¹ Kwa mu Engeli gho ngirishe dha dha Sardis gha tjangire eshi :Manando ghoyu gha kwaterera mipepo kwoko no dhiwadi dha Nyambi no tutumwedhi kwoko no tuwadi . "Nadimuka eshi kupara ghuna kupara ene wa fa. ² Pinduke no tanarithe wa hana thiyarako, owa hana kushana kufa, yoyishi mbadi nawana yiruwana yoye eshi yina kumenena mo kughutho wa Nyambi. ³ Vuruke keho, eyi wa tambura no yi wa yuva, Yikuthe no piruke. Ene ngeshi mbadi sho pinduke, mbo nineya yira mwidhi ndani mbadi mbo dimuka eshi nako munye nakwiya no kukwimanganyena . ⁴ Ene we ghudi no mena gho mapu mu Sardisghawa ha dhira kudhiropitha yitere yawo no diharwero mbo hana yendi nange, mbo hana shupata yoyikenu, yoyishi hapongoka. ⁵ Oyu gho kuwina, mbo hana mushupatitha dirwakani dyo dikenu, no mbadi mbo nidhingununa dina dyendi mu mbapira dho moyo no mbona yuvitha dina dyendi kughutho wa tate, no kughutho wa ha Engeli wendi. ⁶ Muninge wa hakara no matwi hayuve eyi ghuna kughamba mupepo ku mangirishe. ⁷ Kwa mu Engeli gho ngirishe dha philadephia gha tjangire eshi , Manando ghoyu gha pongoka no mughushemwa , oyu gha kwata matjapi gha davita. oyu gho kuyandhurura no mbadiko gho kukona kuyandhera, gho kuyandhera no mbadiko gho kukona ku yandhurura. ⁸ Nadimuka yitenda yoye. mone, natura kughutho ghoye dikororo dyo thiyahi no mbadiko gho kukona ku diyandhera. Nadimuka eshi wa kara no ngcamu dhodhipu, ene wakutha nando dhange no mbadi wa hamura dina dyange. ⁹ Mone! nanyi nakutende awa ha hatera ku mbunga dha shatani awa ha kwitha ha thinda eshi ha Juda ene mbadi wodiyo, ene awone haka ghumbango, mbo nawa ningitha heye naha tongamene kughutho ghomapadhi ghoye no mbo hana yidimuka eshi nakuhaka. ¹⁰ Thikadi wa kunga marawero ghange no kudhikonotwedha ghu dhidhimeka, name karo mbo nakukungu ku viri dho mayekero agha mbo gheya mu kaye kokahe, muku nayereka awa ha kara pa kaye. ¹¹ Tamba nakwiye. Kwaterere koyiwa kara nayo podiyoeshi mbadiko mbo ghakona kushimba thi karoni thoye. ¹² Oyu mbo ghawina mbo namutura gha kare dighundhi mu ngirishe dha Nyambi wange. mbadi karo mbo gha shwagha mo ene mbo natjanga pa pendi dina dya Nyambi wage, dina dyo mbara dha Nyambi wange Jerusalema gho mupya, edhi dha kutunda mu diwiru kwa Nyambi wange dho Jerusalema gho mupya. ¹³ Muninge wa hakara no matwi ha yuve eyi ghuna kughamba mupepo ku mangirishe.{Mango gho mapongero} ¹⁴ Kwa mu Engeli gho ngirishe dha Laodicea gha tjangire eshi. "manando gho yikare kemo {Amen} mushupi gho makurupero no ghushemwa, muraghuri gho yivareka ya Nyambi. ¹⁵ Nadimuka yitenda yenu ndani mbadi gho mughenyu endi gho mutenda . Ngo gho mughenyu ngambi gho mutenda ne mgo hasha! ¹⁶ Ene, pamurandu shi owene wa rembuka no kadi gho mughenyu no ghutenda temba, tamba nikuruthe mukanwa kange. ¹⁷ Owe kughamba shi no mutungi, nakarire no yiwana yoyingi, kadiko thi nakunyanda. Ene mbadi ghuna dimuka eshi mbadi wa hungama, wa yawa thinyeke, gho muhepwe no ghudi thiheha. ¹⁸ Tegherere ku matjokedhero ghange:Ghure kukwange ngorondo gho kuruyitha no mudiro ghu kare gho mutungi, ghunyanyami no nikuvateke dirwakani dyo dikenu, no honyi dho thitumbatumba thoye, no kukuwetha maghadhi mumeho ghoye podiyo eshi wakumone. ¹⁹ Ame ne kuhonga kehe yuno mahaka, no kuwahonga eshi ngepi gho kupara . Podigho , mudhidhimeke no mupiruke. ²⁰ Mone, Ame nemana pa thero no nina kungongona . Ngeshi koghadi sho gha niyuve diywi dyange no kuyandhurura thero dhendi, nakwingena mu dighumbo dyendi no na kudya nendi aye gha dye nange. ²¹ Koyu mbo gha wina, mbo namutawedha kuhungumana pofotji nange pa dipuna, thika kenge name na wina no nahungumana pofotji na tate pa dipuna dyendi. ²² Muninge wa hakara no matwi hayuve eyi ghuna kighamba mupepo ku mangirishe.