¹ Petrusi, mupositoli waJesusi Kristusi, kwawa mutunda kure ho makuharanganyeno, awa hapwa kutorora, hakutapathana muPontusi, muGalasiye, muKapadosiye, muAsisa, ndani muBitiniya. ² Eyi ne kukutha kughudimuki gho kwaNyambi ghowihetu, kupitera mukupongora thirughana thomupepo kwawa tawedhi nohaka kushutuka kumanyinga ghaJesusi Kristusi. Thineke thikare kukwenu, no tjiraro thenu thikuwedherere. ³ Nyambi na wiha hekudyetu Jesusi Kristusi ghapwe kukugha! Muneke dhendi dhodhikuru, aye ghatupire mushamurukero ghoghupya mukupara nomakurupero kupitera mumuvumbukero waJesusi Kristusi mwawafu. ⁴ Eyi ne yoghupingwa ghushiyongara, ghushi dhiropa, no ghushidhongonoka. Ayone hayimuturekera mudiwiru. ⁵ Mwapwa kukunga pamangcamu ghaNyambi kukpitera mumatawero ghomakomweneno agha ghakuroghithera mukukuhokora paghuhura ghoruvedhe. ⁶ Muna kushamberera kuyinu yi, ngambi kenge eshi yidi mudyo kukwenu mukukuyuva ghuyi mumayerekero ghomengi. ⁷ Agha ne maneghedhero ghoghushemwa ghomatawero ghenu, agha ghadi eshi mudyo thikuma kupiterera ngorondo dho kuyongara, ngambi kemo shi ya pwa kuyereka pamudiro, eyi yinakuhokoka podigho eshi matawero ghenu ghapwe kuwana no kuhurera mukugha, fumwa, ndani dikuto pamwiyero waJesusi Kristusi. ⁸ Mbadi mwamumona, ene mwamuhaka, Nopanombadi munakumumona, ene mwatawa mumwendi no kushamberera thikuma yishamberera yishi shingonona noya yara fumwa. ⁹ Kengeno ghunakuwana ghothinda yitundamo yomatawero ghoye, makomweneno ghomudhimu ghiye. ¹⁰ Kuhatera kumakomweneno gha, ha profeta awa haprofeta yothineke ethi mbo thiya kukwenu, thashanine ghunongwahu no kukona kona kupakera yinga. ¹¹ Mukushana mwahanu endi ruvedhe romupepo waKristusi mumwagho mwakuneghire apa ghanongononine kughutho ghoyinyanda yaKristusi nofumwa edhi dhakurandako. ¹² Ayo yapwire kuhokora kukwagho eshi mbadi yihima yagho hathinda, ene yakukwenu, apa haghambire kuyinu eyi hana kumutongwera pashananyi kwawa hamuyuvitherire mbudhi dhodhiwa pamupepo ghokupongoka ghomudiwiru-yinu eyi hataterera haEngeli mukayimona. ¹³ Podiyo mughange mipunda dho maghano ghenu. Mukothoroke . Muture makurupero ghenu thikuma pathineke ethi mbothiya kukwenu paku hokora Jesusi Kristusi. ¹⁴ Thika shi mwahana kughutawedhi, mbadi mwakona kutapa mwathinda kuyirumbera eyi mwakutha oku shime mbadi mwadimuka Nyambi. ¹⁵ Ene ngeshi yu ghamwitha ne ghapongoka, namwe karo, mupongoke muyipara yenu yoyihe. ¹⁶ Yapwa kutjanga eshi,'' mupongoke, yoyishi amene napongoka.'' ¹⁷ Ene ngeshi ngeshi munakwitha ''Tate'' Oyu ghana kupangura ghokupira makutjakero no kukutha kuyirughana ya kehe munu, yendurure munako dhoruyendo rwenu mufumwa. ¹⁸ Mwadimuka eshi mbadi nomayongarero ghosiriveri endi ngorondo oyu ghapwa kushutura kuyipara yishi wana thitambo eyi hakuhongire kwawaa wiha. ¹⁹ Karo amwe hamushutura mumanyinga gha Kristusi ghomudyo thikuma, ghoyu ghakarire yira dindjwighana shiwana murandu endi thitombo. ²⁰ Kristusi gha karire kughutho ghokuvareka kaye, ene pano ne, ene pano ne hamuhokora kukwenu mumanando ghoghuhura. ²¹ Kupitera mwendi ghuna kutawa mwaNyambi, oyu ghamupindura mukufa noghamupire fumwa, podiyo shi matawero nomakurupero ghenu ne mwaNyambi. ²² Amwe mwakushura midhimu dhenu pakukara noghutawedhi kughushemwa. Eyi ne pathitambo thoghushemwa mwahakwa ghoruhakitho; podigho mukuhakathane mughushemwa no mitjima dhodhihe. ²³ Amwene mwapwa kushamuruka paruwadi, mbadi kumbuto dhokuyongara ene mbadi kumbuto dho kupira kuyongara kupitera mukupara nando dhaNyambi dho kuthiyarako. ²⁴ ''Kwakehe munu ghakare thika muhonyi, no kehe fumwa dhagho dhakara yira mutemo ghomumuthitu. muhonyi kukukutera , no mutemo kukukumuka ko, ²⁵ Ene nando dhafumu dhina kukara kuroruheya.'' Nando dhombudhi dhodhiwa edhi ha muyuvithera.