¹ Tambuleni nkala uoshe nazheye mu luthselelo, keti mumu paye na kumu kuania. ² Muntu umo ali na luthselelo mukulia nkala vioshe, mukuavo cho ua kuzheya alia lika vushuka vua mbuto. ³ Ou uekulia vioshe keti a thembulule mukuavo uoshe kekulia vioshe, nauje kekulia vioshe keti apayethe mukuavo muka kulia vioshe. Muomu vavenia Kalunga namu tambula. ⁴ Yove iya cho, ove upayetha ngamba yambala? Kumesho a shokuaina kuakeko kuemanena ndi uila. Vuno honi vaka mu katula, muomu Muene kuatha kumulinga akatuke. ⁵ Muntu umo amona litangua limo ngue lia tuvakana akuavo. Mukuavo cho amona matangua ngue alifua. Muntu ku muntu aliuvue muachili ngue munai mana endi. ⁶ Uoshe uje amona litangua; ali muena muli Muene, nauje alia, alila muli Muene, muomu ashangala Kalunga. Uoshe uje kalile, alikelela kulia omo lia Muene ; nendi lalo ashangala kuli Kalunga. ⁷ Muomu naumo uetu uahi aliovokela endi vavenia, nambe na umo uahi lalo ali thsila endi vavenia. ⁸ Muomu ambe tuovoka, tuovokela omo lia Muene, nambe tuthse, tuthsila omo lia Muene. Keho nambe nga tuovoke ndi tuthse, nolo tuvantu vaKalunga. ⁹ Muomu ku vutumbe ovu Kilistu ua thsile keho uovokele lalo, linga a pue Muene ua voshe vathsa nava va yoya. ¹⁰ Vuno honi ove, vika upayethela munanoko? Nove lalo vika uthembuluila munanoko? Muomu tuva voshe tukemana kulutue lua chituamo cha chithompelo cha Kalunga. ¹¹ Muomu vana vi thono, "Ngue munjovoka," nguendi Kalunga, "mavuli oshe aka nthsikama, na nkala ndaka ika li tavela kuli Kalunga." ¹² Keho ngechi, nkala uetu uoshe aka hana vukaleho vuendi vavenia kuli Kalunga. ¹³ Keho honi keti tuli hithe yetu vavenia, vuno honi tokola evi, uahi a hakela munaina livue apunduke mo ndi choshe chije chimu tanganetha. ¹⁴ Ange njina zhivuka na kulitombola na Muene Yesu nguange viahi via ku li jualetha avio vavenia. Uje lika amona nkala chuma nguendi cha ku juala, kuli yendi cha juala vene. ¹⁵ Ambe u vavaletha munanoko ku mbunge muomu lia viakulia, ku uende lalo mu chilemo. Keti u vihithe uoshe uje ua thsila Kilistu na viakulia viove. ¹⁶ Ngechi honi keti utavethele vije vi ua mona nguove via chili vavi kuanie nguavo via kuvihia. ¹⁷ Muomu vu Muene vua Kalunga keti via viakulia ndi via kunua, vunoni vua vuchili, chivovo, na kujolela muli Spilitu ua kujela. ¹⁸ Muomu uje apangela Kilistu mu chifua echi ikeye uva na tambula kuli Kalunga keho lalo vantu vana mu tava. ¹⁹ Keho ngechi tushuameni vuima via chivovo na viuma vije vili tunga helu lia vikuavo. ²⁰ Keti muvihithe vipanga via Kalunga omo lia viakulia. Vuima vioshe via toka, vuno honi keti mua chili muntu alie nkala chuma chije chi lingitha umo a punduke. ²¹ Keti mua chili ulie nthitu, nambe kunua viniu, nambe kupanga chuma chije cha punduka munanoko. ²² Luthselelo lu ua kala naluo, lupue luove naKalunga. Na vezhika uoshe uje ajeneka kuli payetha yendi vavenia kuli evi via tavethela. ²³ Uoshe a takania a paya ambe alia, muomu kuvia tundile ku luthselelo. Keho vioshe vije via jeneka kutunda ku luthselelo vikevio mulonga.