¹ Ngoco Kalunga Tata ua lekele Mosesa, "Kanda kuli vuvezhi vumo vunji ka neha hali Falao na Ingito. Kunima yaco, aka miecela linga muye mutunde muno. Omuo mua ka miecela linga muye, aka misheka-sheka nanzhili yoshe muku mitundithilila mu cifuti cendi. ² Lekeni, vantu ngueni nkala mumala na nkala mpuevo alomba muhiato uendi Palata nambe olu," ³ Nthimbu eyi Kalunga Tata na lingitha vaka Ingito linga vakale navuthona vua kuneha ciyulo kuvi mbunge viavo. Muku vuezhako, mumala uzhe Mosesa ua puile muka vu cili mumesho avaka kupangela Falao naku vantu vamu Ingito. ⁴ Mosesa ua handekele, Kalunga Tata na handeka evi; "Mukati kama tshiki njika hita mu Ingito. ⁵ Vanike voshe vakuli vanga mu Ingito vaka thsa, Kutundilila kuli muna ua kuli vanga ua Falao, uzhe ua tumama mu cipundi cavu muene, kutuala kuvana voshe vakuli vanga vavi ndungo viavo vava mpuevo vazhe vali kunima muku tua vunga, amba kuvana voshe va kuli vanga vavi muna viavo. ⁶ Hakeho ku kuzhe kuli tetela kua kama mu Ingito yoshe, Kuzhe kanda va mone lumo na kuli tetela kuaco kuku ka kala ko na. ⁷ Vuno honi nambe katali na umo uahi aka vuozha nambe umo ua vantu va Isaleli, Akale muntu ndi kathitu. Mungila eyi muka zhivuka ngueni ange nji panga neni nava ka Ingito muvi ngila via kuli tepa. ⁸ Voshe vaka kumi pangela, Falao, Vakeja kuli ange na kutua mavuli avo. Vaka handeka, ''Kaye, Yove na vantu voshe vaka kuku shuama!'' Kunima yaco"njika tuhuka,'' Ngoco ua tuhukile atunde kuli Falao navu kalu vua kama. ⁹ Kalunga Tata ua lekele Mosesa, '' Falao kaka mitolilila. Evi kulingila njika pange vikomoketha via vingi mu Ingito.'' ¹⁰ Mosesa na Alone va pangele vikomoketho via kama kumesho a Falao. Vuno honi Kalunga Tata ua kolethele mbunge yendi ngoco Falao kecelele vantu va Isaleli va tuhuke mu cifuto cendi.