¹ Mwahakwa, mwatawa kehe ghuno mupepo. Ene, muyereke mupepo gho mumone eshi kwaNyambi watunda ndi, yoyishi haporofeta hombango hohengi hanengena thikuma mukaye. ² Pakutenda yinu yi mbomuna dimuka mupepo waNyambi-kehe ghunomupepo gho kutongonona eshi Jesusi Kristusi gheya muthishwi thomunu ne kwaNyambi watunda, ³ ene kehe ghuno mupepo gho kupira kutongonona Jesusi ne mbadi kwaNyambi watunda. Oghu ne mupepo wamukanore waJesusi, oghu mwayuva eshi kuna kwiya, nopano ne moghudi kare mukaye ⁴ KwaNyambi mwatunda, mwahanuke, nomwawafunda, yoyishi shokuru ne yoyughadi mumwenu kupiterera yu ghadi mukaye. ⁵ Awo ne mukaye hatunda; yodiyo keho eshi eyi haghambanga ne yokutunda mukaye, nokaye ne kuwategherera. ⁶ Atwene kwaNyambi twatunda. Keheyu ghadimuka Nyambi ne kututegherera. Oyu ghapira kutunda kwaNyambi ne mbadi wakututegherera. Payikara yi tuna kudimuka mupepo ghoghushemwa nomupepo ghoghumbango. ⁷ Mwahakwa, tukuhakathane, yoyishi ruhakitho ne kwaNyambi rwatunda, nokeheyu ghokuhaka ne kwamushamuruka kwaNyambi. ⁸ Munu gho kupira ruhakitho ne mbadi ghadimuka Nyambi, yoyishi Nyambi ne ruhakitho. ⁹ Pamurandu ghoyi ruhakitho rwaNyambi rwamonekire mukatji ketu, eshi Nyambi gha tumine mwanendi ghopithendi mukaye podigho eshi twakupare yoyishi yodiye. ¹⁰ Mumoyi ne ruhakitho rudimo, mbadi shi twahakire Nyambi, ene Aye gha tuhakire, noghatumine mwanendi noghakare thikomononitho thetu. ¹¹ Mwahakwa, ngeshi Nyambi ghatuhakire, natwe karo twakona kukuhakadhana. ¹² Mbadiko oyu ghamona Nyambi. Ngeshi hatukuhakadhana, Nyambi mboghana kara mwetu, noruhakitho rwendi ne haruroghuthurura mumwetu. ¹³ Poyi tuna dimuka eshi mumwendi ndani naye mumwetu, yoyishi ghatupa mupepo wendi ghumwe. ¹⁴ Shime, twamona notwawana ghushupi eshi Wiha gha tuma mwanendi ghakare Mughamweni ghokaye. ¹⁵ Oyu gho kutongonona eshi Jesusi ne Mwana Nyambi, Nyambi ghana kukara mumwendi aye naye mwaNyambi. ¹⁶ Karo, twadimuka notwatawa eshi ruhakitho oru ghakara noro Nyambi kukwetu. Nyambi ne ruhakitho, noyu gho kukara muruhakitho ru ghana kukara karo muruhakitho rwaNyambi, noNyambi ghana kukara mumwendi. ¹⁷ Yoyishi, ruhakitho ru haru roghuthurura mukatji ketu, podigho eshi mbo tuna kakara noghudhutjima mudiyuwa dyondhango, yoyishi dyodi ghakara, natwe thikadyo muno mukaye. ¹⁸ Muruhakitho ne mbadimo woma. Ene, ruhakitho rokuyarerera kutjidhamo woma, yoyishi woma ne warughananga nomahumbithero. Ene oyu ghakara nowoma ne mbadi ghakara noruhakitho rokuyarerera. ¹⁹ Atwe kuhaka yoyishi Nyambi ghatangire kutuhaka. ²⁰ Ngeshi ghumwe ghaghamba eshi, ''Nahaka Nyambi'' ene ghanyenga muyendhendi, oyu ghamona, mbadi wa kukona kuhaka Nyambi, oyu ghapira kumona. ²¹ Kemo, oghu ne ghomuragho oghu twawana kukwendi; kehe yu gho kuhaka Nyambi ne ghakona karo kuhaka muyendhendi.