¹ Vuno honi mumamala umo ua kumushovo uavo ua Levi. Uambatele mukentu ua kumushovo ua Levi. ² Mukentu ouo uakele na mivila ivali ngoco uathemene munike ua liala. Omuo mua mumuene nguendi munike uacili muamo ua kuvuaha, vamu shuekele ha vingonde vitatu. ³ Vuno honi hahetele hanthimbu ije uajenekele kuatha kumushueka, ua tambuile cikesa ca makovi ua cizhika mbetume na ngongoshi. Ngoco vahakelemo munike ouo keho uacitua vaka cihaka kumahongo kumukulo ua ndonga. ⁴ Munaina ua mukentu uemanene hale navo atale nguendi vika vimuuana mukuenje uendi. ⁵ Muna ua muene Falao ua mukentu ua shelele kundonga linga akatane hanthi oyo avo vana vava vendele navo venda kunchongo ya ndonga. Vamona cikesa muma hongo keho va tuma umo ua vana vavakentu vendele navo linga vaka munehele cho. ⁶ Omuo honi mua chitukuile, ua uanenemo munike ua mumala. Taleni, munike ualilile. Uamu vuililile ngozhi nakuhandeka nguendi; ou muvu cili umo ua vana vava Hevelu. ⁷ Hakeho munaina uamunike ouo uahandekethele muna Falao nguendi, "Kuatha njiku uanene mukentu uaka Hevelu aku kulelele mbututu ou?" ⁸ Muna Falao uamukumbuluile nguendi, "Yauye," muna mukentu ouo uayile uakaneha vaina ya mbututu. ⁹ Muna muene Falao uamukentu ualekele vaina ya mbututu nguendi, "Tambula mbututu uka njileleuo, njika kufueta vimbongo." Mukent ouo uaka Hevelu uatambuile munendi ua kamulela. ¹⁰ Omuo muakulile munike, vamuhana kuli muna muene Falao, kumupuitha ngue munendi. Muna muene Falao ualukile munike ouo Mosesa na kuhandeka nguendi, "Mukonda njamu uanene mundonga. ¹¹ Omuo muakulile Mosesa, uayile kuva vushoko vuendi naku katala vipanga via kulema viva va pangethele. Ua muene muka Ingito apupa ka Hevelu, umo uava vushoko vuendi. ¹² Uatalele noku-noku, omuo mua muene nguendi uahi aliko, ua thsihile muka Ingito keho uashitika muvila uendi mulivu. ¹³ Ua tuhukile litangua lia ku shuama ki, Keho Taleni, Vamala vavali vana Hevelu vali pupile. Ua handekethele ho uje ka kele mavu cili, "Vika u pupila mukueni?" ¹⁴ Vuno honi mumala ouo uamu limbuluile nguendi," Iya uakuhana vukuluntu nakupua muka kutu panguitha hakati keti? Uyongola kunji thsiha ngue honi muna kathsihile uzhe muka Ingito?" hakeho Mosesa ua vuile liova naku handeka nguendi," Vinjui na kapanga vana vizhivuka vantu. ¹⁵ Hano honi omuo mua viuvuile Muene Falao, Ua yonguele kuthsiha Mosesa. Keho honi Mosesa ua teua kuli Muene Falo uaku kala muimbo lia kuluka Mindiane. Omuo muimbo olio uaku tuma mene hali thima lia mema. ¹⁶ Umo mukuluntu ua ci kungulukilo uamu Mindiane ua kele nava vendi vava mpuevo va kupua mutanu navavali va ile, Muku tekula mema, a shulithile ma avto avo vaka nuithe vutangua vua ishe yavo. ¹⁷ Vaka kulitha vi nzhui ve zhile va vetheka kuva sheka-sheka ko, Keho honi Mosesa ua ya uaka va kuatha. Keho uakava hanena ko mema kuvu tanga vua ishe yavo. ¹⁸ Omuo vana vava kentu va ile kuli Leuele ishe yavo, Ua handekele, " Vika muna hetela hembolelo nalitangua alio naku toka kuahi? " ¹⁹ Vahandeka nguavo, " Muka ingito umo na tuo hiela kuva ka kulitha vi nzhui. Ikeye naua natu tekuila ko mema naku tu nuithila vutanga vuetu," ²⁰ Ua handekethele vana vendi, " Keho kuiko ali? Vika muna muthila mumala ouo? kamu thaneni akulie kumo netu." ²¹ Mosesa ua tavele kukala hembo lio ou mumala, uzhe ua u hanene munendi Zipola kupua mpuevo yendi ua kua mbata. ²² Mpuevo yendi ua themene kanike uamu mala keho Mosesa uamu lukile Ngelesome; Ua handekele," nja ku tunga`mucifuti ca mbala." ²³ Nthimbu ya laha ya hitile ho, Muene ua Ingito ua thsile. Vana va Isaleli vali telelele mukonda lia vipanga via kulema via vundungo. Valilile muku tonda kuva kuatha, Kulila na kuli nienga kuavo kua ka hetele kuilu kuli Kalunga Tata mukonda vakele vaku shokeya. ²⁴ Omuo Kalunga Tata vo vuile kuli nienga kuavo, Kalunga Tata va vulukile liyave thano liavo na kuku yetu Avilahama, Isaka, na Yakomba. ²⁵ Kalunga Tata va Muene vana va Isaleli, Keho vo vuile tuyando tuavo.