¹ Aa akeo madthina avana va Isaleli vaje vazhile ku Ingito na Yakomba, muntu ku muntu uezhile na vushoko vuendi: ² Luvene, Simoni, Levi, na Yunda, ³ Isakale, Zembulone, na Mbenjamini, ⁴ Ndani, Nafatali, Ngande, na Asele. ⁵ Vantu voshe vaje vapuile vatekulu va Yakomba vapuile vantu makumi atanu na avali. Yosefa nthimbu oyo endi uakele laja mu Ingito. ⁶ Mukemo honi Yosefe, vamu naina voshe va vamala, na limo lije lioshe vathsile. ⁷ Vana va Isaleli vapuile vaka luvembo luacili, va lithemene muakama mukuvatanda, amba na vapuile vantu va ndhili muakama, vashulithile muhela uoshe uva vahanene. ⁸ Hano honi kuedhile muene ua muha mu Ingito, uje kazhivukile Yosefe. ⁹ Uahandekele na vantu vendi, "Taleni, vana va Isaleli vavengi muakama muku vatanda avo lalo vali na ndhili kutu tuvakana yetu. ¹⁰ Ijeni, tuva luithe namana, ambe ngoco va livuedhelela kuilana, nga ndhita ija, vaka livuezha kuli vaka vidthindo vietu, vaka tuluitha, nakutha livu lietu. ¹¹ Mukemo va vahakelele vaka kuva paketha na vipanga via kulema. Vana va Isaleli va tungilile Falao vimbongi via vishepa: Pitome na Lemase. ¹² Vuno honi omuo muva va yandethele muakama, mukemo na muva lilanethele naku litepela mkuhela uavo. Hakeho honi vaka Ingito vatamekele kuva yandetha muakama. ¹³ Vaka Ingito va hanene vana va Isaleli vipanga via kulema muakama. ¹⁴ Keho vashashethele vuyoye vuavo navipanga viakulema via vuma, vindopi, na vipanga vieka na vieka via mumehia. Vipanga viavo vioshe viva va hanene via kele viakulema muakama. ¹⁵ Keho honi muene ua Ingito ua handekethele vaje vakentu vavali vaje vakuathele vampuevo va vahevelu muku mona tumbututu; lidhina lia umo ikeye Sifila, mukuavo Pua. ¹⁶ Uahandekele navo nguendi, ''Omuo mumukuatha vakentu vavahevelu muku haka hama voko, vataleleni vuino. Nga vamona munike uamumala, keho muthsiheni, nga uampuevo, mue celeni akale namuono''. ¹⁷ Vuno honi ovo vampuevo vakuathele vakuavo vovuilile Kalunga tata liova mukemuo honi kuvapangele ovio vilinge via valekele muene uavo ua Ingito, mukemo hani vehelele vanike vavamala navo vakale namiono yavio. ¹⁸ Muene ua Ingito uathanene vaje vakentu vavali keho uavehuile nguengi," Vika muna mpangela viuma via kufua ngeci, amba na vika muna lelela vanike vavamala vakale na muono?" ¹⁹ Ovo vakentu vavali vakumbuluile muene uavo Falao, "Vakentu va vaHevelu vakele ngue vakentu vaka Ingito. Avo vakola, vakala na mivila ya cili amba na vakala nandzili, vekulivanga kuhakaho mavoko kulutue etu tua kuvizhivuke.'' ²⁰ Kalunga tata uohielele vakentu ava vavali, vantu velanene muku vatanda avo lalo vakele na ndhili yakama. ²¹ Mukonda vakentu ovo vavali, vovuilile Kalunga tata liova, vavedthukile navo vakele na vana vavo na vushoko vua vuingi. ²² Falao ua lekele vantu vendi voshe nguendi,''' Umbileni vanike voshe va vamala vova thema vakentu vavaHevelu mundonga, ambe vathema vana vavo vavakentu vetheni vakale namuono.''