¹ Edhine nando dhaNyambi edhi dheyire kwaJuweli mwana ghomukatughuru waPethuweli. ² Muyuve yino, amwe mwakuru, nomutegherere, mwahe mwe mwakamuve ghuno. Yahokoka yinu yokemo mumayuwa ghenu ndi endi mumayuwa ghawa kerekandongo wenu? ³ Muyitongwere hanenu, nohanenu hayitongwere kwawanawo, nohanawo hakuyitongwere kumuhoko ghokurandako. ⁴ Eyi dhathiya dimba, dimba dishokuru dyayidire; eyi dyathiyire didimba dishokuru, mbathi-mbathi ghadire; no eyi ghathiyire mbathi-mbathi, dimbimbidhi dyayidire. ⁵ Mupinduke, amwe mwayidakwi, nomudire! Mudire thikuma, mwahe amwe mwanwanga vinyu, yoyishi vinyu ghomutowi ne hana mushwayitha kukwenu. ⁶ Ditunga dimwe dinengena muditunga dyange, nongcamu nombadi wakukona kuwatara. Mayegho ghadyo ne yira ghonyime, noghakara nomayegho gho nyime ghomukadhi. ⁷ Gha yipitha dipya dyange dyomandjembere no gha purumuna thitondo thange thoghukuyu. Gha yununako mayura nogha thivukuma; mite dhatho ne wakenenena. ⁸ Muguve yira mbuyamaghana oyu ghapira kukara shime na katughuru oyu ghana vata yitere yoshaka kuyifa yakatughurughana wendi. ⁹ Muyambo gho nanda no muyambo gho yinwa ne yina pu kutunditha mundhugho dhaFumu. Haruti, hapika Fumu, hana guvu. ¹⁰ Mapya ne ghana yipa; muve ne ghuna guvu yoyishi nanda ne dhina pu kuhanyaghura. Vinyu ghomupya ne ghana kukuta; maghadhi ne mbadi ghayikumithamo. ¹¹ Mukuyuve honyi, amwe mwandjimi, nomudire, amwe mwaka kukukuna mandjembere, mavumbukiro nobali. Muyangu ghomumapya ne ghuna yongara. ¹² Mandjembere ne gha kukuta noyitondo yo ghukuyu ne yakukuta; yitondo yombuyo, turipi, noyitondo yoma aperi-yitondo yoyihe yomudipya ne yakukuta. Yishamberera ne yatunda kumako ghawanu. ¹³ Muvate yitere yoshaka no ghomuguve, mwe mwaruti! Mudire, amwe mwapika gho thinyaku. Mwiye, murare ghuthiku ghoghuhe noyitere yoshaka, amwe mwapika waNyambi wange. Muyambo gho nanda noyinwa ne hana yishaghekitha mundhugho dhaNyambi wenu. ¹⁴ Mwithe mukare nomadhidhimekero ghokupongoka, nomethero gho makupakerero ghokupongoka. Mukokangawedhe hakuru wahe nohatungimo mumuve ghu kundhugho dhaFumu Nyambi wenu, nomudirere Fumu. ¹⁵ Muguve diyuwa dyodihe! Yoyishi diyuwa dyaFumu ne pepi didi. Pofotji nadyo ne nanyi ghakwiye mahanyawero kutunda kwaShokuru. ¹⁶ Mbadi hayi tundithako yidya kughutho ghomeho ghetu, noyishamberera noyimenya-menya yishwaghe mundhugho dhaNyambi wetu? ¹⁷ Nanda dhapwa korwa papadho, tuhupa tonanda ne twayipa, notushete ne twa payaghuka, mbuto ne dhapwa. ¹⁸ Edi dhina kukumbura ngombe noyishivana! Murako dhadho ne kuna kurenda-renda yoyishi mbadiko yidya. Ngambi yikora yondjwi kuna kunyanda. ¹⁹ Fumu, kukoye na kudirera. Mudiro warandununa madyero ghomahe ghomumuthitu, nodiraradiro dyatumeka yitondo yoyihe yomumapya. ²⁰ Noyiyama yomumuthitu kuna kumudirera, yiwato yomeyu nayo yakukuta, nomudiro warandununa madyero ghomahe ghomumuthitu.