¹ Pakare-kare Nyambi nga ghambanga kwawa kerekandongo wetu kupitera mwawa porofeta pama ruvedhe ghomengi no mumandhira ghomengi. ² Ene mumayuwa ghano ghoghuhura, ghana ghamba kukwetu kupitera mwaMwana, oyu gha tororire muku kara mupingwa ghoyinu yoyiheya. Kupiterera mumwendi pogha varekire Nyambi kaye. ³ Yodiye munyenge gho kurwedhima waNyambi, mukareripo ghoghushemwa gho ghunu waNyambi. Gha kwaterera yinu yoyihe pofotji pangcamu dhonando dhendi. Apa gha manine kukushutura maharwero, gha hungumana kurudyo rwaNyambi muka ngcamu dhodhiheya. ⁴ Ayene ghakara muraghuri kwawa engeli wahe yoyishi dina edi ghayora dihunga kupiterera mena ghawo. ⁵ Kwamu engeli munye pakatji kawa engeli oyu ghetha Nyambi eshi, ''Owene ghomwanange, dyarero nakara nowiho''? Endi kwamu engeli munye gha ghambire Nyambi eshi, ''Nanyi gha kukare ye wihe, ndani aye gha kukare mwanendi'''? ⁶ Ene karo, pakureta Nyambi mwanendi ghombedi mukaye, gha ghambire eshi, ''Haengeli wahe hakona kumukugha.'' ⁷ Kuhatera kwawa engeli gha ghambire eshi, ''Yodiye ghatenda mupepo wawa engeli wendi, nomaretha ghomudiro ghawa pikendi.'' ⁸ Ene kwaMwana ghana kuninga eshi, ''Dipuna dyoye, Nyambi, kuroruheya nokuroruheya. Mutagha ghoghufumu ghoye gho mutagha gho ghuhungami. ⁹ Owe wahaka ghuhungami no wa dhimba ghuyi. Nyambi ghoye, gha kuwethera nomaghadhi gho yishamberera kupitakana hayendhoye.'' ¹⁰ Pamatamekero, Fumu, watendire ditateko dyokaye. Nomawiru ne yirughana yonyara dhoye. ¹¹ Mbo ghana yongara, ene mwe mbo muna twara kughutho. Yoyihe mbo yina kurupara yira thipindhi thothitere. ¹² No mbo ghuna yipeta-peta yira yivata no mbo yina kuthitunuka yira yivata. Ene mbadi mbo ghukutjindja, myaka dhoye mbadi mbodhipwa.'' ¹³ Kwamuengeli munye ghaghamba Nyambi kukehe ruvedhe eshi, ''Hungumane kurudyo rwange kate mbo niture haka nore dhoye mbo hakare thidjatero thoye''? ¹⁴ Haengeli wahe ne mbadi mipepo edhi dhina kukarera, awa gha tuma muku kara no thinga kowa mbo haka yora mashutukero?