¹ Paghulusi gha kengururire hakandhango no gha ningire eshi, ''Mwayendhange, ame na para kughutho waNyambi mughukaro ghoghuwa kate diyuwa di.'' ² Mupristeri shokuru Ananiyasi gha rawere awa ha mwimanene ha mu pumure kukanwa. Munyima, ³ Paghulusi gha ningire eshi, ''Nyambi nanyi gha kupumure, owe mbadi dhodhikenu. Ghuna hunguma ghu ni pangure pamuragho, shime karo kuna kunirawera hani pume, wimanganyena muragho?'' ⁴ Awa hemanine po ha ghambire eshi, ''Kenge ghuna kutharuka mupristeri shokuru waNyambi?'' ⁵ Paghulusi gha wa huthire eshi, Mbadi na dimuka, mwayendhange, eshi aye ne mupristeri shokuru. Ayo yapwa kutjanga eshi, mbadi wa kona kughamba ghuyi kwamuraghuri gho hanu wenu.'' ⁶ Apa gha monine Paghulusi mbunga dhimweya dhawakandhango eshi haSadusayi nodhimwe ne haFarasayi, gha ghambire ghu kuyerera mundhango eshi, ''Mwayendhange, amene nomuFarasayi, nomwana wawaFarasayi. Yoyishi nidi no makurupero gho mavumbukero wawafu yodiyo hana kuni pangwera.'' ⁷ Apa gha yi ghambire yi, dikanyi dya tangire pakatji kawa Farasayi nawa Sadusayi, no mbunga dhakutaghurire. ⁸ Awo haSadusayi kughamba eshi mbadiko muvumbukero, mbadiko ha engeli, no mbadiko dhimupepo, ene ha Farasayi ha tawire muyinu yoyiheya yi. ⁹ Thivunganyi thothikuru tha hokokire, munyima ha ka marukwaro hamwe awa hahatera kwawaFarasayi hemanine no kukanana ghughamba eshi, ''Mbadi tuna wana murandu moyu katughuru. Ngepi keho ngeshi mupepo endi mu engeli ghana ghambe nendi?'' ¹⁰ Apa dya tangire po dikanyi dishokuru, mupiterithi shokuru gha yapire eshi Paghulusi kukona ha muhanyaghure muyipindhi, no gha rawere mashurundate gha ghurumuke no ka mushimba pamathineneko mukatji kawa ka ndhango, no ka mureta mumondo. ¹¹ Ghuthiku gho kurandako Fumu ghemanine kumbadi dhendi no kughamba eshi, ''Kare no ghutjima thika edi wa tapire ghushupi gho kukwange muJerusalema, thika karo wakona kushupa muRoma.'' ¹² Apa dyavire diyuwa, haJuda hamweya hatendire makuyuvero, no kukwithera thikuto papawo hathinda nomedhero mukupira kudya nokunwa keheyino kare hakumane kupagha Paulusi. ¹³ Hakarire wingi ghokupitakana makumi mane wa hatendire makuyuvero gha. ¹⁴ Hayendire kwapristeri hohakuru nokwawa mayami nokaghamba eshi; ''Tunatendi medhero ghomakuru mukupira kudya kehe yino kare tupaghe Paulusi. ¹⁵ Pano keho muninge hakandhango hepure mukuru wawakayita ghamurete kukwenu yira munashana kunatokora thiwana murandu wendi. Kukwetu keho twe , tunakuroyithera mukumupagha kughutho ghokwiya kuno.'' ^{16 17} Ene mwepa paghulusi ghokatughuru ghayuvire eshi hana rara ghutaterera, ghayendire nokengena thishashara nokatongwera Paulusi. Paulusi ghethire mukamiti ghofotji noghaghambire eshi; ''Tware yu mungaghu kwamukuru wamashurundate ghadi noyinu yokamutongwera.'' ¹⁸ Mukamiti wawamaporitha ghashimbire mungaghu yu no ghamuretire kwawamashurundate nokaninga eshi; ''Paulusi ghomukakashitiko ghananitha kukwendi, no kunininga nirete yu mungaghu yu kukwenu. Ghadi no yinu yokughamba kukwenu.'' ¹⁹ Mukuru wamashurundate ghamukokire kudyoko ghutware kopithawo nokamwipura eshi, ''Yinu munye ghunashana kunitongwera?'' ²⁰ Mungaghu ghaningire eshi; '' HaJuda ngahamukumbera mwakughurumuthe Paulusi peghundha kwawakandhango, yira kohakushana kunamwipura thiwana kuhatera murandu wendi. ²¹ Ene mnbadi mwakuyitawe yoyishi kohadi hatutughuru hokupitakana makumi mane hanakumutaterera. Ngahakwedhera hathinda mukupira kudya ngambi kunwa kehe yino kate hakupaghe Paulusi. Ngambi pano hana kuroyithera , kunakutaterera matawedhero ghenu.'' ²² Mukuru ghomashurundate ghathiyire mungaghu yu ghayende, munyima dho kumurawera eshi; '' perere poye ghutongwere kehe yuno eshi ghunana rapota yinu yi kukwange. ²³ Ghethire hakamiti wawamaporitha hawadi nokuninga eshi; '' Muroyitheko mashurundate mathere mawadi gha yende kuGesereya, nohatutughuru hotukambe makumi kwoko no makumi mawadi, nohatutughuru homaghonga mathere mawadi. Nanyi muyende paviriu dhoghuhatu ghoghuthiku.'' ²⁴ Ghawarawere karo mukutapa yimuna oyi shoghadhine Paulusi mukumutwara thiwana kwaFelix ghonguvuru. ²⁵ Noghatjangire mbapira ngeno: ²⁶ ''Claudiusi Lisiyasi kwangu ghodikuto Felix, dirumeritho. ²⁷ Oyu katughuru hamukwatire haJuda ndani momu hamupaghe opa neyire kukwawo nomashurundate nonamughamwene, kutunda apa nadimukire eshi naye mukaRoma. ²⁸ Nayuvire eshi kunakumurundera kuhatera miragho dhagho, ²⁹ ene mbadi pakarirwe marunderio ghokukwendi ogha gharoghera yifa ndi kashitiko. ³⁰ Yapwire kunarapota kukwange eshi podidi dighano dyodiyi kwakatughuru yu, nonamutumine popo vene kukoghe nona tonwere hakakumurundera eshi harete yinyeghenya yawo kukoye. Thiyarepo. ³¹ Mashurundate ghakuthiore marawero ghawo. Hashimbire Paulusi nokumureta mughuthiku kwaAndiparisi. ³² Diyuwa dyokurandako, mashurundate ghomaheya hathiyire hakatukambe hayende nendi. Ndani awo hathinda ne hahukire kumondo. ³³ Apa hakakumine hatutughuru hotukambe kuSasareya no hakatapire mbapira kwanguvuru, hakatapire karo Paulusi kukwendi. ³⁴ Apa ghatoyire nguvuru mbapira dhi, ghepurire eshi thiko munye ghatunda Paulusi. Apa ghadimukire ghadimukire eshi aye ne kwatunda ku Silisiya, ³⁵ ghaningire eshi; ''Nganyi nikuyuve thiwana apa shoheye hakakukurundera kuno.'' Noghawarawere hamutware mumarombe ghaHerodesi.