¹ Na Yisa wa yene ligozin nanite, a ghana kitene likup na a so kutyen, nono massu katwaa me da kitime. ² A puno uunuu atunna ndursuzu nanii a woro, ³ "Anan mmariari ale na iidi likimon Nloon Kutelle, kipin tigo Kutellẹ kin minere. ⁴ Anan mmariari ale na idi tiyom, iba se unonku nibinayi. ⁵ Anan mmariari anan lazun nkune-kune, bara ima su ugadun nyii. ⁶ Anan mmariari ale na idi kukpon nin kotuzu nayi nsu katwa kacine, ima ti nani ishito. ⁷ Anan mmariari ale na idin nin kune-kune, inung wang mase nkune-kune. ⁸ Anan mmariari ale na idinin nibinayi ni lau, inughere ma yenu Kutelle. ⁹ Anan mmariari anan gafizu lissosin limang, ima yiccu nani nono Kutelle. ¹⁰ Anan mmariari ale na idin tizu nani nanya niu bara katwa kacine, tigo kilari Kutelle maso tin mine. ¹¹ Anan mmariari anunghe na idin machu minu ulliru, iyoominu, ibelle minu kinuu nin nimon inanzang natimine, bara lissaning. ¹² Sun ayiabo kang nin lanzun mang, bara na uduk mine udyawari kitene kani. Nanere wang iwa yoi Anan bellu nliru nin nuu Kutelle ale na ina yarin minu. ¹³ Anunghre nto nyii ulele, asa nto nta rututu, miba ti inyizari miti mamas? Na midu nin katwa kacine tutung ba, asa igutuna minin ipatila nin nabunu. ¹⁴ Anughere nkanang nyii. Kipin kanga naki tardin kitene likup na ki nyeshin ba. ¹⁵ Nanere wang na anit wasa ita ula npitilla iwufu unin nanya kukuzung ba, sedei itarda unin kitin banju npitilla, unan niza anan kilare nkanang. ¹⁶ Sunan nkanang mine baltu nbun nanit vat, nani mati kogha yene adu mine, inan su liru Ncifn mine na adi kitene kani. ¹⁷ Na iwa yenje nafo nna dak nda musuzu uduka sa katwa nadura Kutelle ba. Na nna ndak nda musuzu ba, kuluzun tininari. ¹⁸ Kidegenari ndin bellu minu, uyii nin kitene kani ba malu, ama na ligbula sa fiyerte nanya nduka ma malu ba, se ikuluna imon ilenge na ina yerti nanya vat. ¹⁹ Bara nani, vat ulenge na apuro uduka cingilin nanya tiduka, anin dursuzo among isu nani, aba so unit ubene nanya kilari tigo Kutelle. Vat ulenge na adi dortu, akuru adursuzo tinin ima yiccughe unit udya kilari tigo Kutelle. ²⁰ Ndin bellu minu, asa na katwa kacine mine katin kan nanan dursuzu nan na Farisawa ba, na iba piru nanya tigo Kutelle ba. ²¹ Inan lanza uliru ulenge na iwa bellu anan burne, 'yenje iwa molu unit,' nin woru, 'ulenge na amolo unit apira nanya licin nshara.' ²² Meng ule din bellu minu, unit ulenge na ata tinanayi nin gwana, ama piru licin nshara. Ame ulenge na aworo ngwana, 'Fe ulalaghari!' Ama piru nacara tigo. Ulenge wang na woro 'fe di hem!' Ama piru nanya kuwu nla. ²³ Bara nani asa uma du nni nimon nfillufe nbun Kutelle, unin lizino nwo gwanafine dining nivira ninfi, ²⁴ suna imon fillufe na uwa nakpa ba. Tu kpilla udi kyele lisosinfe nin gwanafine, unin kpillin uda nakpa imon nfillufe kiti Kutelle. ²⁵ Yinna mas