¹ Tiango, mukuamanda ua Kalunga na Muene Yesu Kilistu, kumixovo ije likumi na yivali yina xandoka chihindu cheni! ² Vamunaina vavamala, vioxe vitumbuleni kujolela kuoxe momumona vietheko viavio na viavio. ³ Muna dthivuka ngechije kuetheka kua kuthselela kueni kulinga kukakatela. ⁴ Keho kukakatela kulinge vipanga viakuo via ku janguluka, linga eni mujanguluke mupue vamutuntu, keti mujeneke nakamo kahi. ⁵ Vunoni nga umo ha kati keni na jeneka mana, Alombe kuli Kalunga, Ou ue ku hana-hana via vingi ku voxe keho keti mbunge koka; keho vaka muhana. ⁶ Vunoni ikeye alombe mu kuthselela, keti na kutakania. Muomu nga umo atakania ali ngue linkimba lia mundonga ya Kalunga lije liekuenda kumpundthi lipekumuka. ⁷ Ngocho uje muntu keti athinganyeke nguendi aka uana vimo via kutunda kuli Muene; ⁸ Ikeye muntu ua vimbunge vivali, muka ku tenguluka muvingila vienda vioxe. ⁹ Keho munaina uetu ua mundende ali pambe muomu vukama vuendi, na muka kufuka muomu vana muhaka kua kundende, ¹⁰ vunoni aka thsa ngue nchani ya mumuila. ¹¹ Muomu litangua lie kutumbuka na mixa ya thsimika na kumitha muila. Nchani iuako na kuvuaha kuayo kunalenge. Mungila imo lika, muka kufuka aka lenga hakati ka vungendthi vuendi. ¹² Ua vethuka muntu uje akoletha muku muetheka. Ngocho kunima na hiti via kumuetheka , a uana chilongo cha muono, chi vana thselelethela kuli vaje vayongola Kalunga. ¹³ Keti umo akuanie omo vana muetheka, "Vana njetheka kuli Kalunga," muomu Kalunga kuye ku muetheka mpundthi yakujuala, nambe ikeye vavenia kekuetheka na umo uahi. ¹⁴ Vunoni nkala muntu ekumuetheka maxungu endi vavenia, kumukoka na kumutuala kuakuo na kumuxuangela. ¹⁵ Kunima ya maxungu ana kulu, athema vupi, kunima ya vupi vunakulu, vuka thema kuthsa. ¹⁶ Keti mutanguke vamunanana vavamala. ¹⁷ Nkala vuana vua chili na nkala vuana vua kuxungama vua kutunda kuilu. Vuekuxelela hanthsi kutunda kuli ixe ya vieke. Kuli ikeye ku kuakele kutenguluka nambe chivule cha kutenguluka. ¹⁸ Kalunga ua hangula kutuhana kuthema na mejui a vuchili,linga tu kale vuxuka vua kulivanga vua kutanga kuendi kuoxe. ¹⁹ Muna thivuka evi, va munana vavamala vonjayongola: Nkala muntu athambule mu kuvua, alivandeke muku kuania, va livandeke vukalu. ²⁰ Muomu vukalu vua vantu kuvuatha kupuithamo vuchili vua Kalunga. ²¹ Ngocho vene vutuleni vupi vuoshe via ku juala na kuilana kua viuma via vupi. Mukuthilikinia uana lijui lio vana tombeka, liatha kuovola miono yeni. ²² Pue ni vaka kupanga keti vaka kuvua, kuli kuitha ove vavena. ²³ Muomu nga umo mu ka kuvua lijui keti muka kupanga, na li fu ngue muntu uje ali tala ku vuaha kua chihanga cheni mukatalelo. ²⁴ Ali tala va vena keho aya oho vene evala mua na fu. ²⁵ Vunoni muntu uje a tala vuino mu mashiko achili a kuvutuka, na kushuika ko kupanga ngocho, keti apue lika muka kuvua na kuivala, muntu ou a ka vethika mu vipanga vieni. ²⁶ Nga umo athinganieka ngechije ikeye muka ku lemesa na ikeye katha kutakametha ndaka yendi; na kuitha mbunge yendi na kulemesa chendi cha ngocho. ²⁷ Kulemesa cha vuino-vuino cha kuthena kupihitha kumesho a Kalunga na ishe akuathe vakujena va ishe yavo nava ntuluue muku vavala chavo, na kulinuinga ove vavenia kumathilo a mavu.