¹ Podigho eshi mbadi wa kara no mathigherero, owe munu, ghokutetera ndhango, pakutetera ndhango ghumweya, dimuke vene eshi yowe ghuna kukutetera ndhango ghothinda. Yoyishi owe muka kutetera ndhango, nowe ghothinda yowatendanga yoyo. ² Ene twa dimuka mathekero ghaNyambi eshi ghoghushemwa kowa ha tendanga yinu yo kemo. ³ Ene ndhundhe yino, owe munu, owe ghokutetera ndhango hayendhoye wa hana kutenda kemo, oku nowe pakuyitenda. Ghuna kughayara eshi owene mboghuna shwagha mundhango dhaNyambi ndi? ⁴ Endi ghuna nyatha ghutungi ghoghunongo wendi, maranga ghomahumbithero ghendi, no madhidhimekero ghendi ndi? Mbadi wadimuka shi ghunongo wendi ne wa tamba kukutwara kumapirukero ghoye ndi? ⁵ Ene paghukukutu wenu nomtjima dhenu dhokupira kupiruka po muna kukukongwethera mahumbithero mudiyuwa dyoghupata, adyo ne, dyo diyuwa dyoyihokoka yo yandho dhendi dhoghuhunga. ⁶ Mbo ghana ruwera kehe yu payitenda yendi: ⁷ kowa ha dhidhimekire mukutenda ghuwa ne makughero, dikuto, no kupira kuyipa, mbo ghana kawa pa moyo ghokuroruheya. ⁸ Ene kwawa haka kukununeka, ho kupira kukutha ghushemwa ene kukuyi ghuyi, ghupata ghoghukuru mbo ghu neya kukwagho. ⁹ Nyambi mbo ghana reta yinyanda noyikudhekera mumoyo wa kehe yu ghana kutenda ghuyi, kutangerera kwamuJuda, ndani kwamuHirika. ¹⁰ Ene makughero, dikuto, no thiraro mbo yineya kwa kehe yu gha tendanga ghuwa, kutangerera kwamuJuda, ndani karo kwamuHirika. ¹¹ Nyambi ne mbadiko mandorwera. ¹² Wahe wa haharurithe oku mbadiko muragho ne mbo hana yongara nagho oku mbadiko muragho, no wahe awa haharurire mumuragho ne mbo hana wa tetera ndhango nomuragho. ¹³ Mbadi awa hayuvanga eshi ho ghoghuhunga kughutho waNyambi, ene hakumithimo muragho mbo hana hungeka. ¹⁴ Ngeshi mbadi haJuda, awa hapira muragho, hatendi yinu yi wahima muragho, yarikanya kukwagho eshi muragho, ngambi kenge hapira muragho. ¹⁵ Yirughana yawanu ho kemo, kuneghedha eshi muragho dha pwa kutjanga mu mutjima dhawo. Maywi ghawo makumbwerero gho ghana kuyinongonona, no makunungero muyighayara yo kurundera, endi yiwaghamwene kukwawo ha thinda, no ¹⁶ kemo karo kwaNyambi. Eyi ne mbo yina kumu mudiyuwa di mbo gha tetera ndhango Nyambi hanu mwaKristusi Jesus, kuyinu eyi yonda, kukutha mu mbudhi dhodhiwa dhaJesusi Kristusi. ¹⁷ Ene ngeshi kuninga shiwene gho muJuda owene wa kutapa kumuragho. Wakununeka eshi , Nyambi ne ghoye pithoye. ¹⁸ Dimuke mahimeno ghendi no kutawedhera eyi yarikanyena, yoyishi wawana marawero kumuragho; ¹⁹ Nongeashi ghunatawa papoye ghothinda eshi owene gho mukamiti wawakunga, nomunyenge wawahadi mumakokore. ²⁰ Ngeshi ghomuraghuri wawayero, muhongi wawanuke nowakara no muragho ghoghudimuka no ghushemwa, ngepi yina kukundama noyipara yoghe? ²¹ Amwe mwahongi wahamweya, mbadi mwakuhonganga mwathinda ndi? Amwe mwakuyuvitha yo memananyeno ghowidhi, munedhanga ndi? ²² Amwe ghokughamba eshine ghumweya mbadi ghakarare namuna muyendhendi . owene mbadi wararanga namuna muyendhoye ndi? amwe mwanyenga yitwandjo, munedhanga mundhugho dhaNyambi ndi? ²³ Amwe mwakununeka mumuragho, mwashamunanga Nyambi pakuregha muragho ndi? ²⁴ Dina dya Nyambi dyapwa kushamuna mwawa hakara eshi mbadi haJuda pamurandu wenu thikadi yapwa kutjanga . ²⁵ Makeneno kuwanamo maghuwa ngeshi ghaghu koneka muragho, ene ngeshi haghu reghanga muragho roruhe, makeneno ghana kuhukera kughupumuru. ²⁶ Ngeshi hakoneka muragho yu ghadhira kupwa kukena, mbadi mbogha fa yaNyambi ghupumuru wendi eshi makeneno ndi? ²⁷ Ngeshi yu gha kara nothidimukitho thoghupumuru ghakneka muragho, mbadi mbo gha mutetera ndhango ndi? Yoyishi wakara nomuragho patjangwa nomakeneno, ene shime ghaghuregha regha muragho. ²⁸ Ayene mbadi muJuda pakakoghatji, endi yoyishi wawana makeneno ghawa Juda. Mbadikemo muJuda ghushemwa ne oyu ghakara nomutjima ghokuhungama naNyambi, makenenoghoghushemwa ²⁹ mbadi ghokuteta ghirama ene mapirukero ghokutunderera mumutjima, keheyu ghakara nomapirukero gho kemo. Kushana mashogherero kwaNyambi mbadi kwawanu.