¹ Simoni Peturusi, mupika nomupostoli waJesusi Kristusi, kowa hatambura matawero gho kukumenenamo yira kenge twa tambura twe, matawero ghoghuhungami ghokwaNyambi nokwaMushuturi Jesusi Kristusi. ² Ninge thineke nothiraro yiyeyuke mumarikanyithero nomughudimuki waNyambi nowaJesusi ghoFumu wetu. ³ Pangcamu dhendi dhoghuNyambi, yinu yoyiheya yoyipara noghuNyambi hayitapa kukwetu kupitera mughudimuki ghoyu gha twithire twe kupitera mufumwa no muyaroghera. ⁴ Kupitera moyi aye gha tupire makuruperitho makuru ghomudyo, podigho eshi ghukare ghuku yarekera mughukaro ghoghuNyambi, twa konine kwomboroka maghumbondo ghomukaye ghoyi yaretedherapo yirumbera yoyiyi. ⁵ Pamurandu ghoyi, murughane popamwahurera nokuwedherera ghuhungami kumatawero ghenu, no kughuhungami wedherereko ghudimuki, ⁶ no kughudimuki ne wedherereko makukungero , no kumakukungero wedherereko matjimapero, no kumatjimapero wedherereko ghuNyambi, ⁷ no kughuNyambi wedherereko thineke thawayendha, no kuthineke tuwedherereko ruhakitho. ⁸ Ngeshi eyi yinu hayikara mumwenu no kukura mumwenu, mboyinamushwayitha kughumbumi ngambi kukupira mbuyo kughudimuki wafumu wetu Jesusi Kristsi. ⁹ Ene kehe yu ghokupira yinu yi, ayene muthutano ghafa meho, ghavurama eshi maharwero ghendi gho pa kare ne ghapwa kukushurura. ¹⁰ Podiyo shi, mwayendhange, mwakona kughana popo mwahurera muningithe methero no matorwero ghenu mukupira matamangero, ngeshi ha mutendi yinu yi, mbadi mbomupundadhoka. ¹¹ Mundhira dhi mbohanakamupa mughutungi dikorogho dyo kungena mughufumu gho kuroruheya wa fumu wetu no mushuturi wetu Jesusi Kristusi. ¹² Ame mbo na muvurukitha kehe pano kuyinu yi, ngambi kemo eshi mwayidimuka, nongambi kemo eshi mwatanara mughushemwa oghu mwakara nagho. ¹³ Naghayara eshi yaroghera kukwange, ngeshi shime monidi mundhugho dhi, mbo namudhingurukitha mundhira dho kumuvurukitha. ¹⁴ No nadimuka eshi mashwayithero po ghondhugho dhange ghakwiye, yoyishi Fumu wetu Jesusi Kristusi ghayini hokwera yinu yi. ¹⁵ Na kurughana nongcamu dhange dhodhihe mukumona eshi pamakuyakunukero ghange mbo muna kono kuvuruka yinu yi. ¹⁶ Atwene mbadi twa kuthire thiwana yinu yoghumbango oghu hatendire apa twa mudimukithire mangcamu nomeyero ghaFumu wetu Jesusi Kristusi, ene twakarire hambangi wendi ho kumona dikuto dyomangcamu ghendi. ¹⁷ Aye ghawanine dikuto nofumwa dyomangcamu ghughamba eshi, ''Oyu ne Mwanange ghomuhakwa, nendi ame kukuyuva thiwana thikuma.'' ¹⁸ Natwe twathinda twadi yuvire diywi kushwagherera mudiwiru apa twa karire nendi padirundu dyokupongoka. ¹⁹ Atwe twakara nomanando gha mupumbi agha ha tenda ghupira matamangero, no po mbo murughana thiwana mukupakera thinga thika thishe thina kusheghenyena mudyango dyodikokore kare pa mbo ditokera diyuwa nonota murughura ghavere mumitjima dhenu. ²⁰ Poyi yoyihe, mwa kona kutjwathana eshi mbadiko ghupumbi ghopatjangwa washwaghera muyihima yamunu ghumwe. ²¹ Mbadiko ghupumbi oghu hareta muyihima yawanu, ene Nyambi ghaghambire mwahanu apa wawa piterithire mupepo ghokupongoka.