¹ Yisa yicila nono katwa me inung likure nan nawaba ligowe a na nani tigo kitene Nagbergenu inutuzung nani ndas, ikuru ishizin nin vat tikonu a nsalin cine nidowo vat. ² Nene tisan nono katwa we inung likure nan nawabe wadi ne. Unan cizune, Simon (urika na awa yicughe Bitrus), a Adrawus gwane; Yakub usaun Zabadin, nin Yuhana gwane; ³ Filibus, nin Batalomi; Yakub usaun Alpensus, nin Tadawus; Simon unan pizuru tigo nati, nin Yahuda Iskaroti, ulenge na ama lewughe. ⁵ Ale likure nan nawabe Yesu wa tuu nani. a wunno nani atuf aworo, "Na iwa do kika alumai duku ba, tutung yenjen iwa piru kan kagbirin Samariya. ⁶ Nana na can kilarin nakam nwulun Israila. ⁷ Tutung asa inya, belen nani uliru Kutelle iworo, "udak kipin tigo Kutelle nda duru.' ⁸ Shizinon nin nanan tikonu, fyan anan kul, wesen anan tikutulu, tutung nutuzunon agbergenu. Inan filin munari, anung wang filizinang. ⁹ Na iwa yiru fizinariya, azurfa sa fi jangaci tika mine ba. ¹⁰ Yenjen iwa yaun nkan cin bara ucin mine, sa altuk aba, sa akpata, sa ucan ncin, bara unan katwa ma diru imonli me ba. ¹¹ Vat kagbiri sa atii alenge na ipira, pizira ulenge na ado Kutelle nanye, isoku udu lilongo na ima nyiu. ¹² Asa idin piru nanya kilare, lisonnani. ¹³ Iwa kawu minu mang na ayi asheu mine so nanghinu, anna ikawa minu mang ba na ayi asheu mine kpilin kiti mine. ¹⁴ Inung tutung alenge na Isere minu ba, a na ilanza uliru mine ba, iwa nya yiu kilari kane sa kani kagbire, kotinon lidau nabunu mine. ¹⁵ Kidegen ndin bellu minu, anan Sodom nin Gomora ma katinu nin lanzu mang lirin shara nin kani kabgwere. ¹⁶ Yenen, nto minu ndas nafo akam nanya niyiyo, bara nani, yitan jijin nafo iyii ikuru iyita sa unanzu nimon nafo awulung. ¹⁷ punon iyizi anit mung! Iba du ninghinu ubun nago, tutun nanya natii nlira mine iba kpizu minu. ¹⁸ Iba kuru ida ninghinu ubun na gomna nan nago bara meng, uma so nafo ushaida nanya nalumai. ¹⁹ Iwa do ninghinu kiti mine, yenje iwa fo kidowo kitene nimon ilenge na ima bellu, bara imon ilenge na ima bellu ima niminu nanyan koni kube. 20 Bara na anughere ma su ulire ba, Uruhu Kutelle nanya minere ma liru. ²¹ Gwana ma lewu gwana idi molu, Ucif tutung gonome. Nono mafitu mayardang nin nacif mine inin tizu nani idi molsu nani. ²² Anit vat ba nari minu bara lissaning. Ama vat nlenge na atere kibinayi udu liganye, ama se utucu. ²³ Iwa kara minu nka kagbiri, con udu kan, bara kidegenere idin bellu minu, na ima nuzu vat uduru nigbirin Israila ba, gonon Nit ma dak. ²⁴ Na gono unan masu wasa akata unan dursuzu me ba, sa kucin yita nbun Cikilari me. ²⁵ Ubatina ame unan mase so nafo unan dursuzu me, nanere kucin nafo Cikilari me, iwa yicila Cikilare Belzubal, ma ngbardang nanzu nale na idi nanya kilari me ma yitu nyizari! ²⁶ Bara nani, na iwa lanza fiu mine ba, bara na imomong duku na itursun, ilenge na ima punu ba, a na imong duku ilenge na iyeshin ile na ima yinnu nin ning ba. ²⁷ Ilenge imon na Nbellin minu nanya nsirti, bellen ining nin wui, tutung ile imon na ilanza baat nin natuf mine,ghanan kitene kilari ibellin ku. ²⁸ Na iwa lanza fiu nle na ama molu ka kidowe ba, ama na awasa amolo ulai ba. Na lanzan fiu nlenge na awasa amolo vat ka kidowe nin laiye nla saligan. ²⁹ Na niwulun niba idin lesu ni nin nin nikurfu baat ba? Vat nin nani, karum wasa ka deu kutyin sa uyirun Cif mine ba. ³⁰ Titi litife wang ayiru timashi nari. 31 Na iwa lanza fiu ba, ikatin niwulung nane nin gongon. ³² Bara nani, vat nlenge na a yinna nin mi nanya nanit, Meng wang ma yinnu ninghe nbun Ncif ning, ulenge na adi kitene kani. Ame tutung ulenge na anari nbun nanit, meng wang mmanari ghe nbun Ncif ning, ulenge na adi kitene kani. ³⁴ Yejen iwa kpilza nna dak nin lissosin limang nyie. Na nna dak nin lissosin limang ba, nna dak nin kusangaliari. ³⁵ Bara nna dak nda dunjo unit nin cifme, a ushono nin name, a uwul nin nanlesme. ³⁶ Anan nivira nin nit ba yitu anan nanya kilari me. ³⁷ Ame ule na akatin nin su cif sa uname nbun ning na abati unan dortu ninghe ba. Tutung ame ulenge na akatin nin su nshonome sa usaunme, na abatin unan dortu ning ba. ³⁸ Ame ule na ayauna kucan nkotunu me adofini ba, na abatin unan dortu ninghe ba. ³⁹ Ame ule na ase ulai me aba diru unin. Ame tutung na adira ulai me bara meng, ama se unin. ⁴⁰ Ulenge na asere minu, asere mengku, ame tutung na aserai, asere ulenge na atoyi. ⁴¹ Ame ulenge na asere unan liru nin nu Kutelle ama seru ulada nna liru nin nu Kutelle. Tutung ame ulenge na asere unit ulau bara adi unit ulau, ama seru ulada nnit ulau. ⁴² Vat nlenge na ana umong nanya nabebene alele, ka kop nmyen micancam asono, bara ame unan kadura Kutelleri, kidegen nbellin minu na ama diru ulada me ba."