¹ Mbadi nashutuka me ndi? mbadi no mupostoli me? mbadinapo namona Jesusi ghofumu wetu me? ² Ngeshi mbadi no mu Apostoli kwawamwe ne hasha kukwenu ne no mu apostoli . Amwene yamwe mwa thingangera thoghopostoli wange mwafumu. ³ Ethi ne thothikughamwenitho thange kowa hani kengurura ; ⁴ Mbadi twa kara nongcamu dhokudya no kunwa ndi ? ⁵ mbadi twakara no ngcamu dhokushimba netu mukamadi ghokuyeka, thika kenge ha Apostoli hamwe , no hayendha homwa fumu , na Keifasi ndi?. ⁶ Endi yame ngenyu na Barabasi twapira ghuraghuri gho kupira kurughana? ⁷ Yidye ghokurughana eshi mashurundate papendi thinda ? yidye yu gho kutapeka dipya dyovinyu no mbadi wa kudya mbuyo dhapo ? Endi oyu ghokukunga yimuna no, mbadi wakunwa ko manhwe? ⁸ Pamarawero ghamunu na kughambera gha manando ? mbadikemo nagho muragho waghamba? ⁹ Ayone yapwa kutjanga mumuragho wa Mosesi ''Watura tumo kupuru oku ghana kudya muhonyi ''. puru yoshemwa ghapakera thinga Nyambi? ¹⁰ Mbadi kukwetu ghana ghughamba ? kukwetu hayi tjangerire yoyishi oyu gho kupurura ne ghakona kupurura mumakurupero , no oyu gho kukesha ne ghakona kukesha mumakurupero eshi mboghana tapa mumuyangu wendi. ¹¹ Ngeshi twa kunine yinu yopamupepo mumwenu ne , yikuru kukwetu eshi tuyangure yinu yopanyama ndi? ¹² Ngeshi hamwe ne harughanithire ngcamu dhi kukwenu, mbadi twakara twe no ngcamu dhodhiwa papenu ? Ene mbadi twashimbire twe ngcamu dhi. Mudyango di twa dhidhimekire muyoyiheya mbadi yira kukara thishingeka kumbudhi dho dhiwa dha kristusi . ¹³ Mbadi mwadimuka eshi awa ha rughananga yirughana yo ghupongoki ne kwa wananga yidya yagho mutembeli ? mbadi mwadimuka eshi hakareri ho thinyaku ne kuwana koyi ha kutapa kuthinyaku ? ¹⁴ Mundhira dhofotji, nyambi gharaghurire eshi awa hana kuyuvitha mbudhi dhodhiwa hakona kuwana ghuparowagho mumbudhi dhodhiwa. ¹⁵ Ene me mbadi nepurire po thimweya payinu yi. No mbadi nakuyitjanga yi podiyo eshi munitendereko thinu thimweya. Hasha kukwange eshi nife noyofotji temba shoghanishinge mukukununeka . ¹⁶ Ngeshi niyuvithe mbudhi dhodhiwa , mbadi nidi no thitambo thokukununeka yoyishi nakona kuyitenda. Ghukukutu keho kukwange ngeshi mbadi shoni yuvithe mbudhi dhodhiwa. ¹⁷ Ngeshi ni tende yi mughuhima, nidi nondjambi. Ene ngeshi mbadi mughuhima ,nidi shime no thirughana ethi hanipire . ¹⁸ Yiruwera yange yiruwera munyekeho? Eshi ngo pa ghokuyuvitha , ngo nakona kutapa mbudhi dhodhiwa ghupira kudhitapitha no mbadi kurughanitha mangcamu ghange ghomahe ghomumbudhi dhodhiwa. ¹⁹ Ngambi kenge eshi nashutuka kwawahe , nakukara mupika kwawahe podigho eshi ni wine thikuma. ²⁰ Kwawa Juda ne kukura me yira muJuda , podigho eshi niwine haJuda.Kowa hakara kwishi dhomuragho, name kukara yira ghumwe yu ghakarakwishi dhomuragho.Natendire yi ngambi kenge eshi ame nothinda ne mbadi nakarire kwishi dhomuragho. ²¹ Kowa hakara panunda dhomuragho nowe kukara yira ghumwe ghopanunda dhomuragho , ngambi kenge eshi mbadi nakarire panunda dhomuragho . ²² Kwawakashu name kukasha , podigho eshi ni wine hakashu. Nakara keho yinu yoyihe kwawanu wahe , podigho eshi ni komonone ko hamweya ²³ .Ame kutenda yoyiheya yi pamurandu ghombudhi dhodhiwa, podigho eshi nakukupakerere mumatungekero ghadho. ²⁴ Mbadi mwadimuka eshi mumutangu ne hatjiri wahe ne kutjira mumutangu, ene munu ngenyu ghofotji ghokuwana futo? ²⁵ Kehe mutjiri ne kukukoneka thinda mukehe yinu. Kuyitenda wo hawane ndjambi dhokupwa ,ene atwene kuyitenda twa kawane ndjambi dhokupira kupwa. ²⁶ Podigho eshi ame ne kenge na kutjira, mbadi ghupira thitambo; Ame ne kenge napumuranga mbadi yira ghumwe yu ghana kupumura mumupepo. ²⁷ Ene me ne kudeghura yirama yange yikare ghupika, podigho eshi opa mboni yuvitha kwawa mwene, ame nothinda ne ngombadi ni kutunditheko.