¹ Odhi ne dho mbudhi edhi gha tapire FUMU ghoNyambi wetu kwaObadiya dho kuhatera hanu ho muIdomu: Twa yuva mbudhi dho kutunderera kwaFUMU ndani mutumi ne ngaha mutumu kumako ghamwe, ghu ninga eshi, ''Wimane! Tukuroyithere tukarwithe Idomu!'' ² Mutegherere, nanyi nakumumbirupithe mukatji ko mako; nanyi ha kukunyathe thikuma. ³ Kukununeka kwenu ne kuna mupemuna, amwe mwa tunga kuwiru dhomawe ghomakuru, mumayimbo ghenu; amwe kughamba mumitjima dhenu eshi, ''Yidye gha kuniwitha me?'' ⁴ Ngambi ngo mwakara no mando no kukona kutuka kuwiru kupitakana nwanyi, endi ngambi mwa kutende maghumbo ghenu patutumwedhi, nanyi na ka mughurumune, gha ghamba FUMU. ⁵ Ngeshi hakawidhi hatjore ndhugho dha munu ghuthiku- nanyi mupwe kuhanyaghura!- mbadi sho hedhe napo yoyingi thika di hana kuyihima ndi? Ngeshi haka kupongeka mandjembere ha kwiye kukwenu, ngo mbadi hakumuthiyerako mandjembere ghamwe? ⁶ Ngepi keho di hana mukungwera Esaghu yinu yendi yoyihe yomudyo, ghushwi wendi ghoghuhe hana mana kuwidha. ⁷ Hakwatithitho hoye wahe nanyi ha kukwimanganyene, no nanyi ha kukuthiyeneke ghu thiye ditunga dyoye. Hanu wa wakarire muthiraro nagho ne hana kwangera, no hana kukono. Awa ha dyanga yidya yoye ne hana kuteyi thiraha. Mbadi ghana kutjwathana eshi nye hana kuyi mutendera yi. ⁸ ''Modiya diyuwa,'' gha ghamba FUMU, ''Nanyi na kuhanyaghure hanu ho hanyanyami muIdomu no matjwathaneno gha shwaye padirundu dyaEsaghu. ⁹ Mashurundate ghoye ghokutanara ne nanyi gha kuyape, Temani, podiyo eshi ngo ha kupaye kehe yuno munu padirundu dyaEsaghu. ¹⁰ Pamurandu gho ghuyi ghu wa tenda kwa minoye Yakopu, mbo ghuna pu kufika no honyi, no mbadi wa kupara karo. ¹¹ Mudiyuwa di wemanine ghurorere ghupire kughamwena, diyuwa di hashimbire hanu maghana ghushwi wendi, no hakamatunga ghamwe ha ngenine mumbara dhendi, no kutenda fungu- fungu eshi dye shoghashimbe Yerusalema, wa karire yira ghofotji gho papagho. ¹² Wa shamberera pamurandu gho diyuwa dyaminoye, mudiyuwa dyo dihudhi dyendi, no mbadi ghushamberere ko hanu homuYuda pamurandu gho maharanganyeno ghawo, mbadi ghukununeke mudiyuwa di ha kunyanda. ¹³ Mbadi wa kungene mumbara dho hanu wange mudiyuwa dyoyinyanda yawo; mbadi wa kuhafe kuyinyanda yawo mudiyuwa dyomaghukukutu ghawo, mbadi mwa kushimbe ghushwi wawo mudiyuwa dyo mahanganyeno ghawo. ¹⁴ Mbadi wa kwimane pamahangayira ghu paye wa hana kushana kutjira, no mbadi wa kutape wa hakuthiyarapo kwawa nyathi wawo mudiyuwa dyo yinyanda. ¹⁵ Diyuwa dyaFUMU ne didi pepi mu kehe ditunga. Thika di wa tenda kwawamwe, no kukoye kemo; nanyi wa kunyande kuyinu yi wa tenda. ¹⁶ Thika di wa nwine padirundu dyange dyokupongoka, kemo no mako gho mahe dyo gha kunwa. Nanyi ha kunwe no kumina no nanyi ya kumoneke yira mbadi haparire pakaye. ¹⁷ Ene padirundu dyaSiyoni nanyi ha kukarepo awa ha kupara kumahumbithero no nanyi dya kupongoke; ndani hanahoka waYakopu ne nanyi ha kumune yimuna yawo. ¹⁸ Hanahoka waYakopu ne nanyi ha kukare mudiro, no hanahoka waYosefu ne maretha ghomudiro, no hanahoka waEsaghu ne nanyi ha kukare yitengetji, no nanyi hakuwatumeke. Ko hanahoka waEsaghu ne mbadiko yu gha kupara ko, FUMU ye ne ghana yi ghamba.'' ¹⁹ HakaIsragheli wa hadi mu Negevu ne nanyi ha kushimbe dyango dyawaEdomite no awa hadi kuditokera ne nanyi ha kushimbe dyango dyawaFilistine. Nanyi ha kushimbe dyango dyaEfurayimu no dyango dyaSamariya, ndani Bendjamini ne nanyi gha kushimbe Gileghadi. ²⁰ Thingi thawanu haIsragheli wa hakwatire ne nanyi hakushimbe ditunga dyaKanana kate kuSarepata. Haka Isragheli wa hakwatire no kuwa shwayitha muYerusalema, awa ha di muSeparadi, ne nanyi ha kushimbe mambara ghomuNegevu. ²¹ Hakayita homuYerusalema ne nanyi hakurwithe Edomu nokumuraghura, noFUMU ne nanyi gha kukare fumu wawo.