¹ Nuwana ning, na iwa dortu uyinnu sa uyenu un Cikilari bite Yisa Kristi, Cikilari ngongon, nin su liti sa maferu feru ba. ² Asa umong npira ada se minu nan nya lisosin mine nin ficancan fin zinariya nin nimon igegeme, umong tutun pira kikimon unan diru nimon nacara nin nimọn ndinong, ³ anung ani nceo ayi mine kiti nnit unan nimon igegeme, inin woroghe ''cikusu da so kiti kigegeme'' inin woro unan diru nimon nacare, ''Yisina kikani'' sa ''So nabunu ning,'' ⁴ na anughe din su ushara nan nya nati mine, iso anan shara nin kpilizu unanzan ba? ⁵ Lanzan nuwana nayi ningh, na Kutellẹ na fere anan sali nimon nacara in yih ulele iso anan nimon nan nya yinnu sa uyenu nin sen gadu tigoh na awasu likawali udu kiti nale na idumun su me ba? ⁶ Anunghe nin di yassu anan diru nimon nacara! Na anan nimon nacarere din yoh minu bå, na inunghere din cin ninghinu kutẹin nsharawe bå? ⁷ Na anan nimon nacarere din nanzu lisa ligegeme longo na iwa yicila minu mun ba? ⁸ Vat nin nani asa ukulo uduka tigowe nafo na ina yertu nan nya liru Kutellẹ, ''Uma su usü nnan lisosin kupofe nafo litife,'' usu gegeme. ⁹ Nin nani asa ufere among usu nani imon icine, udin su kulapi, ushara nkifofi ina nin so anan nalapi. ¹⁰ Ulenge na adoffino uduka vat, aminin tana nan nya nrum cas, aso unan tanu nan nyan duke vat. ¹¹ Ame Kutellẹ na ana woro "Na uwa su uzina ba,'' amere kuru aworo ''na uwa molsu anit ba,'' andi na usu uzina, umini na molo unit, uso unan kalin duka Kutellẹ. ¹² Nani imon ile na idin bellẹ na iso innare idin sue, nafo na ale na iba sunani ushara nbuntu. ¹³ Bara ushara din dasu sa nkune-kune kiti nalenge na idin dursu nkune- kune ba. Nkune-kune din li likaran shara. ¹⁴ Iyaghari gegeme nuwana nin assa umonn nworo adumun nin yinnu sa uyenu a na ayita nin katwa kacine ba, uleli u yinnu sa uyene wasa utuchu-ghe? ¹⁵ Asa gwana kilime sa kishono din pizuru nimon shonu kidowo nin nimonli liyirin, ¹⁶ umaong nan nya mine woro nani ''cang idi so mang, ilanza momo illi ishito, a na anung in nin nani imonle na idin pizure bara kidowo ba, iyaghari ngegeme? ¹⁷ Nanere wang unin uyinnu sa uyenu andi na katwa kacine duku ba, libiari. ¹⁸ Vat nani asa umong woro, ''Fe dumun yinnu sa uyenu, a meng yita nin katuwa kacine,'' dursai uyinnu sa uyenu fe sa katuwa, meng ba dursu fi uyinnu sa yenu ninghe nan nya katwa nighe. ¹⁹ Uyinna Kutellẹ kurumari nanere. Agbergenu wang in yinna nani ketuzu. ²⁰ Udi nin su uyinin wangha unit ulala, nworu uyinnu sa uyenu sa katuwa uso hem. ²¹ Ndunsu ame Ibrahimẹ, uciff in yinnu sa uyenu bite wa se useru kiti Kutellẹ bara katuwa kacine na awa nakpa gono me Ishaku kiti Kutellẹ? ²² Uyene uyinnu sa uyenu me na cinu nin katuwa me, nanere wang katuwa me na kulo nan nya yinnu sa uyenu me. ²³ Nanere uliru Kutellẹ wa kulo na uwa woro "Ibrahim wa yinnin nin Kutellẹ, unnere iwa bataghe unan fiu Kutellẹ." Bara nani iwa yicughe udondon Kutellẹ. ²⁴ Uyenẹ, kiti katuwari unit nse usurtu, na kitenen yinnu sa uyenu chas ba. ²⁵ Nanere wang Rahap ukilaki wase usurtu bara katwa kacine, kubẹ na awa seru anan kadura, a duro nani long libau ugang? ²⁶ Nafo kidowa sa nfip libbiari, Nanere wang uyinnu sa uyeni sa katuwa libbiari.