¹ Yodigho shi mbadiko matetero kowa hakara mwa Kristusi Jesusi . ² Kumuragho ghokwa mupepo ghomoyo mwa Kristusi wapwa kushutura kumuragho ghoghuyi noyifa . ³ Koghiwapirire kuruwana muragho pamurandushi wakarire ghukashu kupiterera munyama , Nyambi ghayiruwanine . Ghatumine mwanendi ghopithendi muthishwi tho ghuyi ghomaharwero mukukara muyambo gho murandu , no ghapwire kutetera mudiharwero munyama . ⁴ Hayiruwanine yi muthitambo eshi muragho ghuipwe kuyarithera mu mwetu , Atwe mbadi twa ruwana kutwara munyama ene kutwara mupepo . ⁵ Owa hapara kutwara payikara yopanyama hatura maghano ghawo panyama , ene owa hakara kutwara mwa mupepo hatura maghano ghawo muyinu ya mupepo . ⁶ Maghano ghopanyama ne yifa , ene mwa mupepo . ene maghano ghopamupepo ne ne moyo no thiraro . ⁷ Maghano ghopanyama ghukare kwa Nyambi , ogho mbadiwakukona kutapa ku muragho wa Nyambi nayo shi mbadi wa kukona kutenda kemo . ⁸ Wahe wa hakara panyama mbadi wa kuhafitha Nyambi . ⁹ Ene mwene , mbadi mwakara panyama ene mwamupepo . ngeshi ghumwe mbadi ghakara no mupepo wa Nyambi watunga mumwenu . Ene ngeshi ghumwe mbadi ghakara no mupepo wa Kristusi .Mbadi ghahatera kukwemdi . ¹⁰ Ngeshi Kristusi mu mwenu yirama ne yafa no dikuto dyo diharwero , ene mupepo ne ghuyumi nodikuto dyo ghuhunga . ¹¹ Ngeshi mupepo wendi oghu watumine Jesusi muyifa watunga mumwenu , oyu ghatumine Kristusi muyifa mboghanatapa karo moyo kuyirama yenu kupitera mwamupepo wendi , oyu ghatunga mu mwenu ¹² Shime karo , mwayedhange , twamukudi , ene mbadi panyama pakupara kukutha panyama . ¹³ Ene ngeshi haghupara panyama ghuna kufa pawangu , ene ngeshi pamupepo ghuna tura yifa yoyirama muyiruwana , nanyi wakupare ¹⁴ Wahe wa wapiteritha mupepo waNyambi , owa ne hana Nyambi . ¹⁵ Mbadi mwa tamburire mupepo gho ghupika eshi mupare karo muwoma ;ene mwa wanine mupepo gho matambwero , omutuna kudira , ''Abba, kuninga shi tate''. ¹⁶ Mupepo wathinda watapa ghushupi no mupepo wetu eshi atwe twahana Nyambi . ¹⁷ Ngeshi atwene twahana , natwe twa yori , twayori wa Nyambi . Atwe ne twakupakera ghuyori na Kristusi . ngeshi atwe ne twa nyandire pofotji nendi podigho shi mbotuna kashamberera pofotji nendi . ¹⁸ Amene nakughayara eshi kunyanda kopashadyarero mbadi kwa pitakana no fumwa edhi mboha neghedha kukwetu . ¹⁹ Thinga thoyivareka kuna kutatera maneghedhero gho hana Nyambi . ²⁰ Kuyivareka yakutapire ku kupira mudyo , mbadi payihima yawo . ene kukwendi thinda yu ghayitapire , mumakurupero . ²¹ Eshi yivareka yathinda mboyinapu kushutuka kughupika ghohoro , no ayo mboyinareta mashutukero ghofumwa dho hana Nyambi . ²² Atwene ne tuna dimukashi yivareka yoyihe kuna kutongora no matatero mutjitju pofotji kate popano . ²³ Mbadi yoyiya pithako , ene ngambi twathinda , tudi no mbuyo dhokutangera dhamupepo . kuna kutongor mwishi , omu tuna kutaterathikuma matambwero ghetu , makomweneno ghoyirama yetu . ²⁴ Mogha makurupero twakukomonona . panone makurupero ghokumona ne mbadi makurupero . ghidye ghokukurupera eyi kumona. ²⁵ Ene ngeshi hatukurupera koyitwa kudhira kumona, tuna kutaterera ghudhidhimeka . ²⁶ Nomudhira dho dhodhofotji , mupepo ghuna kutughamwena mughukashu wetu . Atwe mbadi twadimuka ngepi edi shoturaperere , ene mupepo wathinda ghuna kutukarerapo no ghuna kutuhemenapo kumatongero . ²⁷ Oyu ghakona konanga mutjima ghadimuka maghano ghamupepo , yoyishi ghana kukarerapo hanu wa Nyambi hokupongoka mukukutha mahimeno gha Nyanu . ²⁸ Twa dimuka shi kowa ha haka Nyambi, ha ruwana yinu yoyihe mu ghuwa, kowa hetha mukukutha ku thitambo thendi. ²⁹ Yoyishi kowa ha torore karo hawa tendire muku kara mu thishwi thamwanendi , mukakara eshi aye yombedi mukatji kaha mina hohengi . ³⁰ Kowa hapwire kutorora , nawo hapwire kwitha . owa hakushukire , awo hawa fumanekire . ³¹ Nyesho tughambe kuhatera kuyinu yino ? ngeshi Nyambi ne wetu , yidye oyu shogha twimananyene ? ³² Aye mbadi ghakupungwere mwanendi ene ghamutapire kukwetu twahe , ngepishapir karitwe kutupa pofotji nendi yinu eyi nyara nyara?. ³³ Yidye mbogharundera hatorori wa Nyambi ? Nyambi thinda yo ghahungeka . ³⁴ Yidye yu mbogha tetera ?Kristusi Jesusi ne yoghafire kupiterera , oyu ghavumbukire , oyu ghadikurudyo rwa Nyambi , no yoghana kutukarerapo twe . ³⁵ Yidye oyu shoghatuyakunuthe kuruhakitho rwa Kristusi ? kunyanda , endi tokotoko , endi makutha kuthero , endi ndhara , endi wira ., maghukukutu , endi dimende ? ³⁶ Thika kenge dyapwa kutjanga ,'' pamaghuwa ghenu potuna kufera . ''twa pwa kughayarera yira ndjwi dhokupagha ''. ³⁷ Muyinu yoyihe yitwa wini kupitera moyu ghatu haka twe . ³⁸ Ame napwa kunigitha eshi ngambi yifa , ngambi moyo , ngabi ha engeli, ngambi hakamuragho , ngambi kuyinu yidipo , kuyinueyi mboghiya ngambi mangcamu . ³⁹ Ngambighure , ngambi ghudhungi , ngambi kehethino havareka , thikone kutuyakunutha kuruhakitho rwa Nyambi , Eyi ne mwa Kristusi gho fumu wetu.