwui woroi nenge, "Uma kuru usu anabae tutung gbas kitene nanit gbardang, timin, tilem nin nago."