ikyele uliru nati mine nin lenge na adi cinu udu nin fi ngan Go a idutu libau ucin du kuti nsharawe, bara awa do ninfi kiti nnan su nshara, ame unan sharawe di nakpafi naccara kudugari, anin di pirinfi nanyya kutii licin. ²⁶ Kidegenari ndin bellu fi na uma nuzu nanya licin lole ba, se ubya vat nikurfung ilenge na idi dortufi. ²⁷ Ina lanza ulire na iwa woro, 'Yenje iwa nozo nin nawanin ndas.' ²⁸ Ama meng woro minu, vat ulenge na ayene uwani, ata kuna niyizi me nanya kibinai, amala usu linoni ningheri une. ²⁹ Andi liyizi ncara ulimefe din tizufi usu kulapi, kawurno linining ufillin. Bara uma katin fi nin caut nbara umong ugap kidowofe nana, nnun woru kidowofe vat piru nanya nla. ³⁰ Andi ucara ulime fe matifi kulapi, werne unin ufillin. Bara uma katinfi nin caut umong ugap kidowofe nana, nnin woru kidowofe vat piru nanya nla. ³¹ Iwa woro tutung, 'Vat nlenge na ako uwani, na anighe iyerte nmalu nilugma.' ³² Meng ule din bellu minu, vat na ako uwani me, andi na kitene kulapin nozu nin nalilime ba, ataghe unan nozu nin nnalilimeari une. Vat tutung ulenge na ayauna uwani ule na ina ninghe iyerte nmalu nilugma, adi kulapin nozu nin nawanin bidibidi. ³³ Tutung, ina lanza iwa bellu anit nayiri nburne, 'Yenje iwa su isilin kinu, ama sun imon ile na isulo mung kitin Cikilari.' ³⁴ Meng ule din bellu minu, na iwa su isilin ba, sa nin kitene kani, bara na kutet tigo Kutelleri; ³⁵ Sa nin kutyin, bara kiti na kiti liyisin nabunu Kutelleri, sa nin Urushalima, bara na kipin Ngo Udyawari. ³⁶ Na uwa sillo nin litife ba, bara na uwasa ukpilla titife tita tibo sa tisirne ba. ³⁷ Na 'kidegen mine so kidegen,' kinu mine so kinu.' Vat nimon ilenge na ikatin ilele, inuzu kitin Shetanari. ³⁸ Ina lanza iwa woro, 'Liyizi yita nnu liyizi, a liyini nnu liyini.' ³⁹ Ama Meng nworo minu, yinnan, icuce minu, Vat ulenge na aparshin kuwan ncara ulime, kpilaghe kucara ugule tutung. ⁴⁰ Andi umong bolo kultukfe, anin din pizuru udu ninfi kityii shara, sughe amuunu ugudunfe ku wang. ⁴¹ Andi umong tafi udi kaghe ncin fimel firum, can ninghe timel tiba. ⁴² Vat ulenge na atirinfi naghe, tutung yenje uwa nari ubalu nnit ule na adi nin su nbalu nimon kitife. ⁴³ Inan lanza iwa woro, 'Ta usu ndofin kupofe unari unan nivirafe. ⁴⁴ Meng woro minu, 'ta usu nnan nivira fe, usu anan tizufi nanya nniu nlira, ⁴⁵ bara inan so nono Ncifi mine ulenge na adi kitine kani. Ame din tizu uwui tutuzo kuneen nnan magunta nin nit ulau, asa a toltuno uwuru me tutung vat, kuneen nnan sali kulapi nin nan kulapi. ⁴⁶ Fewang ti usu nalenge na idi nin sufere cas, uyapin udukari umase? Na anan sesu ngandu dinsu nani wang ba? ⁴⁷ Andi udin su ilip nan linuwna nmang, nyaghari udin ukatina among? Na alumai wang din su nani ba? ⁴⁸ Bara nani sun lidu lidert, nafo na Ucif mine kitene kane di dert.